އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް އެމްބަސީތަކުގެ ކައިރީގައި އަޑުއުފުލަމުން ދަނިކޮށް، ދީނީ ޢިލްމުވެރިޔާ ޑރ. އަޙުމަދު އިޔާޒުގެ އަނބިކަނބަލުން އާއިޝަތު ޝާދިޔާ ބަންދުކުރި މައްސަލައިގައި ބަދަލު ނަގައިދޭން އޭނާގެ ފަރާތުން ހައިކޯޓުގައި މިއަދު އެދެފިއެވެ.
ކްރިމިނަލް ކޯޓުން ޝާދިޔާ ފަސް ދުވަހަށް ބަންދު ކުރުމަށް ކުރި އަމުރުގެ ކުރިން، އޭނާ ތިން ދުވަހަށް ބަންދު ކުރުމަށް އަމުރުކުރިއެވެ. އެ ދެ އަމުރު ވެސް ހައިކޯޓުގައި އިސްތިއުނާފު ކޮށްފައިވެއެވެ.
ގާނޫނާ ޚިލާފަށް މީހަކު ބަންދުގައި ގެންގުޅެފިނަމަ، އެ ކަމުގެ ބަދަލު ދޭންޖެހޭނެ ކަމަށް ގާނޫނު އަސާސީގައި ކަނޑައަޅާފައިވެއެވެ.
އޭނާގެ ފަރާތުން ހައިކޯޓުގައި އެދިފައިވަނީ، އޭނާ ބަންދުކުރުމަށް ކުރި އަމުރުގެ ދަށުން ބަންދުގައި ބަހައްޓާފައިވަނީ ގާނޫނާ ޚިލާފަށް ކަމަށް ކަނޑައަޅައިދީ، އަދި އެ ކަމުގެ ބަދަލު ދިނުމަށް ދައުލަތުގެ އިދާރާތަކުގެ މައްޗަށް އަމުރުކޮށްދިނުމަށެވެ.
މި މައްސަލައިގައި ޝާދިޔާގެ ފަރާތުން ކޯޓުގައި ފާހަގަކޮށްފައިވާ ކަންކަމުގެ ތެރޭގައި:
- އޭނާ ހައްޔަރުކޮށްފައިވަނީ އެއްވެ އުޅުމުގެ ގާނޫނާ ޚިލާފަށްކަން
- އޭނާ ހައްޔަރުކޮށްފައިވަނީ ތުހުމަތު ކުރެވޭ ކުށަށް ބާރުދޭ އެއްވެސް ހެއްކެއް ނެތިކަން
- އޭނާއަކީ މުޖުތަމައުގެ ސަލާމަތަށް ނުރައްކަލެއް ކަމަށް ކަނޑައަޅާފައިވަނީ ޖިނާއީ އިޖުރާއަތުގެ ގަވާއިދާ ޚިލާފަށްކަން
- އޭނާ ބަންދުކޮށްގެން ގެންގުޅެފައިވަނީ ގާނޫނާ ޚިލާފަށް ކޮށްފައިވާ އަމުރެއް ތަންފީޒު ކުރުމުގެ ގޮތުންކަން
މި މައްސަލައިގައި ދައުލަތުން ފާހަގަކޮށްފައިވާ ބައެއް ކަންކަމުގެ ތެރޭގައި:
- ޝާދިޔާ ހައްޔަރުކޮށްފައިވަނީ ފުލުހުންގެ އަމުރަށް ނުކިޔަމަންތެރިވެގެންކަން
- ގާނޫނު ނޭނގުމަކީ ކުށަކަށް އަރައިގަންނަން އޮންނަ ހުއްޖަތެއް ނޫންކަން
- ކާނިވާ ސަރަހައްދުގައި ނޫނީ އެއްވުންތައް ނުބޭއްވޭނެ ކަމަށް ހޯމް މިނިސްޓްރީން އަންގައި އިއުލާންކޮށްފައިވާކަން
މި މައްސަލައިގައި ފުލުހުން އަމަލުކޮށްފައިވަނީ ގާނޫނަށް އެއްގޮތަށްކަން ދައުލަތަށް މިއަދުގެ އަޑުއެހުމުގައި ސާބިތުކޮށެއް ނުދެވުނެވެ.
މިއަދުގެ އަޑުއެހުން ނިންމައިލީ، މި މައްސަލައިގައި އިތުރު ކަމެއް ސާފުކުރަން ނެތިއްޖެނަމަ، ދެން އޮންނާނީ ހުކުމް ކުރުމުގެ މަޖިލިސްކަން އިއުލާން ކުރައްވަމުންނެވެ.