ބޮލީވުޑްގެ ބަތަލާ އާލިއާ ބަޓް ލީޑް ރޯލް ކުޅޭ ޔަޝް ރާޖް ކުންފުނީގެ ސްޕައި ޔުނިވާސް ފިލްމު "އަލްފާ" ބެލުންތެރިންނަށް ގެނެސްދޭނެ ތާރީޚު އިއުލާނުކޮށްފިއެވެ.
އާލިއާއާ އެކު މި ފިލްމުގެ ވަރަށް މުހިއްމު ރޯލަކުން އަރަމުން އަންނަ ޒުވާން ބަތަލާ ޝަރުވާރީ ވާގް ވެސް ފެންނާނެއެވެ. އިންޑިއާގައި އާއްމުކޮށް ވާހަކަ ދައްކާ އުޅޭ ތިން ބަހަކުން ފިލްމު ރިލީޒްކުރަން ނިންމާފައިވާއިރު ބެލުންތެރިންނާ ހަމައަށް ފިލްމު ގެނެސްދޭނީ އަންނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.
ވަރަށް ވަރުގަދަ އެކްޝަން ސީންތަކުން ދެ ބަތަލާއިން ފެންނާނެ މި ފިލްމަކީ އަދިތިޔަ ޗޯޕްޅާ ޕްރޮޑިއުސްކޮށް ޝިވް ރަވައިލް ޑައިރެކްޓްކުރާ ފިލްމެކެވެ. މިއީ އާލިއާ ޔަޝް ރާޖް ކުންފުނީގެ ފިލްމަކުން ބެލުންތެރިންނަށް ފެންނާނެ ފުރަތަމަ ފިލްމެވެ.
ހަމައެއާއެކު މި ފިލްމުން ސްޕައި ޔުނިވާސްއިން ބެލުންތެރިންނަށް ތައާރަފްކުރާ ފުރަތަމަ އަންހެން އެކްޝަން ލީޑް ތަރި ބެލުންތެރިންނަށް އާލިއާގެ ރޯލްއިން ފެންނާނެއެވެ. މިހާތަނަށް ސްޕައި ޔުނިވާސްއިން ގެނެސްދީފައިވާ ފިލްމުތަކުގައި މުޅިން ވެސް ލީޑް ތަރިންގެ ގޮތުގައި ފެނިފައި ވަނީ ފިރިހެން އެކްޓަރުންނެވެ.
ފިލްމު "އަލްފާ"ގެ ޝޫޓިންގްތެރެއިން އާލިއާ ބެލުންތެރިންނާ ހިއްސާކުރި ފޮޓޯ--ފޮޓޯ/ އިންސްޓަގްރާމް
އާލިއާ އާއި ޝަރުވަރީގެ އިތުރުން ފިލްމުގެ ވަރަށް ހާއްސަ ރޯލަކުން ފިލްމީ ތަރިން ކަމަށްވާ ބޮބީ ޑިއޯލް އަދި އަނިލް ކަޕޫރު ވެސް ފެންނާނެއެވެ. މީގެ އިތުރުން އެ ޔުނިވާސްގެ މަޝްހޫރު ފްރެންޗައިޒް "ވޯ"ގެ ކެރެކްޓާ މޭޖާ ކަބީރު ދަލިވާލްގެ ހާއްސަ ފެނިލުމަކުން ރިތިކް ރޯޝަން ވެސް ފެންނާނެ ކަމަށް ރިޕޯޓުތައް ބުނެއެވެ.
އަންނަ އަހަރު ރިލީޒްކުރާނެ އާލިއާގެ އެންމެ އުއްމީދީ ފިލްމުތަކުގެތެރޭ ހިމެނޭ "އަލްފާ"ގައި ބަތަލާ ކުޅޭ ރޯލަށް ތައްޔާރު ވުމުގެ ގޮތުން ވަރަށް ހާއްސަ ތަމްރީނުތަކެއް ވެސް ވަނީ ފުރިހަމަކޮށްފައެވެ.
އާލިއާ އެންމެ އަވަހަށް ބެލުންތެރިންނަށް ފެންނާނީ މި މަހުގެ 11 ވަނަ ދުވަހު ރިލީޒްކުރާ ފިލްމު "ޖިގްރާ"އިންނެވެ.