މި އަހަރުގެ ޑިސެމްބަރު މަހު ރިލީޒްކުރަން ތައްޔާރުވަމުން އަންނަ އެކްޓަރު ވަރުން ދަވަންގެ ފިލްމު "ބޭބީ ޖޯން"ގެ ވިލެންގެ ރޯލުން ފެންނާނީ ކުރީގެ ފިލްމީތަރި ޖެކީ ޝްރޮފްކަން އިއުލާނުކޮށްފިއެވެ.
މި ފިލްމުގައި ޖެކީ ފެންނާނެގޮތް ދާދިފަހުން ބެލުންތެރިންނަށް ދައްކާލާފައިވާއިރު މީގެ ކުރިން ވެސް ވިލެންގެ ރޯލްތައް ކުޅެފައިވާ ކުޅަދާނަ އެކްޓަރު ފެންނާނީ ނުރައްކާތެރި ބައްބަރު ޝޭރު ނަމަކަށް ކިޔާ ކެރެކްޓާއަކުންނެވެ. ފިލްމުގައި ޖެކީ ފެންނާނެ ގޮތް ދައްކާލަމުން ވަރުން ބުނެފައިވަނީ މިހާތަނަށް ފެނިފައިނުވާ ފަދަ ސިހުން ގެނެސްދޭނެ އަނދިރިކަމެއް ޖެކީގެ ރޯލުން ބެލުންތެރިންނާ ކުރިމަތިވާނެ ކަމަށެވެ.
ފިލްމު "ބޭބީ ޖޯން"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
ފިލްމުގައި ޖެކީ ފެންނާނެ ގޮތް އާއްމުކުރުމާ އެކު ވަރަށް ގިނަ ބަޔަކު އަންނަނީ "ބޭބީ ޖޯން"ގެ ޓްރެއިލާ ރިލީޒްކުރާނެ ތާރީޚަކަށް އިންތިޒާރުކުރާ ކަމަށް ބުނަމުންނެވެ. ވަރުން ދަވަން ލީޑް ރޯލުން ފެންނަ މި ފިލްމަކީ، "ޖަވާން"ގެ ޑައިރެކްޓަރު އެޓްލީގެ ތަމަޅަ ފިލްމެއްގެ ރީމޭކެކެވެ. ޖިއޯ ސްޓޫޑިއޯ އާއި ސައިން1 ސްޓޫޑިއޯ ގުޅިގެން ގެނެސްދޭ މި ފިލްމުގެ ޕްރޮޑިއުސަރުންނަކީ އެޓްލީގެ އަންހެނުން ޕްރިޔާ އެޓްލީ އަދި މުރާދު ހެތުނީއެވެ.
ވަރުންގެ އިތުރުން ފިލްމުގެ މުހިއްމު ރޯލަކުން ފެންނާނެ ތަރިންގެ ތެރޭ ސައުތު ސިނަމާގެ ބަތަލާ ކީރްތީ ސުރޭޝް އަދި ވަމީގާ ގައްބީ ހިމެނެއެވެ. ޓްރޭޑް އެނަލިސްޓު ތަރަން އާދާޝްއާ ހަވާލާދީ ހިންދުސްތާން ޓައިމްސްގައި ބުނެފައިވަނީ "ބޭބީ ޖޯން"ގެ ޚާއްސަ ފެނިލުމަކުން ސަލްމާން ޚާން ވެސް ފެންނާނެ ކަމަށެވެ.
މި ފިލްމު ސިނަމާތަކަށް ގެންނަން ނިންމާފައިވަނީ މި އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.