އިންޑިއާގެ ފިލްމީ ތަރި ސައިފް އަލީ ޚާންއަށް ދާދިފަހުން ކުރިމަތިވި ހަމަލާއަށްފަހު އެކްޓަރު ސެކިއުރިޓީ ޚިދުމަތް ހޯދަމުން އަންނަ އެޖެންސީ ބަދަލުކުރަން ނިންމިކަމަށް ރިޕޯޓުތައް ބުނެފިއެވެ.
ސައިފްގެ ސެކިއުރިޓީ ކަންކަން ކުރިން ބަލަހައްޓަމުން އައި އެޖެންސީގެ ނަން ހާމަކޮށްފައި ނުވާއިރު ސައިފް ވަނީ ބޮލީވުޑްގެ ކުރީގެ ފިލްމީ ތަރި ރޮނިތު ރޯއިން ހިންގަމުން އަންނަ ސެކިއުރިޓީ އޭޖެންސީގެ ޚިދުމަތް ހޯދަން ނިންމާފައި ކަމަށް ރިޕޯޓުތައް ބުނެއެވެ.
ފަރުވާއަށް ފަހު މިދިޔަ އަންގާރަ ދުވަހު ސައިފް ހޮސްޕިޓަލުން ގެއަށް ދޫކޮށްލިއިރު ސައިފްގެ ސެކިއުރިޓީންގެ ޓީމާ އެކު ރޮނިތު ރޯއި އިސްކޮށް އުޅުނު މަންޒަރު ވަނީ ފެނިފައެވެ.
ރޮނިތުގެ އެޖެންސީން ސައިފްގެ ސެކިއުރިޓީ ބެލެހެއްޓުމާ ހަވާލުވިތޯ މީޑިއާއިން އެހުމުން އެކަމަށް ސީދާ ޖަވާބެއް ރޮނިތު ދީފައެއް ނުވެއެވެ. ނަމަވެސް ރޮނިތުގެ ޓީމުން ތިބީ ސައިފްއާ އެކު ކަމަށާއި އެކްޓަރުގެ ހާލު ރަނގަޅު ކަމަށް ރޮނިތު ވަނީ މީޑިއާގައި ބުނެފައެވެ.
ނުވަދިހައިގެ އަހަރުތަކުން ފިލްމުތަކުން ފެނުނު އެކްޓަރު ރޮނިތު ރޯއިގެ އެޖެންސީ އަކީ ބޮލީވުޑްގެ ވަރަށް ގިނަ ހައި ޕްރޮފައިލް އެކްޓަރުންނަށް ސެކިއުރިޓީގެ ޚިދުމަތް ފޯރުކޮށްދެމުން އަންނަ އެޖެންސީއެކެވެ. އޭގެތެރޭގައި ޝާހްރުކް ޚާން، ރިތިކް ރޯޝަން، އަމީތާބް ބައްޗަން އަދި އަކްޝޭ ކުމާރު ހިމެނެއެވެ.
ރޮނިތު ރޯއި ސައިފް ހޮސްޕިޓަލުން ގެއަށް ދޫކޮށްލި ދުވަހު އެ ސަރަހައްދުގައި ހަރަކާތްތެރި ވަނީ--ފޮޓޯ/ޕިންކްވިލާ
މީޑިއާތަކުން ބުނެފައިވާ ގޮތުގައި މީގެކުރިން ސައިފްގެ ސެކިއުރިޓީގެ ކަންކަން ބަލަހައްޓަމުން އައި އެޖެންސީ އަކީ މާ މަޝްހޫރު ނޫން ވަރަށް ދޯދިޔާކޮށް ހިންގާ އެޖެންސީއެކެވެ.
ބައެއް މީޑިއާތަކުން ބުނެފައިވާ ގޮތުގައި ސައިފް ދިރިއުޅޭ އެޕާޓްމަންޓަށް ވައްކަން ކުރަން ވަން ރޭ ވެސް އެ އިމާރާތުގެ ސެކިއުރިޓީއަށް ހުރި މީހާއަށް އޮތީ ނިދިފައެވެ. ސައިފަށް ލިބުނު ހަމަލާއާ ގުޅިގެން އެ އިމާރާތުގެ ސެކިއުރިޓީ ކަންކަން ވަނީ އިތުރަށް ވަރުގަދަކޮށްފައެވެ.