ދުނިޔޭގެ އެންމެ މުއްސަނދި މީހާ އީލޮން މަސްކް އޭނާގެ އޭއައި ސްޓާޓަޕް ކުންފުނި އެކްސް އޭއައި އިން އާޓިފިޝަލް އިންޓެލިޖެންސް (އޭއައި) ގޭމް ސްޓޫޑިއޯއެއް ހުޅުވާނެ ކަމަށް ބުނެފިއެވެ.
މި ވާހަކަ އޭނާ ދައްކާފައިވަނީ އެކްސް (ކުރީގެ ޓްވިޓާ) ގައި ކުރި ޕޯސްޓެއްގައެވެ. އެ ޕޯސްޓްގައި މަސްކް ފާހަގަކޮށްފައިވަނީ ގިނަ ގޭމް ސްޓޫޑިއޯތައް ބޮޑެތި ކޯޕަރޭޝަންތަކުގެ މިލްކިއްޔާތުގައި ހުރުމާމެދު އޭނާ ކަންބޮޑުވާ ކަމަށެވެ.
މިއީ މަސްކް ގޭމިންއާ ގުޅޭ ގޮތުން ވާހަކަދައްކާ ފުރަތަމަ ފަހަރެއް ނޫނެވެ. ފަހަކަށް އައިސް އޭނާ ވަނީ ޑިއަބްލޯ ހަތަރެއް ކުޅެނިކޮށް ލައިވް ސްޓްރީމްކޮށްފައެވެ. އަދި އާންމު ގޮތެއްގައި ވީޑިއޯ ގޭމްތަކާ ދޭތެރޭ އޭނާގެ ތަޢުރީފު ފާޅުކޮށްފައިވެއެވެ.
އެކްސްގެ އެގްޒެކެޓިވް ޗެއާމަން އަދި ޗީފް ޓެކްނޮލޮޖީ އޮފިސާ (ސީޓީއޯ) ގެ މަޤާމުގައި ހުރި މަސްކް ވަނީ މި އޭއައި ގޭމް ސްޓޫޑިއޯ ހިންގާނީ އެކްސް އޭއައި ގެ ދަށުން ކަމަށް ބުނެފައެވެ.
މި ވާހަކަ މަސްކް ދައްކާފައިވަނީ ޑޮޖްކޮއިން ކްރިޕްޓޯކަރަންސީ އުފެއްދި ސޮފްޓްވެއާ އިންޖިނިއާ ބިލީ މާކަސްގެ ޕޯސްޓަކަށް ޖަވާބު ދެމުންނެވެ.
މާކަސްގެ ޕޯސްޓްގައި ގޭމިން އިންޑަސްޓްރީ "އައިޑިއޮލޮޖިކަލީ ކެޕްޗާ" ވެފައިވާ ކަމަށް ފާޑުކިޔާފައިވެއެވެ. އަދި ގޭމަރުން އަބަދުވެސް ޑިވެލޮޕަރުންނާއި ގޭމިން ނޫސްވެރިން ކުރާ "ބޭކާރު" މެނިޕިއުލޭޝަންތައް ބަލައިނުގަންނަ ކަމަށް ބުނެފައިވެއެވެ.
މީގެ އިތުރުން، ފާއިތުވި 10 އަހަރު ތެރޭގައި އޭނާ އެންމެ ރަނގަޅު ކަމަށް ދެކޭ ގޭމްތައް އައިސްފައިވަނީ މިނިވަން ޑިވެލޮޕަރުންނާއި ސްޓޫޑިއޯތަކުން ކަމަށްވެސް މާކަސް ފާހަގަކޮށްފައިވެއެވެ.
މި ޕޯސްޓަށް ޖަވާބު ދެމުން މަސްކް ބުނެފައިވަނީ "މާ ގިނަ ގޭމް ސްޓޫޑިއޯތައް ބޮޑެތި ކޯޕަރޭޝަންތަކުގެ މިލްކިއްޔާތުގައި ހުރީ" ކަމަށެވެ. އަދި އެކްސް އޭއައިއިން އަވަހަށް އޭއައި ގޭމް ސްޓޫޑިއޯއެއް ހުޅުވައި "ގޭމްތައް އަލުން މޮޅުކުރާނެ" ކަމަށް ބުނެފައިވެއެވެ.
