ޓެކްސީއެއްގެ ޑިކީތެރޭގައި އޮތް ގަނޑުކުރި ކުކުޅުތަކަކާއި ޗިކަން ނަގެޓްސް އަދި މިނޫން ވެސް ބައެއް އެއްޗެހީގެ ވެރިފަރާތް ހޯދުމަށް މޯލްޑިވްސް ޕޮލިސް ސާވިސްއިން އިއުލާނު ކޮށްފިއެވެ.
މި ތަކެތީގެ ވެރިފަރާތް ހޯދުމަށް އެދި ފުލުހުން އިއުލާނުކޮށްފައި ވަނީ މިރޭގެ 7:45 ހާއިރުގައެވެ.
ފުލުހުން ކޮށްފައިވާ އިއުލާނުގައި ވަނީ މިއަދުގެ މެންދުރުފަހުގެ ވަގުތެއްގައި މާލޭން ހުޅުމާލެ ލަކުޑި ޖެޓީއަށް ދަތުރުކުރި ޓެކްސީއެއްގެ ޑިކީ ތެރެއިން ފެނިފައިވާ ގަނޑުކުރި ކުކުޅުތަކަކާއި، ޗިކަން ނަގެޓްސް އަދި ފިޔާ ތަކެއްގެ ވެރިފަރާތް ހޯދުމުގެ މަސައްކަތް ފުލުހުން ކުރަމުން ދާކަމަށެވެ.
އަދި މި ތަކެތީގެ ވެރިފަރާތުން، ހުޅުމާލެ ފޭސް އެކެއްގެ ޕޮލިސް ސްޓޭޝަނަށް ހާޒިރުވެ ތަކެއްޗާ ހަވާލުވުމަށް ފުލުހުން ވަނީ އެދިފައެވެ.
އަދި މި ތަކެތީގެ އިތުރު މައުލޫމާތު ސާފުކުރެއްވުމަށް ހުޅުމާލެ ފޭސް އެކެއްގެ ޕޮލިސް ސްޓޭޝަން ނަންބަރު 9980062 އަށް ގުޅުމަށްވެސް ފުލުހުން ވަނީ އެދިފައެވެ.
މިދިޔަ ސެޕްޓެންބަރު މަހުގެ ފަހުކޮޅު، ހުޅުމާލެއިން ކުކުޅު ކޭހެއް ހޮވައިގެން އޭގެ ވެރިފަރާތް ހޯދަން ވެސް ފުލުހުން އިއުލާން ކުރިއެވެ.
އެ ފަހަރު ފުލުހުން އިއުލާނުކުރީ، ހުޅުމާލެ ފުރަތަމަ ފިޔަވަހީގައި ހުންނަ އަލިނިރު ކެފޭ ކައިރިން ހޮވައިގެން ގެނެސްފައިވާ ކުކުޅު ކޭހެއްގެ ވެރިފަރާތެވެ.