ގިނަ ބަޔަކު އިންތިޒާރުކުރަމުން އަންނަ އެމޭޒަން ޕްރައިމްގެ ވެބް ސީރީސް "ސިޓަޑެލް: ހަނީ ބަނީ"ގެ ޓްރެއިލާ ދައްކާލައިފިއެވެ.
އަންނަ މަހުގެ ހަތް ވަނަ ދުވަހު އެމޭޒަން ޕްރައިމްގައި ޕްރީމިއާ ކުރަން ހަމަޖެހިފައިވާ އެކްޝަން ޕެކްޑް މި ސީރީސް އަކީ "އެވެންޖާސް އެންޑްގޭމް"ގެ ޑައިރެކްޓަރުން ކަމަށްވާ އެންތަނީ އާއި ގޯ ރުސޯ މިދިޔަ އަހަރު ގެނެސްދިން "ސިޓަޑެލް"އާ ގުޅުވައިގެން ގެނެސްދޭ މި ފްރެންޗައިސްގެ އިންޑިއާ ވާޝަންއެވެ.
ހޮލީވުޑްގެ ސީރީސްއިން އިންޑިއާގެ ބަތަލާ ޕްރިޔަންކާ މުހިއްމު ރޯލްއިން ފެނުނުއިރު އިންޑިއަން ވާޝަން "ސިޓަޑެލް:ހަނީ ބަނީ"އިން ފެންނާނީ ބޮލީވުޑްގެ އެކްޓަރު ވަރުން ދަވަން އަދި ސައުތު ބަތަލާ ސަމަންތާ ރޫތު ޕްރަބޫއެވެ.
ހޮލީވުޑް ވެބް ސީރީސް 'ސިޓަޑެލް'ގެ ޕޯސްޓަރެއް--ފޮޓޯ/ކޮއިމޮއި
މި ފްރެންޗައިސްގެ އިންޑިއާ އުފެއްދުން ގެނެސްދޭނީ އެމޭޒަން ޕްރައިމްއަށް ކާމިޔާބު ވެބް ސީރީސް އުފައްދާފައިވާ ކުޅަދާނަ ދެ ޑައިރެކްޓަރުން ކަމަށްވާ ރާޖް އެންޑް ޑީކޭއެވެ. ސަމަންތާ އާއި ވަރުންގެ އިތުރުން މި ސީރީސްއިން ފެންނާނެ އިތުރު ތަރިންގެތެރޭ ސާގިބް ސަލީމް، ކޭކޭ މެނަން، ސިކަންދަރު ހޭރު، އަދި ސިމްރަން ބައްގާ ހިމެނެއެވެ.
މިއީ ވަރުން ދަވަންގެ ފުރަތަމަ ވެބް ސީރީސްއަށް ވީ ނަމަވެސް ބަތަލާ ސަމަންތާ ވަނީ މީގެކުރިން ވެސް ރާޖް އާއި ޑީކޭއާ އެކު މަސައްކަތްކޮށްފައެވެ. އެއީ ދެ ޑައިރެކްޓަރުން ގެނެސްދިން ކާމިޔާބު ވެބް ސީރީސް "ފެމިލީ މޭން"ގެ އެންމެ ފަހު ސީޒަންގައެވެ.
މި ވެބް ސީރީސް އަކީ މަޝްހޫރު ރުސޯ ބްރަދާސްއާ އެކު ރާޖް އެންޑް ޑީކޭ މަސައްކަތްކުރި ފުރަތަމަ ޕްރޮޖެކްޓަށް ވެފައި ރުސޯ ބްރަދާސް ފަދަ ތަޖުރިބާކާރު އުފެއްދުންތެރިންނާ އެކު މަސައްކަތްކޮށްލަން ލިބުނު ފުރުސަތަކީ ދެ ޑައިރެކްޓަރުންނަށް ވެސް ލިބުނު ވަރަށް މުހިއްމު ފުރުސަތެއްގެ ގޮތުގައި ރާޖް އާއި ޑީކޭ ވަނީ ފާހަގަކޮށްފައެވެ.