ގިނަ އަދަދެއްގެ ބަނގުރަލާއެކު ހުޅުމާލޭ ތިންވަނަ ފިޔަވަހިން، ރޭ ދެ ބިދޭސީން އަތުލައިގެންފިއެވެ.
މިކަމާ ގުޅުވައި ފުލުހުން ބުނީ، އެމީހުން އަތުލައިގަތީ ގަވާއިދާ ޚިލާފަށް ބަނގުރާ ގެންގުޅުމާއި ބޭނުންކޮށް، އެތަކެތީގެ ވިޔަފާރި ކުރާ ކަމަށް ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލޭ ތިންވަނަ ފިޔަވަހީގެ ކޮންސްރަކްޝަން ސައިޓެއްގައި ހިންގި އޮޕަރޭޝަނެއްގައި ކަމަށެވެ.
މި މައްސަލައިގައި ހައްޔަރުކޮށްފައި ވަނީ އުމުރުން 49 އަހަރުގެ ޕަރަން ދާސް އަދި 30 އަހަރުގެ އަލް އަމީނެވެ.
އެ ސައިޓު ބަލާ، ފާސްކުރިއިރު، 324 ދަޅާއި 378 ފުޅީގެ ބަނގުރާ އަދި ބަނގުރާކަމަށް ބެލެވޭ އެއްޗެއްހުރި ފަސް ލީޓަރުގެ 10 ފުޅިއާއި 500 އެމްއެލްގެ ހަތް ފުޅި ފެނިފައިވާ ކަމަށް ފުލުހުން މައުލޫމާތު ދެއެވެ.
މި އޮޕަރޭޝަން ހިންގާފައިވަނީ ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ކަމަށްވާއިރު، މި މައްސަލަ ފުލުހުން ގެންދަނީ ތަހުގީގުކުރަމުންނެވެ.
ފާހަގަކޮށްލެވޭ ގޮތުގައި، މަސްތުވާތަކެތީގެ މައްސަލަތަކުގައި ދޭތެރެއަކުން މީހުން އަތުލައިގެނެއެވެ. މިފަދަ މައްސަލަތައް މަދު ކުރުމަށް ފުލުހުން އަންނަނީ އެމީހުންގެ ވަނަވަރުތައް ހާމަކުރަމުންނެވެ.