އެމެރިކާގެ މަތިންދާ ބޯޓު އުފައްދާ ކުންފުނި ބޮއިންގުން 17،000 ވަޒީފާ ނުވަތަ ކުންފުނީގެ 10 އިންސައްތަ މުވައްޒަފުން މަދުކުރަން ނިންމައި، 777އެކްސް ޖެޓް ފުރަތަމަ ޑެލިވަރީ އަހަރަކަށް ލަސްކޮށްފައިވާ ކަމަށް ކުންފުނީގެ ޗީފް އޮޕަރޭޓިން އޮފިސާ (ސީއީއޯ) ކެލީ އޮޓާބާގް ވިދާޅުވެއްޖެއެވެ.
ހުކުރު ދުވަހު މުވައްޒަފުންނަށް ފޮނުއްވި މެސެޖެއްގައި އޮޓްބާގް ވިދާޅުވީ އެމެރިކާގެ ހުޅަނގުގައި ކުންފުނީގެ 33،000 މަސައްކަތްތެރިން، ކުރަމުންދާ ހަޅުތާލުގައި 737 މެކްސް، 767 އަދި 777 ޖެޓް އުފެއްދުން ހުއްޓާލުމުގެ ސަބަބުން ކުންފުނީގެ މާލީ ހާލަތު ގޯސްވެ، މުވައްޒަފުން މަދުކުރަން ޖެހިފައިވާ ކަމަށެވެ.
އަދި އުފެއްދުމުގައި ކުރިމަތިވި ގޮންޖެހުންތަކުގެ އިތުރުން ފްލައިޓް ޓެސްޓްކުރުން މަޑުޖެހުމާއި މަސައްކަތް ހުއްޓާލުމުގެ ސަބަބުން 777X ގެ ފުރަތަމަ ޑެލިވަރީ ދެން ކުރެވޭނީ 2026 ވަނަ އަހަރު ކަމަށް ކަސްޓަމަރުންނަށް އަންގާފައިވާ ކަމަށްވެސް އޮޓްބާގް ވިދާޅުވިއެވެ.
ބޮއިންގްއަށް މީގެ ކުރިން ވެސް 777X ގެ ސެޓްފިކެޓް ދިނުމުގައި މައްސަލަތަކެއް ކުރިމަތިވެ، އެ ބޯޓު ލޯންޗު ކުރުން އޮތީ ވަރަށް ބޮޑަށް ލަސްވެފައެވެ.
މި މަހުގެ 23 ގައި ތިން ވަނަ ކުއާޓަރުގެ އާމްދަނީ ރިޕޯޓް އާންމު ކުރަން ހަމަޖެހިފައިވާއިރު، ކުންފުނީގެ އާމްދަނީއަށް 17.8 ބިލިއަން ޑޮލަރުގެ ގެއްލުމެއް ލިބޭނެ ކަމަށް ބޮއެންގުން ވަނީ ލަފާކޮށްފައެވެ.
މަސައްކަތް ހުއްޓާލުން ނިމުމަކަށް ގެނައުމަށް އެއްބަސްވުމަކަށް އައުމަކީ ބޮއިންގްއަށް ވަރަށް މުހިންމު ކަމެކެވެ. ރޭޓިން އެޖެންސީ އެސް އެންޑް ޕީއިން ލަފާކުރާ ގޮތުގައި ހަޅުތާލުގެ ސަބަބުން މަހަކު އެއް ބިލިއަން ޑޮލަރުގެ ގެއްލުން ކުންފުންޏަށްވާއިރު، އިންވެސްޓްމަންޓް ގްރޭޑްގެ ކްރެޑިޓް ރޭޓިން ގެއްލުމުގެ ނުރައްކާ އެބައޮތެވެ.
ބޮއިންގްގެ މުވައްޒަފުން ހަޅުތާލު ކުރާތާ މަހެއްހާ ދުވަސްވެފައިވާއިރު، ގާތްގަނޑަކަށް 33،000 މަސައްކަތްތެރިން އެދެނީ ރަނގަޅު މުސާރަ އެއް ދިނުމަށެވެ.