ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާއިން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ގަތްކަމަށް ތުހުމަތުކުރާ ދެ އެޕާޓްމަންޓް ފުލުހުންނަށް ހަވާލުކުރުމަށް ދިން މުއްދަތު އިތުރުކޮށްފިއެވެ.
އެޕާޓްމަންޓު ހަވާލުކުރުމަށް އެދި ފުލުހުން ފޮނުވި ނޯޓިސްގައިވަނީ މިއަދުގެ ކުރިން އެ އެޕާޓްމަންޓުތައް ހަވާލުކުރުމަށެވެ. އަދި މިއަދުގެ ކުރިން އެ ދެ އެޕާޓްމަންޓް ފުލުހުންނާ ހަވާލު ނުކޮށްފިނަމަ، ފުލުހުންގެ ބެލުމުގެ ދަށަށް އެ ތަންތަން ނަގާނެ ކަމަށް އެ ނޯޓިސްގައިވެއެވެ.
ނަމަވެސް، ބައްސާމުގެ ވަކީލުގެ ފަރާތުން މިއަދު ފޮނުވި ސިޓީއެއްގައި ވަނީ އެޕާޓްމަންޓު ހަވާލުކުރުމުގެ މުއްދަތި މިމަހުގެ 31ގެ ނިޔަލަށް އިތުރުކޮށްދިނުމަށް އެދިފައެވެ.
އެގޮތުން، ހާލަތަށް ރިއާޔަތްކޮށް އެޕާޓްމަންޓު ހަވާލުކުރުމަށް ދިން މުއްދަތު މިމަހުގެ ނިޔަލަށް އިތުރުކޮށްފައި ވާކަން ބައްސާމަށް ލިޔުމުން އަންގާފައިވާ ކަމަށް ފުލުހުން ބުންޏެވެ.
ކޮވިޑު ތެރޭގައި ކްލަބްތަކަށް ފައިސާ ދޫކުރަން އެފްއޭއެމަށް ދިން ފައިސާ ބޭނުންކޮށްގެން ބައްސާމް އަދީލް، އަމީން އެވެނިއުއިން ދެ ފުލެޓު ގަތްކަމަށް ތުހުމަތުކުރެވޭ މައްސަލައިގައި ދައުވާކުރަން ވެސް ވަނީ ޕްރޮސެކިއުޓާ ޖެނެރަލް (ޕީޖީ)އަށް ފޮނުވައިފައެވެ.
ބައްސާމަށް ތުހުމަތުކުރެވޭ ކޮރަޕްޝަންގެ ގިނަ މައްސަލަތަކެއް ފުލުހުން އަންނަނީ ތަހުގީގުކުރަމުންނެވެ.