ގޭމިން ދާއިރާގައި އޭއައިގެ ޤާބިލުކަން ވަނީ މި ސެކްޓާގައި މަސައްކަތްކުރާ ގިނަ ކުންފުނިތަކުގެ ސަމާލުކަން ހޯދާފައެވެ. މިސާލަކަށް، ގޫގުލް ޑީޕްމައިންޑުން ވަނީ ޖީނީ ތަޢާރަފުކޮށްފައެވެ. މިއީ ޕްރެޑިކްޓިވް އެނަލިސިސް ބޭނުންކޮށްގެން ނުހުއްޓި 2ޑީ ޕްލެޓްފޯމާ ވީޑިއޯ ގޭމްތައް އުފެއްދޭ އޭއައި މޮޑެލްއެކެވެ.
މީގެ އިތުރުން ޑީޕްމައިންޑްއިން ވަނީ ސްކޭލަބަލް އިންސްޓްރަކްޓަބަލް މަލްޓިވޯލްޑް އޭޖެންޓް (ސިމާ) ވެސް ތަޢާރަފުކޮށްފައެވެ. މިއީ އެކި ބާވަތުގެ ގޭމިން މާހައުލުތަކާ ގުޅުން ބޭއްވޭ އަދި 3ޑީ ވީޑިއޯ ގޭމްތަކުގައި އެކި މަސައްކަތްތައް ކުރެވޭ އޭއައި ސިސްޓަމެކެވެ.
ގޭމް ސްޓޫޑިއޯތައް ބޮޑެތި ކޯޕަރޭޝަންތަކުގެ މިލްކިއްޔާތުގައި ހުރުމާ ގުޅޭ ގޮތުން މަސްކް ދެއްކި ވާހަކަތައް އައިސްފައިވަނީ، ސޮނީން އެލްޑަން ރިންގް ޑިވެލޮޕާ ފްރޮމްސޮފްޓްވެއާ މިލްކުކުރާ ޖަޕާނުގެ ޓެކް ކުންފުނި ކަޑޮކަވާ ގަތުމަށް ރާވާ ކަމަށް ބުނާ ރިޕޯޓެއް ނެރުންތާ ދުވަސްކޮޅެއްގެ ތެރޭގައެވެ.
މީގެ އިތުރުން، ޔަޤީންކަމާއެކު ބުނެވޭ ގޮތުގައި މައިކްރޯސޮފްޓްއިން ވަނީ ފާއިތުވި އަހަރު ކޯލް އޮފް ޑިއުޓީ، ވޯލްޑް އޮފް ވޯކްރާފްޓް އަދި ޑިއަބްލޯ ފަދަ ގޭމްތައް ޝާއިޢުކުރާ އެކްޓިވިޝަން ބްލިޒާޑް ގަތުމުގެ މަސައްކަތް ނިންމާފައެވެ.
މަސްކް އެކްސް އޭއައިއާ ބެހޭ ގޮތުން ދެއްކި ވާހަކަތަކުން، ފަހަކަށް އައިސް ނެރެފައިވާ ރިޕޯޓުތަކުގައި ބުނާ ކަންތައްތަކަށް އަލިއަޅުވާލެވެއެވެ. އެ ރިޕޯޓުތަކުގައި ބުނާ ގޮތުގައި މަސްކްގެ އޭއައި ކުންފުންޏާ މެދު ވަރަށް ބޮޑެތި އުންމީދުތަކެއް ކުރެއެވެ. އަދި ކުންފުނީގެ ދާއިރާ ފުޅާކޮށް އާމްދަނީ އިތުރުކުރަން ބޭނުންވެއެވެ.
ރިޕޯޓުތަކުގައި އިތުރަށް ބުނާ ގޮތުގައި މި ކުންފުނިން ވަކިން ހިންގޭ ޗެޓްޖީޕީޓީ އާ އެއްގޮތް އެޕެއް، ކުރިއަށް އޮތް މަހު ތަޢާރަފުކުރުމަށް ރާވަމުން ދެއެވެ.