އައިފޯން ބޭނުންކުރާ ފަރާތްތަކަށް މިއޮތީ ވަރަށް އުފާވެރި ޚަބަރެކެވެ. އެޕަލްގެ އެންމެފަހުގެ އަޕްޑޭޓް އައިއޯއެސް 18.1 އަޕްޑޭޓާއެކު، އެޕަލް އެކައުންޓްގެ ޕްރައިމަރީ އީމެއިލް އެޑްރެސް ބަދަލުކުރުމުގެ މަސައްކަތް ވަރަށް ބޮޑަށް ފަސޭހަވެއްޖެއެވެ.
މި އަޕްޑޭޓް ކުރިން، އެޕަލް އެކައުންޓާ ގުޅިފައިވާ އީމެއިލް ބަދަލުކުރުމަށް އެތައް ގިނަ މަރުޙަލާތަކެއް ކަޑައްތުކުރަން ޖެހެއެވެ.
ނަމަވެސް މިހާރު، ސެޓިންގްސް އެޕް މެދުވެރިކޮށް ސީދާ ޕްރައިމަރީ އީމެއިލް އަޕްޑޭޓްކުރެވޭނެއެވެ. އަދި ކުރީގެ އީމެއިލް ޑިލީޓްކުރާކަށް ނުޖެހޭނެއެވެ.
މީގެ އިތުރުން، މި އަޕްޑޭޓާއެކު iCloud.com އަދި me.com އީމެއިލް އެޑްރެސްތައް ވެސް ބަދަލުކުރެވޭނެއެވެ. މިއީ ކުރިން ނުކުރެވޭ ކަމެކެވެ. މި ބަދަލާއެކު ބޭނުންކުރާ ފަރާތްތަކަށް އެ މީހުންގެ އެކައުންޓާއި ޕްރައިވެސީ އިތުރަށް ކޮންޓްރޯލްކުރެވޭނެއެވެ.
އައި.އޯ.އެސް 18.1 ގައި ހިމެނޭ އެހެން މުހިންމު ފީޗާއެއްގެ ގޮތުގައި "އެޕަލް އިންޓެލިޖެންސް" ފާހަގަކުރެވެއެވެ. މިއީ އާޓިފިޝަލް އިންޓެލިޖެންސް (އޭ.އައި) ޓޫލްސްގެ ސެޓެކެވެ. ނަމަވެސް މި ވަގުތަށް މި ފީޗަރ ލިބެން ހުންނާނީ ހަމައެކަނި އެމެރިކާގައެވެ.
މި އަޕްޑޭޓަކީ އައިފޯން ބޭނުންކުރާ ފަރާތްތަކަށް ދުވަހުން ދުވަހަށް ކުރަންޖެހޭ މަސައްކަތްތައް ފަސޭހަކޮށްދޭ، ޢަމަލީ ގޮތުން ބޭނުންހިފޭނެ ގިނަ ކަންކަން ހިމެނޭ އަޕްޑޭޓެކެވެ.
މިހާތަނަށް ލިބެންހުރި މައުލޫމާތު ތަކަށް ބަލާއިރު، އެޕަލްއިން އައި.އޯ.އެސް 18.1 ގެ ރަސްމީ ރޯލްއައުޓް ފަށާނީ މި ފެށޭ ނޮވްމެބަރު އެއްވަނަ ދުވަހުއެވެ. ނަމަވެސް، ބީޓާ ޓެސްޓަރުންނަށް މި އަޕްޑޭޓް މި މަހު 20 އިން ފެށިގެން ލިބޭނެއެވެ.
މި އަޕްޑޭޓް ލިބޭނީ އައިފޯން 12 އަދި އޭގެ ފަހުގެ މޮޑެލްތަކަށެވެ. އައި.އޯ.އެސް 18.1 އަކީ 2.1 ޖީބީގެ ބޮޑު އަޕްޑޭޓެކެވެ. އެހެންކަމުން، ޑައުންލޯޑް ކުރުމަށް ވައިފައި ކަނެކްޝަނެއް ބޭނުންކުރުމަށް އެޕަލްއިން ލަފާދެއެވެ.
އަދި އަޕްޑޭޓް ކުރުމުގެ ކުރިން ޑިވައިސްގެ ބެކަޕެއް ނެގުމަކީ މުހިންމު ކަމެކެވެ. މި އަޕްޑޭޓާއެކު ގެނެވޭ ބައެއް ފީޗާތައް ވަކި ވަކި ސަރަޙައްދުތަކަށް ނުވަތަ ޤައުމުތަކަށް ބަހާލައިގެން ތަޢާރަފުކުރެވޭނެކަން ވެސް ފާހަގަކޮށްލަމެވެ.