ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާއިން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ގަތްކަމަށް ތުހުމަތުކުރާ ދެ އެޕާޓްމަންޓް ފުލުހުންނަށް ހަވާލުކުރަން އިތުރު ވަގުތު ދިނީ އިންސާނީ ކަރާމާތަށް ރިއާޔަތްކުރުމަށްފަހުގައި ކަމަށް ފުލުހުން މިއަދު ބުނެފިއެވެ.
އެޕާޓްމަންޓު ހަވާލުކުރުމަށް އެދި ފުލުހުން ފޮނުވި ނޯޓިސްގައިވަނީ އިއްޔެގެ ކުރިން އެ އެޕާޓްމަންޓުތައް ހަވާލުކުރުމަށެވެ. އަދި އިއްޔެގެ ކުރިން އެ ދެ އެޕާޓްމަންޓް ފުލުހުންނާ ހަވާލު ނުކޮށްފިނަމަ، ފުލުހުންގެ ބެލުމުގެ ދަށަށް އެ ތަންތަން ނަގާނެ ކަމަށް އެ ނޯޓިސްގައިވެއެވެ.
ނަމަވެސް، ބައްސާމުގެ ވަކީލުގެ ފަރާތުން އިއްޔެ ފޮނުވި ސިޓީއެއްގައި ވަނީ އެޕާޓްމަންޓު ހަވާލުކުރުމުގެ މުއްދަތި މި މަހުގެ 31ގެ ނިޔަލަށް އިތުރުކޮށްދިނުމަށް އެދިފައެވެ.
އެގޮތުން، ހާލަތަށް ރިއާޔަތްކޮށް އެޕާޓްމަންޓު ހަވާލުކުރުމަށް ދިން މުއްދަތު މިމަހުގެ ނިޔަލަށް އިތުރުކޮށްފައި ވާކަން ބައްސާމަށް ލިޔުމުން އަންގާފައިވާ ކަމަށް ފުލުހުން އިއްޔެ ބުންޏެވެ.
މިއަދު އެކަމުގެ އިތުރު ތަފްސީލް ހާމަކުރަމުން ފުލުހުން ބުނީ ފުލުހުންގެ މައްޗަށް ކޯޓުން ކުރި އަމުރުގައި އިންސާނީ ކަރާމާތަށް ހުރުމަތްތެރިކޮށް ހިތަން އަމުުރުކޮށްފައިވާކަމަށެވެ.
އެޕާޓްމަންޓުތަކަކީ ކުޑަކުދިންނާއި ބޮޑެތި މީހުން ވެސް ދިރިއުޅޭ އެޕާޓްމަންޓުތަކަކަށް ވާތީ އެ ކަމަށް ރިއާޔަތްކޮށް އިތުރު ވަގުތު ދިނީކަމަށް ފުލުހުން ބުންޏެވެ.
ކޮވިޑު ތެރޭގައި ކްލަބްތަކަށް ފައިސާ ދޫކުރަން އެފްއޭއެމަށް ދިން ފައިސާ ބޭނުންކޮށްގެން ބައްސާމް އަދީލް، އަމީން އެވެނިއުއިން ދެ ފުލެޓު ގަތްކަމަށް ތުހުމަތުކުރެވޭ މައްސަލައިގައި ދައުވާކުރަން ވެސް ވަނީ ޕްރޮސެކިއުޓާ ޖެނެރަލް (ޕީޖީ)އަށް ފޮނުވައިފައެވެ.
ބައްސާމަށް ތުހުމަތުކުރެވޭ ކޮރަޕްޝަންގެ ގިނަ މައްސަލަތަކެއް ފުލުހުން އަންނަނީ ތަހުގީގުކުރަމުންނެވެ.