މި އަހަރުގެ ދެވަނަ ކުއާޓަރުގެ ނިޔަލަށް ދައްކަންޖެހޭ ޓޫރިޒަމް ދާއިރާގެ ޖީއެސްޓީއާއި ގްރީން ޓެކްސް ނުދައްކައިވާ 170 ފަރާތެއްގެ ނަން މީރާއިން ހާމަކޮށްފިއެވެ.
މި ފަރާތްތަކުގެ ނަން ހާމަކޮށްފައިވަނީ ޓެކްސް ބަޔާން ހުށަނާޅާ އަދި ފައިސާ ނުދައްކާ ފަރާތްތަކުގެ ނަން ހާމަކުރާ އުސޫލުގެ ދަށުންނެވެ.
މީރާއިން ބުނީ ޓޫރިޒަމް ޓެކްސްއާއި ގްރީން ޓެކްސްގެ ގޮތުގައި އެ ފަރާތްތަކުން ދައްކަންޖެހޭ ފައިސާގެ އަދަދު 100،000،000 ރުފިޔާއަށް އަރާ ކަމަށެވެ.
އެ ފަރާތްތަކުގެ ނަން ހާމަކޮށްފައިވަނީ ފައިސާ ދެއްކުމަށް ތަކުރާރުކޮށް ހަނދާންކޮށްދީ، ތަފާތު ނޯޓިސްތައް ފޮނުވައި އަދި އިތުރު މުއްދަތުތަކާއި ފުރުސަތުތައް ވެސް މީރާއިން ދިނުމަށް ފަހުގައެވެ. އެ ގޮތުން ޓެކްސް ދެއްކުމުގެ ސުންގަޑީގެ ހަތް ދުވަސް ކުރިން އޮޓަމެޓިކް ރިމައިންޑާ ކޯލެއްދީ، ސުންގަޑީގެ ތިން ދުވަސް ކުރިން އަދި ސުންގަޑިއާއި ސުންގަޑީގެ ތިން ދުވަސް ފަހުން ވެސް އެ ފަރާތްތަކަށް ނޯޓިސް ދީފައިވާ ކަމަށް މީރާއިން މައުލޫމާތުދެއެވެ. އަދި އެ ނޯޓިސް ފޮނުވިތާ 30 ދުވަސް ފަހުން ވެސް އެންފޯސްމަންޓުގެ އިތުރުން، ފިޔަވަޅުތައް އަޅާނެކަން ބަޔާންކޮށް ފައިނަލް ނޯޓިސް ދީފައިވާނެ ކަމަށް މީރާއިން ވަނީ ބުނެފައެވެ.
މީރާއިން އިތުރަށް ބުނީ، މި މުއްދަތުގެ ތެރޭގައި އެ ފަރާތްތަކަށް ފައިސާ ދެއްކެން ނެތްނަމަ، އިންސްޓޯލްމަންޓް އުސޫލުން ބަހާލައިގެން ފައިސާ ދެއްކުމުގެ އެއްބަސްވުމަކަށް އައުމުގެ ފުރުސަތު ވެސް ދީފައިވާނެ ކަމަށެވެ. އަދި އެ ފަދަ އެއްބަސްވުމަކަށް އައިސް، ފައިދާ ދައްކަމުންގެންދާނަމަ، އެންފޯސްމަންޓުގެ އިތުރު ފިޔަވަޅު ނާޅާނެ ކަމުގެ ޔަގީންކަން އެ ފަރާތްތަކަށް ދީފައިވާނެ ކަމަށް ވެސް މީރާއިން ބުނެފައިވެއެވެ.
މީރާއިން ބުނީ އެ ފަރާތްތަކުން ދައްކަންޖެހޭ ފައިސާ މުއްދަތުގައި ދައްކާފައިނުވަނީ، ދައުލަތުން ލިބެންޖެހޭ ފައިސާ ނުލިބުމުގެ ސަބަބުން ކަމުގައިވާނަމަ، އެ ކަން ބަޔާންކޮށް އެ ކަމާ ގުޅޭ ލިޔެކިޔުންތައް ހުށަހަޅާ ފަރާތްތަކުގެ ނަންތައް ހާމަ ނުކުރާ ކަމަށެވެ.
އެ އިދާރާއިން ބުނީ އަބަދު ވެސް މަސައްކަތް ކުރަމުން ދަނީ ޓެކްސް ދައްކާ ފަރާތްތަކަށް އެހީތެރިވެދީ، އެ ފަރާތްތަކުގެ ޓެކްސް ކޮމްޕްލަޔަންސް ރަނގަޅު ކުރުމަށް ކަމަށެވެ. އެ ގޮތުން ފާއިތުވީ ތިން މަސްދުވަހުގެ ތެރޭގައި ޓެކްސް ނުދައްކާ ފަރާތްތަކަށް ޖުމްލަ 44،390 އެސްއެމްއެސްއާއި 22،761 ފޯންކޯލް އަދި 30،550 ނޯޓިސްދީ ހަނދާންކޮށްދީފައިވާނެ ކަމަށް ވެސް މީރާއިން ވަނީ ބުނެފައެވެ.
މީގެ އިތުރުން ވެސް، 397 ފަރާތަކަށް އިންސްޓޯލްމަންޓް ޕްލޭންތަކުގެ ދަށުން ބަހާލައިގެން ފައިސާ ދެއްކޭނެ ލުއި ގޮތްތައް މީރާއިން ވަނީ ހަމަޖައްސައިދީފައެވެ.
މީރާއިން ވަނީ ޓެކްސް ދައްކާ ފަރާތްތަކުން ޓެކްސް ފައިސާ، ސުންގަޑިއަށް އަދާކުރަމުންގެންދިއުމަށް އެދިފައެވެ.