ބުރިޖު ހައިވޭފައި މާލެއިން ހުޅުމާލެއަށް ދަތުރުކުރި ތިން ސައިކަލު އެކްސިޑެންޓުވެ، ފަސް މީހަކަށް ރޭ އަނިޔާވެއްޖެއެވެ.
މި އެކްސިޑެންޓު ހިނގައިގެން ފުލުހުންނަށް ރިޕޯޓުކުރީ ރޭ 12:11 އެހާކަންހާއިރެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، މި ހާދިސާގައި އަނިޔާވި ފަސް މީހުންގެ ތެރެއިން ހަތަރު މީހަކަށް ފަރުވާ ދިނުމަށް ފަހު މިހާރު ހޮސްޕިޓަލުން ދޫކޮށްލާފައިވާ ކަމަށެވެ. އަނެއް މީހާއަށް އަދިވެސް ޓްރީޓޮޕް ހޮސްޕިޓަލުގައި އަންނަނީ ފަރުވާދެމުންނެވެ.
އެ މީހާގެ ހާލު ވެސް ސީރިއަސް ނޫން ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.
ފުލުހުން ބުނި ގޮތުގައި މި އެކްސިޑެންޓު ހިނގަން މެދުވެރިވީ ސައިކަލު އޯވާޓޭކް ކުރަން އުޅުމުގެ ތެރޭގައި ދެ ސައިކަލު ޖެހި، ފަހަތުން އައި އެހެން ސައިކަލެއް ވެސް ޖެހިގެންނެވެ. ގަވާއިދާ ހިލާފަށް ދުއްވި ސައިކަލު މިހާރު ޓޯކޮށްފައިވާ ކަމަށް ފުލުހުން ބުންޏެވެ.
ފުލުހުން އަންނަނީ އެކްސިޑެންޓުގެ މައްސަލަ ތަހުގީގުކުރަމުންނެވެ.