ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާއިން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ގަތްކަމަށް ތުހުމަތުކުރާ ދެ އެޕާޓްމަންޓް ފުލުހުންނަށް ހަވާލުކުރުމަށް އިތުުރު ވަގުތު ދިނުމަށް ބައްސާން އެދިއްޖެއެވެ.
ފުލުހުން ފޮނުވި ނޯޓިސްގައިވަނީ މިއަދުގެ ކުރިން އެ އެޕާޓްމަންޓުތައް ހަވާލުކުރުމަށެވެ. އަދި މިއަދުގެ ކުރިން އެ ދެ އެޕާޓްމަންޓް ފުލުހުންނާ ހަވާލު ނުކޮށްފިނަމަ، ފުލުހުންގެ ބެލުމުގެ ދަށަށް އެ ތަންތަން ނަގާނެ ކަމަށް އެ ނޯޓިސްގައިވެއެވެ.
"ސަން"އިން މިއަދު، ބައްސާމް އެ އެޕާޓްމަންޓްތައް ފުލުހުންނާ މިހާރު ހަވާލުކޮށްފައިވޭތޯ ޔަގީންކުރުމަށް ސުވާލުކުރުމުން ފުލުހުން ބުނީ ބައްސާމް އެދިފައިވަނީ އެޕާޓްމަންޓްތައް ހަވާލުކުރުމަށް އިތުރު ވަގުތު ދިނުމަށް ކަމަށެވެ.
އެގޮތުން އޭނާގެ ވަކީލުންގެ ފަރާތުން ފޮނުވި ސިޓީއެއްގައި، މި މަހު 31އާ ހަމައަށް އިތުރު ވަގުތު ދިނުމަށް އެދިފައިވާކަމަށް ފުލުހުން ބުންޏެވެ.
އެއާއެކު ފުލުހުން އެ ކަމުގައި ޖަވާބެއް ދިނުމަށް ތައްޔާރުވަމުން އަންނަކަމަށް ވެސް ވަނީ ބުނެފައެވެ.
ކޮވިޑު ތެރޭގައި ކްލަބްތަކަށް ފައިސާ ދޫކުރަން ދިވެހި އެފްއޭއެމަށް ދިން ފައިސާ ބޭނުންކޮށްގެން ބައްސާމް އަދީލް، އަމީން އެވެނިއުއިން ދެ ފުލެޓު ގަތްކަމަށް ތުހުމަތުކުރެވޭ މައްސަލައިގައި ދައުވާކުރަން ވެސް ވަނީ ޕްރޮސެކިއުޓާ ޖެނެރަލް (ޕީޖީ)އަށް ފޮނުވައިފައެވެ.
ބައްސާމަށް ތުހުމަތުކުރެވޭ ކޮރަޕްޝަންގެ ގިނަ މައްސަލަތަކެއް ފުލުހުން އަންނަނީ ތަހުގީގުކުރަމުންނެވެ.