ޕާކިސްތާނުގެ މަޝްހޫރު ފިލްމީ ތަރި ފަވާދު ޚާން ބޮލީވުޑްގެ ފިލްމުތަކުން ވަރަށް އަވަހަށް ފެންނާނެކަމުގެ ޚަބަރުތައް ދެކެވޭތާ މިހާރު ދުވަސްތަކެއް ވެއްޖެއެވެ.
ފިލްމީ ޚަބަރުތައް ގެނެސްދޭ ނޫސްތަކުގައި ބުނެފައިވާގޮތުން ފަވާދު ބޮލީވުޑަށް އެނބުރި އަންނަ ފިލްމުގެ ނަމަކީ "އަބީރު ގުލާލް"އެވެ. ބޮލީވުޑްގެ ފިލްމުތަކާ ދުރުގައި އަށް އަހަރު ވަންދެން އުޅުމަށްފަހު ފަވާދު ސޮއިކުރި ފުރަތަމަ ބޮލީވުޑްގެ ފިލްމުގެ ބަތަލާގެ ރޯލްއިން ފެންނާނީ ވާނީ ކަޕޫރެވެ.
މި ފިލްމުގެ ޝޫޓިންގް މިދިޔަ ސެޕްޓެމްބަރު މަހު ފަހުކޮޅު އިންގިރޭސިވިލާތުގެ ލަންޑަންގައި ފަށާފައިވާ ކަމަށް ވެސް ރިޕޯޓުތައް ބުނެއެވެ. ވާނީ ކަޕޫރާ އެކު ފަވާދު ޚާން ފުރަތަމަ ފަހަރަށް ސްކްރީން ހިއްސާކުރާ މި ފިލްމަކީ ވަރަށް ރީތި ލޯބީގެ ހެއްވާ މަޖާ ހާދިސާތައް ދައްކުވައިދޭނެ ފިލްމެކެވެ.
ވާނީ އާއި ފަވާދުގެ އިތުރުން ފިލްމުގެ ވަރަށް ހާއްސަ ރޯލަކުން ޓެލެވިޒަން ބަތަލާ ރިދީ ޑޮގްރާ އަދި މަޝްހޫރު މޮޑެލް އަދި ނެށުންތެރިޔާ މަލައިކާ އަރޯރާ ވެސް ފެންނާނެ ކަމަށް ރިޕޯޓުތައް ބުނެއެވެ. މިއީ ވަރަށް ގިނަ ދުވަސްތަކަކަށްފަހު މަލައިކާ ފިލްމަކުން ފެންނާނެ ފުރަތަމަ ފަހަރެވެ.
ފަވާދު ޚާންގެ ބޮލީވުޑް ފިލްމުން ފެންނާނެ ބައެއް ތަރިން--ފޮޓޯ/ބޮލީވުޑްހަންގާމާ
މަޝްހޫރު ފިލްމީ ޕްރޮޑިއުސަރުން ކަމަށްވާ ވިވެކް އަގަރުވާލް، އަވަންތިކާ ހަރީ އަދި ރާކޭޝް ސިއްޕީ ޕްރޮޑިއުސްކުރާ މި ފިލްމުގެ ޑައިރެކްޓަރަކީ ކާކުކަމެއް މިހާތަނަށް ހާމަކޮށްފައެއް ނުވެއެވެ.
ލަންޑަންގައި ކުރިއަށްގެންދާ ޝޫޓިންގް ޝެޑިއުލް ނިންމުމަށްފަހު ފިލްމުގެ ބައެއް އިންޑިއާގެ މުމްބާއީގައި ވެސް ކުރިއަށްދާނެ ކަމަށް ފިލްމީ ޚަބަރުތައް ބުނެއެވެ. މިހާތަނަށް ބޮލީވުޑްގެ ތިން ފިލްމަކުން ފެނިފައިވާ ފަވާދަކީ ޕާކިސްތާނުގެ އެންމެ އަގު ބޮޑު އެއް ފިލްމީ ތަރިއެވެ.