ޝަނާޔާ ފުރަތަމަ ބޮލީވުޑް ފިލްމު އެކްޓަރު ވިކްރާންތު މަސޭއާއެކު

އެކްޓަރު ވިކްރާންތު މަސޭ އަދި ޝަނާޔާ ކަޕޫރު--ފޮޓޯ/ބޮލީވުޑްހަންގާމާ

ކުރީގެ މަޝްހޫރު އެކްޓަރު ސަންޖޭ ކަޕޫރުގެ އަންހެން ދަރިފުޅު ޝަނާޔާ ބޮލީވުޑަށް ނެރޭނީ އެކްޓަރު ވިކްރާންތު މަސޭއާ އެކު ކުޅޭ ފިލްމަކުން ކަމަށް ރިޕޯޓުތައް ބުނެފިއެވެ.

މި ފިލްމަކީ ލިޔުންތެރިޔާ ރަސްކިން ބޮންޑް ލިޔެފައިވާ ކުރު ލޯބީގެ ފިލްމެއްގެ މައްޗަށް ބިނާކޮށް އުފައްދާ ފިލްމެކެވެ. "އާންކޯންކީ ގުސްތާންކިޔާ"ގެ ނަމުގައު އުފައްދާ މި ފިލްމު ޑައިރެކްޓްކުރާނީ މަގުބޫލު ވެބް ސީރީސްތައް ކަމަށްވާ "ބްރޯކެން ބަޓް ބިއުޓިފުލް" އަދި "އަޕާހަރަން" ގެނެސްދިން ސަންތޯޝް ސިންގްއެވެ.

ލޯފަން މިއުޒީޝަނަކާ ސްޓޭޖް ތަމްސީލުތައް ހުށަހަޅައިދޭ ފަންނާނެއްގެ މެދުގައި އުފެދޭ ހާއްސަ ގުޅުމުގެ މައްޗަށް ބިނާކޮށް އުފައްދާ މި ފިލްމުގެ ޝޫޓިން މި މަހު ފަހުކޮޅު ފަށަން ވަނީ ނިންމާފައިވާއިރު ފިލްމުގެ ވަރަށް ބޮޑު ބައެއްގެ މަންޒަރު ނަގަން ހަމަޖެހިފައި ވަނީ ޔޫރަޕްގެ ޤައުމުތަކުގައެވެ.

ޝަނާޔާ ކަޕޫރު އާއިލާއާ އެކު--ފޮޓޯ/ބޮލީވުޑްހަންގާމާ
ޝަނާޔާ އެންމެ ފުރަތަމަ ބޮލީވުޑަށް ތަޢާރަފްކުރާނެކަން އިއުލާނުކުރީ ދަރުމާ ޕްރޮޑަކްޝަންސްއިންނެވެ. ދަރުމާއިން 2021 ވަނަ އަހަރު އިއުލާނުކުރި ފިލްމު "ބޭދަޅަކް"އިން ޝަނާޔާއާ އެކު ޒުވާން ދެ ތަރިން ކަމަށްވާ ލަކްޝް ލަލްވާނީ އަދި ގުރްޕަތޭ ޕިރްޒާދާ ވެސް ބޮލީވުޑަށް ނެރޭނެކަމަށް ދަރުމާއިން އޭރު އިއުލާނުކުރިއެވެ.

ނަމަވެސް ފަހުން އެ ފިލްމުގެ މަސައްކަތް ހުއްޓި ޝަނާޔާ ފިލްމު އިންޑަސްޓްރީއަށް ނެރުން ވަނީ ވަރަށް ބޮޑަށް ލަސްކުރެވިފައެވެ.

މަޝްހޫރު ފިލްމީ ތަރިން ކަމަށްވާ އަރުޖުން ކަޕޫރު، ސޯނަމް ކަޕޫރު އަދި ޖާންވީ ކަޕޫރުގެ ދެބެއިންގެ ދެދަރި ޝަނާޔާ ވަނީ ބައެއް އިޝްތިހާރުތަކުން ވެސް ފެނިފައެވެ.

ޝަނާޔާ ފިލްމު އިންޑަސްޓްރީއަށް ނުކުންނަން ތައްޔާރުވަމުން އަންނައިރު އޭނާގެ އެންމެ ގާތް އެކުވެރިން ކަމަށްވާ ސުހާނާ ޚާން އަދި އަނަނިޔާ ޕާންޑޭގެ ފިލްމީ ކެރިއަރު ވަނީ މާކުރިން ފެށިފައެވެ.

comment ކޮމެންޓް