ބޭރު ފައިސާއާ ބެހޭ ގަވާއިދާއި މަނީ އެކްސްޗޭންޖްގެ ގަވާއިދަށް މަރުކަޒީ ބޭންކް، އެމްއެމްއޭއިން މި ފަހުން ގެނައި ބަދަލުތަކާ އެކު ފަތުރުވެރިކަމުގެ ސިނާއަތް އިތުރަށް ފުޅާކުރަން ބޭނުންވާ ބޮޑެތި ލޯނުތައް ދިވެހި ބޭންކިން ނިޒާމުގެ ތެރެއިން ދޭން މަގުފަހިވާނެ ކަމަށް ޑެޕިއުޓީ ގަވަރުނަރު އަހުމަދު އިމާދު ވިދާޅުވެއްޖެއެވެ.
އެމްއެމްއޭއިން ވަނީ ބޭރު ފައިސާއާ ބެހޭ ގަވާއިދާއި މަނީ އެކްސްޗޭންޖްގެ ގަވާއިދަށް ބޮޑެތި ބަދަލުތަކެއް ގެނެސްފައެވެ.
ސަންގެ މި ހަފުތާގެ 'އެޑިޓަރުގެ ސުވާލު' ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކަފުޅުގައި އިމާދު ވިދާޅުވީ، ރާއްޖޭގެ ބޭންކިން ނިޒާމުގެ ތެރެއަށް ވަންނަ ޑޮލަރު ނުވަތަ ބޭރު ފައިސާ އިތުރުވީމާ ދިވެހި ބޭންކިން ނިޒާމުގެ ތެރެއިން އިތުރަށް ލޯނު ހޯދަން މަގުފަހިވާނެ ކަމަށެވެ.
އެއީ، ރިސޯޓުތަކާއި ފަތުރުވެރިކަމުގެ ސިނާއަތަށް އިންވެސްޓްކުރާ ގިނަ ބައެއްގެ ކަންބޮޑުވުމެކެވެ.
ފަތުރުވެރިކަމުގެ ސިނާއަތް، ޚާއްސަކޮށް ރިސޯޓުތައް ތަރައްގީކޮށް، ފުޅާކުރަން އެތައް ބިލިއަން ޑޮލަރެއް ބޭނުންވެއެވެ. އެ ކަންކަމަށް ފައިސާ ހޯދަން ދިވެހި ވިޔަފާރިވެރިން ބޭރުގެ ބޭންކްތަކަށް ބަރޯސާވާން ޖެހެނީ އެ އަދަދުތަކުން ލޯނު ދޫކުރުމުގެ ފެންވަރު ދިވެހި ބޭންކްތަކުގައި ނުހުންނާތީއެވެ.
ޑެޕިއުޓީ ގަވަރުނަރު އަހުމަދު އިމާދު: އޭނާ ވިދާޅުވީ އާ ގަވާއިދާ އެކު ފަތުރުވެރިކަމަށް ބޭނުންވާ ލޯނު ދޫކުރަން ބޭންކްތަކަށް މަގުފަހިވާނެ ކަމަށް -- ފޮޓޯ/ އެމްއެމްއޭ
އެކަމަކު، އެމްއެމްއޭއިން ގަވާއިދަށް ގެނައި ބަދަލާ އެކު މި ކަން ބަދަލުވާނެ ކަމަށް ޑެޕިއުޓީ ގަވަރުނަރު ގަބޫލުކުރައްވައެވެ.
"އޭގެ މާނައަކީ އަޅުގަނޑުމެންގެ ބޭންކިން ނިޒާމުގައި ދައުރުވާ ބޭރު ފައިސާގެ މިންވަރު އިތުރުވާ ކަމަށްވެއްޖިއްޔާ އަޅުގަނޑުމެންގެ ބޭންކިން ސެކްޓާ ތެރެއިން ފަތުރުވެރިކަމުގެ އެކްސްޕެންޝަނަށް ފުރުސަތު އޮންނާނެ،" އޭނާ ވިދާޅުވިއެވެ.
އިމާދު ވިދާޅުވީ، މަނީ އެކްސްޗޭންޖްގެ ގަވާއިދަށް ގެނައި ބަދަލާ އެކު ވެސް ބޮޑެތި ބަދަލުތަކެއް އަންނާނެ ކަމަށެވެ. އެ ގޮތުން، އެ ބަދަލާ އެކު ބޭރު ފައިސާގެ ބާޒާރަށް ހެޔޮ ބަދަލެއް އައުން އެކަށީގެންވާ ކަމަށް އޭނާ ވިދާޅުވިއެވެ.
މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ތަފާސްހިސާބުތަކުން ދައްކާ ގޮތުގައި، ފާއިތުވީ ފަސް އަހަރު، ފަތުރުވެރިކަމުން އަހަރަކު ގާތްގަނޑަކަށް ހަތަރު ބިލިއަނެއްހާ ޑޮލަރު ލިބުނެވެ. އެކަމަކު، އެ ފައިސާގެ ބޮޑު ބައެއް ޖަމާކުރަނީ ބޭރުގެ ބޭންކްތަކަށެވެ. އެއީ، ދިވެހި ބޭންކްތަކަށް ފަތުރުވެރިކަމުގެ ސިނާއަތަށް ބޭނުންވާ ލޯނު ދޫކުރެވެން ނެތީމައެވެ.
އެމްއެމްއޭއިން ގެނައި ބަދަލާ އެކު ފަތުރުވެރިކަމުގެ ދާއިރާއިން ލިބޭ ހުރިހާ އާމްދަނީއެއް ދިވެހި ބޭންކިން ސިސްޓަމަށް ޖަމާކުރަން މަޖުބޫރުވާނެއެވެ.
އެ ގަވާއިދުގައި ވާގޮތުން، ރިސޯޓުތަކަށް ކޮންމެ މަހަކު އަންނަ ކޮންމެ ފަތުރުވެރިއަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު، އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ޖެހެއެވެ. އަދި، ގެސްޓްހައުސްތަކުން ފަތުރުވެރިއަކަށް 25 ޑޮލަރު މާރުކުރަންޖެހެއެވެ.
ފާހަގަކޮށްލެވެ ގޮތުގައި ރަސްމީ ޑޮލަރު ރޭޓަކީ 15.42 ރުފިޔާ ނަމަވެސް، ބޭރު ފައިސާ ލިބުން ދަތިވެ މިހާރު ޑޮލަރު ރޭޓު ހުރީ 18 ރުފިޔާއިން މަތީގައެވެ.