ފެހުރިހި ބަލަން މޫދަށް އެރި އުޅޭއިރުގައި، ފެހުރިހީގައި އަތްލުން މަނާކޮށް، އަމަލު ކުރަން ޖެހޭ ގޮތުގެ ތަފްސީލީ ގަވައިދެއް މިއަދު ސަރުކާރުން ގެޒެޓުކޮށްފިއެވެ.
އެގޮތުން، ސަރުކާރުން މިއަދު ގެޒެޓުކޮށްފައި ވަނީ ގުދުރަތީ ގޮތުން ނުވަތަ ތަބީއީ ގޮތުން ހިމާޔަތްކޮށް ރައްކާތެރިކުރާ ދިރޭތަކެއްޗާ ބެހޭ ގަވައިދުގެ ޖަދުވަލު ހައެއްގެ ފަހަތަށް ބ. ގެ ގޮތުގައި އިތުރުކޮށްފައިވާ އަކުރެކެވެ. އެ ގަވާއިދަށް އަމަލު ކުރަން ފަށާނީ ގެޒެޓުކުރާތާ ތިން މަސް ދުވަސް ފަހުންނެވެ.
އެ ގަވައިދުގައި ވަނީ ފެހުރިއްސާ މެދު އަމަލު ކުރަން ޖެހޭ ގޮތް ވަރަށް ތަފްސީލުކޮށް ބަޔާންކޮށްދީފައެވެ. އޭގެތެރޭގައި، ގަވައިދާ ޚިލާފު ނުވަތަ ކުރުން މަނާ ކަންތައްތަކެއް ހިމެނޭއެވެ.
ފެހުރިހީގެ ކައިރިން ފީނާއިރު ބަހައްޓަން ޖެހޭ ދުރުމިން ----
ގަވާއިދުގައި ބުނެފައިވާ ބައެއް ކަންތައްތައް:
- ފެހުރިއްސާ ތިން މީޓަރަށް ވުރެ ކައިރި ނުވުން.
- ފެހުރިހީގެ ނިގޫކޮޅާ ދިމާލުން ހަތަރު މީޓަރަށް ވުރެ ކައިރި ނުވުން
- ފެހުރިހީގެ އުރަހައިގައި ހިފަހައްޓައިގެން ފެތުން ނުވަތަ ފީނުން މަނާ
- ފެހުރިހީގެ މަތިން ފީނާ ނަމަ، މަދުވެގެން 20 މީޓަރުގެ ދުރުމިނެއް ބެހެއްޓުން
- ފެހުރިއްސަށް ކާން ދިނުން މަނާ ކުރުން
- ފްލޭޝް ބޭނުންކޮށްގެން ފޮޓޯ ނެގުން މަނާކުރުން
- ރޭގަނޑު ދިއްލައިގެން ފެހުރިހި ތިލަކޮށްގެން ނުބެލުން
- ފެހުރިހީގެ ޑްރޯން ފޮޓޯ ނެގުމުގައި މޫދު ލޮނުގަނޑުން ފެށިގެން 30 މީޓަރަށްވުރެ ތިރިން ޑްރޯން އުދުއްސުން މަނާ
- ފެހުރިހި އުޅޭ ހިސާބުގައި ވޯޓާ ސްޕޯޓް މީހުންނާއި ފީނާ މީހުން ނޫޅުން
އެ ގަވައިދުގައި ވަނީ ފެހުރިހި ފެންނަ ސަރަހައްދުގައި އުޅަނދު ފަހަރު އަމަލު ކުރަން ވީ ގޮތްތައް ވެސް ކިޔައިދީފައެވެ. އެގޮތުން، ފެހުރިހީގެ ގައިމަތިން އުޅަނދުތައް ދުއްވުމަކީ މަނާ ކަމެއް ކަމަށްވާއިރު، ފެހުރިއްސެއް ފެނުމުން އެތަކެތި ދަތުރުކުރާ ދިމާލަށް ހުރަސް ނޭޅުމަށް ބުނެފައިވެއެވެ.
ފެހުރިހީގެ ވަށައިގެންވާ 250 މީޓަރުގެ ކޮންޓެކްޓު ޒޯނުގައި ހަރަކާތްތެރިވެވޭނީ ފަހަރަކު ތިން އުޅަނދަށެވެ. އެ ޒޯނުގެ ތެރޭގައި ފަސް ނޮޓަށްވުރެ ބާރަށް ދުއްވުން މަނާކޮށްފައިވާއިރު، ފެހުރިއްސާ ކައިރިން ދުއްވަން ޖެހޭނީ ދެ ނޮޓަށް ވުރެ މަޑުންނެވެ.
ފެހުރިހި ބަލަން ކޮންޓެކްޓު ޒޯނަށް ފޭބޭނީ އުޅަނދަކުން ބާރަ މީހުންނަށް ކަމަށާއި ކޮންމެ މީހަކަށް މޫދުގައި އޮވެވޭނީ 15 މިނެޓު ވަންދެން ކަމަށް ގަވައިދުގައި ބުނެފައިވެއެވެ.
ފާހަގަކޮށްލެވޭ ގޮތުގައި، މިކަންތައްތަކުގެ އިތުރުން ފެހުރިއްސާ މެދު އަމަލުތައް ބަހައްޓަންވީ ގޮތުގެ ގިނަ ކަންތައްތަކެއް އެ ގަވައިދުގައި ބަޔާންކޮށްފައިވެއެވެ.
ފެހުރިހި ބެލުމަކީ ރާއްޖެ އަންނަ ފަތުރުވެރިންގެ ބެދުގައި މަގުބޫލު ހަރަކާތެކެވެ. އަދި ފެހުރިއްސާއެކު ފޮޓޯނެގުމަކީ ރާއްޖޭގައި އާންމުކަމެކެވެ.
ފެހުރިއްސަކީ ރާއްޖޭގައި ހިމާޔަތްކޮށްފައިވާ ބާވަތެއްގެ މަހަކަށްވާއިރު، ހިމާޔަތްކޮށްފައިވާ ދިރުންތަކާއި އެތަކެތި އުޅޭ މާހައުލަށް ނޭދެވޭ އަސަރު ކުރާ ގިނަ ކަންތައްތައް ތަކުރާރުކޮށް ފެންނަ މިންވަރު އަހަރަކަށް ވުރެ އަހަރެއް އިތުރުވަމުން އަންނަ ކަމަށް އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ)އިން އިއްޔެ ވަނީ ބުނެފައެވެ.