ބިލިއަނަރު އެލޮން މަސްކްގެ ސޯޝަލް މީޑިއާ ޕްލެޓްފޯމް އެކްސްގެ ޚިދުމަތް ބްރެޒިލްގައި އަލުން ފަށައިފިއެވެ.
އެކްސްގެ ޚިދުމަތް އަލުން ފަށާފައި މިވަނީ ބްރެޒިލްގެ ސުޕްރީމް ކޯޓުން ނެރުނު އަމުރެއް އުވާލުމާ ގުޅިގެންނެވެ.
އަލުން ޚިދުމަތް ފެށުމުގެ ހުއްދަ ބްރެޒިލްގެ ސްޕްރީމް ކޯޓުން އެކްސްއަށް ދިނީ އިއްޔެއެވެ.
ބްރެޒިލްގެ ޓެލެކޮމިއުނިކޭޝަންސް ރެގިއުލޭޓާ އަނަޓެލްއިން ބުދަ ދުވަހު ބުނެފައިވަނީ އިންޓަނެޓް ޕްރޮވައިޑަރުތަކަށް އެކްސްއަށް އެކްސެސް ދިނުމަށް އަންގަން ފަށައިފައިވާ ކަމަށެވެ.
ބައެއް ޔޫޒަރުންނަށް މިހާރުވެސް އެކްސްއަށް ވަދެވޭ ކަމަށާއި، "ވީ އާ ބެކް" ފަދަ ޓޮޕިކްތައް ބްރެޒިލްގައި ޓްރެންޑް ވަމުންދާ ކަމަށް އެ ފަރާތުން ބުނެފައިވެއެވެ.
ސުޕްރީމް ކޯޓުގެ ފަނޑިޔާރު އަލެކްސާންޑްރޭ ޑި މޮރާއިސްއިން އަންގާރަ ދުވަހުގެ މެންދުރުފަހު އެކްސްއަށް ބްރެޒިލްގައި އަލުން ޚިދުމަތް ފެށުމުގެ ހުއްދަ ދީފައިވާއިރު، އަދި 24 ގަޑިއިރުގެ ތެރޭގައި އެކްސް އަލުން އޮންލައިންކޮށްދިނުމަށް އަނަޓެލްއަށް އަމުރުކޮށްފައިވެއެވެ.
އެކްސްއަށް ބްރެޒިލްގައި ޚިދުމަތް ފެށުމުގެ ހުއްދަ ދިނީ، ކުރިން މަސްކް ދެކޮޅުހަދާފައިވާ ކޯޓު އަމުރުތަކާ އެއްގޮތަށް ޢަމަލުކުރަން ފެށުމާ ގުޅިގެންނެވެ.
އެކްސް ވަނީ އޯގަސްޓް މަހުގެ ފަހުކޮޅުން ފެށިގެން ބްރެޒިލްގައި ހުއްޓުވާފައެވެ. މިއީ ނަފްރަތުގެ ބަސް މޮޑަރޭޓް ކުރުމާ ގުޅޭ ކޯޓު އަމުރުތަކަށް ތަބާނުވުމާއި، ޤާނޫނުގައިވާ ގޮތުގެ މަތިން ޤާނޫނީ ބަލަދުވެރިއެއް ޢައްޔަން ނުކުރުމާ ގުޅިގެން އައި އަމުރެކެވެ.
ބްރެޒިލަކީ އެކްސްގެ އެންމެ މުހިންމު އަދި އެންމެ ބޮޑު މާކެޓްތަކުގެ ތެރެއިން އެއް މާކެޓެވެ. 2023ވަނަ އަހަރުގެ ތަފާސްހިސާބުތަކަށް ބަލާއިރު، ބްރެޒިލްގައި އެކްސް ބޭނުންކުރާ 20 މިލިއަނަށްވުރެ ގިނަ ފަރާތްތައްވެއެވެ.
މިއީ ދުނިޔޭގައި އެކްސް އެންމެ ގިނައިން ބޭނުންކުރާ ޤައުމުތަކުގެ ތެރެއިން ހަވަނައަށް އެންމެ ގިނައިން ބޭނުންކުރާ ޤައުމެވެ. އަދި ލެޓިން އެމެރިކާގައި އެކްސް އެންމެ ގިނައިން ބޭނުންކުރާ ޤައުމަކީ ވެސް ބްރެޒިލްއެވެ.
މި ސަބަބުތަކަށް ޓަކައި، ބްރެޒިލްގެ މާކެޓަކީ އެކްސްއަށް ވަރަށް މުހިންމު އަދި އަގުހުރި މާކެޓެކެވެ. އެހެންކަމުން، ބްރެޒިލްގައި އެކްސްގެ ޚިދުމަތް ހުއްޓުމަކީ ކުންފުންޏަށް ވަރަށް ބޮޑު ގެއްލުމެއް ކުރިމަތިވެދާނެ ކަމެކެވެ.