ބޮލީވުޑްގެ އެންމެ އުއްމީދީ ޒުވާން ފިލްމީ ތަރިންގެތެރޭ ހިމެނޭ އަނަނިޔާ ޕާންޑޭ އަމިއްލަ ޕޮޑްކާސްޓް ޝޯއެއް ތައާރަފްކޮށްފިއެވެ.
އަނަނިޔާގެ މި ޕޮޑްކާސްޓް ޝޯ ގެނެސްދެނީ 'ދަ ސޯ ޕޮޒިޓިވް ޕޮޑްކާސްޓް' މި ނަމުގައެވެ.
މިއީ މިދިޔަ ބުރާސްފަތި ދުވަހު ފާހަގަކުރި ނަފުސާނީ ދުޅަހެޔޮކަމުގެ ދުވަހާ ގުޅުވައިގެން އަނަނިޔާ ތަޢާރަފްކޮށް ލޯންޗުކުރި ޝޯއެކެވެ. މި ޕޮޑްކާސްޓް ޝޯގެ ފުރަތަމަ އެޕިސޯޑުގެ ޓްރެއިލާ ރިލީޒްކޮށްފައިވާއިރު ފުރަތަމަ ޕޮޑްކާސްޓް ޝޯ މި މަހުގެ 15 ވަނަ ދުވަހު ސްޕޮޓޮފައިއިންޑިއާއިން ސްޓްރީމްކުރާ ގޮތަށް ވަނީ ނިންމާފައެވެ.
ދާދިފަހުން ސްޓްރީމްކުރަން ފެށި ކެރިއަރުގެ ފުރަތަމަ ވެބް ސީރީސް "ކޯލް މީ ބޭ"އިން ގިނަ ބައެއްގެ ތަރުހީބު ހޯދި ބަތަލާގެ ޕޮޑްކާސްޓް ޝޯގެ ފުރަތަމަ އެޕިސޯޑު ހާއްސަކޮށްފައި ވަނީ ޑިޖިޓަލް ދުނިޔޭގައި މަސައްކަތްކުރާ ޒުވާނުންގެ ދުޅަހެޔޮކަމުގެ މައްޗަށެވެ. އަނަނިޔާއާ އެކު ފުރަތަމަ އެޕިސޯޑުގައި ޑިޖިޓަލް ދުނިޔޭގައި މަސައްކަތްކޮށް ކޮންޓެންޓް އުފައްދާ ހަ ފަންނާނުން ބައިވެރިވާނެއެވެ.
އަނަނިޔާގެ ޕޮޑްކާސްޓް ޝޯގެ ފުރަތަމަ އެޕިސޯޑުގެ ޕޯސްޓަރެއް--ފޮޓޯ/ފޭސްބުކް
މި ޒަމާނުގައި އިންޓަނެޓުގެ ބޭނުންކުރަން ވަކި އުމުރެއް ނެތްއިރު ވެބް ކޮންޓެންޓްތައް އުފެއްދުމަކީ ވަރަށް ގިނަ ބަޔަކު ކުރަމުން އަންނަ މަސައްކަތެއްގެ ގޮތުގައި އަނަނިޔާ ވަނީ ފާހަގަކޮށްފައެވެ. ސޯޝަލް މީޑިއާއިން ގިނަ ބައެއްގެ ދިރިއުޅުމަށް ހެޔޮ ބަދަލުތަކެއް އައި ނަމަވެސް އެފަދަ ޕްލެޓްފޯމްތަކުން ދިމާވާ ނުރައްކާތެރި ހާދިސާތަކުގެ ވާހަކަ އާއްމުންނާ ހިއްސާކޮށް އެފަދަ ކަންކަމަށް އާއްމުން ހޭލުންތެރި ކުރުވުމަކީ ބަތަލާގެ ޝޯގެ އެންމެ މުހިއްމު އެއް މަގުސަދުކަމަށް ވަނީ ބުނެފައެވެ.
އަނަނިޔާގެ އެންމެ ފަހުން ރިލީޒްވި ފިލްމުގައި ވެސް ދައްކުވައިދެނީ ޑިޖިޓަލް ދުނިޔޭގެ ބޭނުންކޮށް ސޯޝަލް މީޑިއާގައި ހަރަކާތްތެރިވުމުގައި ސަމާލުކަން ދިނުން މުހިއްމު ކަންކަމެވެ. ނެޓްފްލިކްސްގައި ޕްރީމިއާކުރި "ސީޓީއާރްއެލް"އިން އިންޓަނެޓުގެ ބޭނުންކުރާ ޒުވާނުންނަށް ވަރަށް މުހިއްމު އަދި ޑިޖިޓަލް ދުނިޔެއަށް ބަރޯސާވާއިރު ވިސްނާލަންޖެހޭ މުހިއްމު ހާދިސާތަކެއް ދައްކުވައިދެއެވެ.