ގަވާއިދާ ޚިލާފަށް ރާއްޖެ ގެންނަ ދިރޭތަކެތި އަނބުރައި ފޮނުވައިލަންޖެހޭނަމަ، ނުވަތަ ނައްތައިލަންޖެހޭ ނަމަ، އެ ތަކެތި އެތެރެކުރި ފަރާތުން ހަތް ދުވަހުގެ ތެރޭގައި އެ ކަމުގެ ޒިންމާ އުފުލަންޖެހޭ ގޮތަށް ގަވާއިދު އިސްލާހުކޮށްފިއެވެ.
"ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގުވާމީ ވިޔަފާރި ކޮންޓްރޯލްކުރުމުގެ ގާނޫނު"އާ ޚިލާފަށް ވިޔަފާރިކުރެވޭ ތަކެއްޗާއި ގެންގުޅޭ ތަކެތި ނެގުމާއި ނައްތައިލުމާގުޅޭ ގަވާއިދަށް މި އިސްލާހު ގެނެސް، އެއަށް އަމަލު ކުރަން ފަށާފައިވަނީ މިއަދުން ފެށިގެންނެވެ.
އެ ގަވާއިދަށް ގެނެސްފައިވާ އިސްލާހުގައިވާ ގޮތުން ގަވާއިދާ ޚިލާފަށް ގެންނަ ދިރޭ ތަކެއްޗާމެދު އަމަލު ކުރުމަށް މެނޭޖްމަންޓް އޮތޯރިޓީން ނިންމާ ނިންމުމަކީ، އެ އެއްޗެއް ގެނައި ގައުމަކަށް ނުވަތަ ރެސްކިއު ސެންޓަރަކަށް ނުވަތަ އެކަށީގެންވާ ފެސިލިޓީއަކަށް ފޮނުވައިލުން ކަމަށްވާ ނަމަ، އެ ކަމުގެ ޚަރަދާއި އެހެނިހެން ހުރިހާ އިންތިޒާމެއް، އެ އެއްޗެއް ގެނައި ފަރާތަކުން ހަތް ދުވަހުގެ ތެރޭގައި ހަމަޖައްސަން ޖެހެއެވެ.
އަދި ގަވާއިދާ ޚިލާފަށް ގެންނަ ދިރޭތަކެއްޗެއް އިންސާނިއްޔަތުކަމާ އެކު މަރައިލަން މެނޭޖްމަންޓް އޮތޯރިޓީން ނިންމައިފިނަމަ، އެ ޚަރަދަކަށް ވެސް ޒިންމާވާންޖެހެނީ އެ ތަކެތި އެތެރެކުރި ފަރާތަކުންނެވެ.
މީގެ ކުރިން އަމަލު ކުރަމުން އައި ގަވާއިދުގެ ދަށުން މި ހުރިހާ އިންތިޒާމެއް ހަމަޖައްސަން ޖެހެނީ، އެ އެއްޗެއް އެތެރެކުރި ފަރާތުން ދެ ދުވަހުގެ ތެރޭގައެވެ. މި ގަވާއިދަށް ގެނައި އިސްލާހާ އެކު ގަވާއިދާ ޚިލާފަށް އެތެރެކުރާ ދިރޭތަކެތި ނައްތައިލުން ނުވަތަ ފޮނުވައިލުމުގައި އެ އެއްޗެއް އެތެރެކުރި ފަރާތަކަށް އިތުރު ފަސް ދުވަސް ލިބިގެންދިޔައީއެވެ.