އާޓިފިޝަލް އިންޓެލިޖަންސް (އޭއައި)ގެ ފަންނިއްޔާތާ ގުޅޭ ގާނޫނީ ފްރޭމްވޯކް ހިމެނޭގޮތަށް މާސްޓާޕްލޭނެއް އެކުލަވައިލެއްވުމަށް ރައީސް ޑރ. މުޙައްމަދު މުއިއްޒު އިއްޔެ ނިންމަވައިފިއެވެ.
އެމަނިކުފާނު އެފަދައިން ނިންމަވާފައި ވަނީ އިއްޔެ އޮތް ކެބިނެޓު ބައްދަލުވުމުގައި ކެބިނެޓު ވަޒީރުންގެ ލަފާފުޅާއެކުއެވެ.
ކެބިނެޓުން އެކުލަވާލަން ނިންމާފައިވާ މާސްޓާޕްލޭންގައި، އޭއައިގެ ފަންނިއްޔާތު މެދުވެރިކޮށް އިގުތިސާދީ ފައިދާ އެންމެ ފުރިހަމަ ގޮތުގައި ރާއްޖެއަށް ހޯދޭނެ ގޮތްތަކާއި، އެކަމުގެ ސަބަބުން ދިމާވެދާނެ ނުރައްކާތެރި ހާލަތްތަކުން ސަލާމަތްވާނެ ގޮތްތަައް އެކުލަވައިލަން ވަނީ ނިންމަވައިފައެވެ.
އެ މާސްޓާޕްލޭންގައި ޓެކްނޮލޮޖީގެ ބޭނުން ހިފުމުގައި ދިވެހިރާއްޖޭގައި އަމަލުކުރާނެ ގާނޫނީ ފްރޭމްވޯކެއް ހިމަނާނެއެވެ. އަދި އެފަދަ ކަންކަމުގައި ސަރަހައްދީ ގައުމުތަކުން އަމަލުކުރަމުންދާ ގޮތްތަކަށް ވެސް ބަލާނެއެވެ.
ރައީސް އޮފީހުން ބުނި ގޮތުގައި އިއްޔެގެ ވަޒީރުންގެ މަޖިލީހުގެ ބައްދަލުކުރެއްވުމުގައި ރައީސް ވަނީ އޭއައިގެ ފަންނިއްޔާތާ ގުޅޭ މާސްޓާޕްލޭނެއް އެކުލަވައިލެއްވުމަށްފަހު، ހޯމް މިނިސްޓްރީއާއި އިކޮނޮމިކް މިނިސްޓްރީން އެކަމާ ގުޅޭ ކަރުދާސްތައް ވަޒީރުންގެ މަޖިލީހަށް ހުށަހެޅުއްވުމަށް ކަނޑައަޅުއްވާފައެވެ.
މިދިޔަ މަހު އެމެރިކާގައި އޮތް އދ.ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގެން ރައީސް ވަނީ ރާއްޖެގައި ޑިޖިޓަލް އިކޮނޮމީ ތަރައްގީކުރަން ކުރަމުންދާ މަސައްކަތްތަކަށް އަލިއަޅުއްވައިލައްވައިފައެވެ. އެގޮތުން އެ މަޖިލީހުގެ ހަވާސާ ބައްދަލުވުމެއްގައި ރައީސް ވަނީ ރާއްޖެއިން އުފެއްދުންތެރިކަން އިތުރު ކުރުމަށް އޭއައި ބޭނުންކުރުމުގެ މަސައްކަތް ކުރަމުން އަންނަކަން ފާހަގަކުރައްވައިފައެވެ.