ފުރަތަމަ ޓާމުގެ ބަންދު ނިމި، މާދަމާ ދެވަނަ ޓާމުގެ ކިޔެވުން ފެށޭ އިރު ރާއްޖެއަށް މޫސުން ގޯސްކަމަށް މެޓު އޮފީހުން ބުނެފިއެވެ.
މެޓު އޮފީހުން ވަނީ، ބޯކޮށް ވާރޭވެހުމާއެކު ގުގުރައި، އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކޮށް، ރާއްޖޭގެ ބޮޑު ބަޔަކަށް ހުދު ސަމާލު ނެރެފައެވެ.
ހުދު ސަމާލު ނެރެފައިވަނީ ކ. އަތޮޅުން ފެށިގެން ލ. އަތޮލަށް މިރޭ 21:00އިން 02:00ގެ ނިޔަލަށެވެ.
މެޓުން ބުނީ ރާއްޖޭގެ އެކިހިސާބަށް ވިއްސާރަ ކުރުމާއެކު ގުގުރާނެ ކަމަށެވެ. އަދި މާދަމާ މެންދުރުފަހުން ފެށިގެން ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ.
ހުޅަނގުދެކުނާއި ހުޅަނގުން ގަޑިއަކު އަށް މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް މެޓުން ބުނެއެވެ.
ކަނޑުތައް ވެސް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ލަފާކޮށްފައިވާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައިވަނީ ތިން ފޫޓާއި ހަ ފޫޓާ ދެމެދުގައެވެ.
ވިއްސާރަވެ، ވައިގަދަވާނެ ކަމަށް ލަފާކޮށްފައިވާތީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓުން ވަނީ އިލްތިމާސްކޮށްފައެވެ.
މިހާރު ރާއްޖެއަށް ކުރަމުންދާ ވިއްސާރައިގައި މާލެއަށް ބޯކޮށް ވާރޭވެހި، ބައެއް މަގުތަކުގައި ފެންބޮޑުވުމާ ގުޅިގެން އެމްއެންޑީއެފްގެ ފަޔާ އެންޑް ރެސްކިއު ސާވިސްގެ ސިފައިން ދަނީ ފެންހިންދުމުގެ މަސައްކަތުގައި ހަރަކާތްތެރިވަމުންނެވެ.
މެޓުން މީގެ ކުރިން ބުނެފައިވަނީ މިހާރު ރާއްޖެއަށް ކުރަމުންދާ ވިއްސާރަ އަލިވިޔަސް، މި އަހަރުގެ ޑިސެންބަރާ ހަމައަށް ހުޅަނގު މޫސުން ދެމިގެންދާނެ ކަމަށެވެ.
މީގެ އިތުރުން ވެސް މި އަހަރުގެ ތެރޭގައި އާންމުކޮށް ރާއްޖެއަށް ވާރޭވެހޭ ވަރަށްވުރެން އިތުރަށް ވެހޭނެ ކަމަށް، ހުޅަނގު މޫސުމުގެ ކުރިން ލަފާކޮށްފައިވާނެ ކަމަށް މެޓް އޮފީހުން މައުލޫމާތު ދީފައިވެއެވެ.