ބޯކޮށް ވާރޭވެހި މާލޭގައި ފެންބޮޑުވުމުން ލިބުނު ގެއްލުންތަކާ ގުޅިގެން 32 މީހަކު ވަގުތީ ބޯހިޔާވަހިކަމަށް ބަދަލުކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން މިއަދު ބުނެފިއެވެ.
މާލެއަށް ރެއިން ފެށިގެން ބޯކޮށް ވާރޭވެހުމާ ގުޅިގެން، ގެތަކަށް ފެން ވަދެ ގެއްލުންތައް ދަނީ ލިބެމުންނެވެ.
އެންޑީއެމްއޭއިން އާންމުކޮށްފައިވާ މައުލޫމާތުން ދައްކާ ގޮތުގައި، 31 މީހުން ވަގުތީ ބޯހިޔާވަހިކަމަށް ބަދަލުކޮށްފައިވަނީ އަށް ގޭބިސީއަކުންނެވެ. އެ މީހުންނަށް ބޯހިޔާވަހިކަމާއި ކެއިންބުއިން ހަމަޖައްސައިފައިވަނީ އެއް ދުވަހަށް ކަމަށް ވެސް އެ އޮތޯރިޓީން ބުނެފައިވެއެވެ.
"މި ފަރާތްތަކަށް ވަގުތީ ބޯހިޔާވަހިކަން ހަމަޖެއްސީ ކައްކައި ކައިބޮއެ ހެދުމަށާއި ނިދައި ފާޚާނާ ކުރެވޭނެ ގޮތެއް ނެތުމާއި ވަގުތީ ގޮތުން އެތަންތަނުގައި ދިރިއުޅެވޭނެ ހާލަތެއް ނެތުމުގެ ސަބަބުން،" އެންޑީއެމްއޭއިން ބުންޏެވެ.
މީގެ އިތުރުން ފެން ކޮންޓްރޯލް ކުރުމަށް ސިފައިންނާއި ސިޓީ ކައުންސިލާ ގުޅިގެން 47 ތަނެއްގައި 229 ވެލިބަސްތާ ޖަހައިފައިވާ ކަމަށް އެ އޮތޯރިޓީން ބުންޏެވެ.
މި ދުވަސްވަރަކީ ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރަށް ވުމާއެކު މި ދުވަސްވަރު އާންމުކޮށް ކޮޅިގަނޑުތައް އުފެދޭ ކަމަށް މެޓް އޮފީހުން ބުނެފައިވެއެވެ. އަދި ރާއްޖެއާ ކައިރީގައި ދެ ކޮޅިގަނޑެއް އުފެދިފައިވާތީ، މި ދުވަސްތަކުގައި މޫސުން ގޯސްވާނެ ކަމަށްވެސް މީގެ ކުރިން މެޓް އޮފީހުން ވަނީ ބުނެފައިވެއެވެ.
އެމްއެންޑީއެފުން ވެލި ބަސްތާ ޖަހަނީ: މިހާތަނަށް 47 ތަނެއްގައި 229 ވެލިބަސްތާ ޖަހައިފައިވޭ -- ފޮޓޯ/ އެމްއެންޑީއެފް
މެޓް އޮފީހުން މިއަދު ހާމަކޮށްފައިވާ ރެކޯޑުތަކުން ދައްކާގޮތުން މާލެއަށް 136.5 މިލިމީޓަރުގެ ވާރޭ ވެހިފައި ވާއިރު ދެން އެންމެ ގިނައިން ވާރޭ ވެހިފައި ވަނީ ހުޅުމާލެއަށެވެ. ހުޅުމާލެއަށް 117 މިލިމީޓަރުގެ ވާރޭ ވެހިފައި ވާއިރު ބ. ދަރަވަންދުއަށް ވަނީ 111 މިލިމީޓަރުގެ ވާރޭ ވެހިފައެވެ.
އެމްއެންޑީއެފުން އަންނަނީ މާލޭގައި ފެން ހިންދުމުގެ މަސައްކަތް ކުރަމުންނެވެ.
އެގޮތުން މާލޭގެ ފަސް ސަރަހައްދެއްގައި 16 ޕަމްޕު ބަހައްޓައިގެން، ފެން ހިންދުމުގެ މަސައްކަތް ކުރަމުން އަންނަ ކަމަށް ސިފައިން ބުނެފައިވެއެވެ.