ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)ގެ މަސައްކަތް ހުއްޓިފައި ނުވާކަމަށާއި އެ މަސައްކަތް ކަނޑައަޅާފައިވާ ޝެޑިއުލާ އެއްގޮތަށް ކުރިއަށްދާކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ.
ސައީދު މިފަދައިން ވިދާޅުވީ ރާއްޖޭގައި އަލަށް ގާއިމުކުރާ ޑިވެލޮޕްމަންޓު ބޭންކުގެ ފަހުގެ މަސައްކަތްތައް ހިއްސާކުރެއްވުމަށް އެކްސްގައި ކުރެއްވި ޕޯސްޓްއެއްގައެވެ.
މި ޕޯސްޓުގައި ވަނީ، ޑީބީއެމްގެ މަސައްކަތް ކުރަނީ ތިން މަރުހަލާއަކަށް ބަހާލައިގެން ކަމަށެވެ. އެގޮތުން، މިހާރު ކުރިއަށް ދަނީ ފުރަތަމަ މަރުހަލާ، އިންސްޓިޓިއުޝަނަލް ސެޓަޕް ކަމަށާއި އެ މަސައްކަތް ޝެޑިއުލާ އެއްގޮތައް ކުރިޔަށް ދާކަމަށް އޭނާ ލިޔުއްވާފައި ވެއެވެ.
ސައީދު ވިދާޅުވީ ޑީބީއެމްގެ ވިޔަފާރީގެ މޮޑެލްގައި އިންސްޓިޓިއުޝަނަލް އިންވެސްޓަރުންނާއި ބޮޑެތި އިންފްރާސްޓްރަކްޗާ މަޝްރޫއުތަކަށް އިސްކަންދީފައިވާއިރު، ފަހުގެ މަރުހަލާއެއްގައި ރީޓެއިލް ޚިދުމަތްތައް ތައާރަފުކުރުމުގެ ޕްލޭންތައް ވެސް ރާވާފައި ވާކަމަށެވެ.
މި މަސައްކަތް މަރުހަލާތަކަކަށް ބަހާލައިގެން ކުރިއަށް ގެންދިއުމުގެ ބޭނުމަކީ، އިގުތިސާދު ހަމައަކަށް އެޅުވުމާއި ހަރުދަނާ ކުރުމަށް ކުރެވޭ ފުޅާ މަސައްކަތްތަކާ މި މަސައްކަތް ގުޅިފައިވުންކަން މިނިސްޓަރު ފާހަގަކުރައްވާފައި ވެއެވެ.
މީގެ އިތުރުން ސައީދު ވަނީ، ޕަބްލިކް ފައިނޭންސް ބެލެހެއްޓުމުގައި ކުރީގެ ސަރުކާރަކުން ފުރިހަމަ އުސޫލެއް ނުގެންގުޅެ ޒިންމާދާރުކަން ކުޑަކޮށް ކަންތައްތައް ކުރުމުން ދިމާވި ތަދިތަކުން އަރައި ގަނެވިފައިވާކަން ފާހަގަކުރައްވާފައެވެ.
ޑިވެލޮޕްމަންޓު ބޭންކުގެ އިމާރާތުގެ މަސައްކަތްތައް ކުރިއަށްދާ ގޮތް ސައީދު ވަނީ މީގެކުރިން ބައްލަވާލައްވައިފިއެވެ.
ޑިވެލްޕްމަންޓް ބޭންކް އޮފް މޯލްޑިވްސް އުފައްދާފައި ވަނީ މިދިޔަ މޭމަހުގެ 16ވަނަ ދުވަހުއެވެ.
ރައީސް އޮފީހުން ބުނީ މި ކުންފުންޏަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤުތިސާދީ އަދި އިޖުތިމާއީ ތަރައްޤީއަށް އިންވެސްޓުކުރުމާއި، އުމްރާނީ ތަރައްޤީއަށް ބޭނުންވާ ފައިސާ ހޯދާނެ ކުންފުންޏެއް ކަމަށެވެ.
އަދި ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫއުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ހައްލުކުރުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ކުންފުންޏެއް ކަމަށެވެ.
ޑިވެލޮޕްމެންޓް ބޭންކުތަކަކީ، ގައުމުގައި އިންޑަސްޓްރީތަކާއި، ވިޔަފާރިތައް އުފައްދާ، ކުރިއެރުވުމަށް ބޭނުންވާ މާލީ އެހީތެރިކަން ފޯރުކޮށްދޭ ބޭންކުތަކެވެ. އެގޮތުން ވިޔަފާރިތައް ފަށައިގަތުމަށް ބޭނުންވާ ލޯނާއި އެހެނިހެން މާލީ އެހީތެރިކަން ވެސް ޑިވެލޮޕްމަންޓް ބޭންކުތަކުން ފޯރު ކޮށްދޭނެއެވެ.