ކޮމީޑިއަން ކަޕިލް ޝަރުމާއަށް އީމެއިލް މެދުވެރިކޮށް މަރުގެ އިންޒާރު ލިބުމާ ގުޅިގެން އެ މައްސަލަ މުމްބާއީ މަހާރަޝްތުރާގެ ފުލުހުން ބަލަން ފަށާފައިވާ ކަމަށް ރިޕޯޓުތައް ބުނެފިއެވެ.
"ބިޝްނޫ"ގެ ނަމުން ސޮއިކޮށްފައިވާ އެ އީމެއިލްގައި ބުނެފައި ވަނީ ކަޕިލް ޝަރުމާގެ ހަރަކާތްތައް ވަރަށް ގާތުން ބަލަމުން އަންނަ ކަމަށާއި އީމެއިލް ލިބޭތާ އަށް ގަޑިއިރުތެރޭ ޖަވާބު ނުދީފި ނަމަ ނަތީޖާ ގޯސްވާނެ ކަމަށެވެ.
އެފަދަ އީމެއިލްތަކުގެ މައްސަލަ މީގެ ކުރިން އެހެން ތަރިންތަކެއް ވެސް ފުލުހަށް ހުށަހަޅާފައިވެއެވެ. އޭގެ ތެރޭގައި ރާޖްޕަލް ޔާދަވް، ސުގާންދާ މިޝްރާ އަދި ރެމޯ ޑިސޫޒާ ހިމެނެއެވެ.
ކަޕިލްގެ އިތުރުން މަރުގެ އިންޒާރުތައް ލިބުނު ސެލެބްރިޓީން ކަމަށްވާ ރާޖްޕަލް ޔާދަވް،ސުގާންދާ މިޝްރާ އަދި ރެމޯ ޑިސޫޒާ--ފޮޓޯ/ފޭސްބުކް
ހެއްވާ މަޖާ ރޯލްތައް ކުޅެފައިވާ އެކްޓަރު ރާޖްޕަލް ޔާދަވްއަށް މި މޭރުމުން އީމެއިލްއެއް ލިބުނީ މިދިޔަ ޑިސެމްބަރު މަހު ކަމަށާއި އޭގެ ތިން ދުވަސް ފަހުން، ޑިސެމްބަރު 17ގައި އޭނާ އެ މައްސަލަ ފުލުހުންނަށް ހުށަހަޅާފައިވާ ކަމަށް ރިޕޯޓުތައް ބުނެއެވެ.
މުމްބާއީގެ ފުލުހުންގެ ސަމާލުކަމަށް މި މައްސަލަ ގެނައުމާ ގުޅިގެން ވަރަށް ޚާއްސަ ސަމާލުކަމެއް ދީގެން މި މައްސަލަ ބަލަމުންދާ ކަމަށް ފިލްމީ ޚަބަރުތައް ބުނެއެވެ.
ދާދިފަހުން ބޮލީވުޑްގެ އެކްޓަރު ސައިފް އަލީ ޚާންއަށް ދިން ހަމަލާއަށް ފަހު، މިގޮތަށް ދޭ އިންޒާރުތަކުގެ ތަހުގީގަށް އިސްކަންދޭނެ ކަމަށް މުމްބާއީގެ ފުލުހުން ވަނީ ބުނެފައެވެ.
ސައިފަށް ހަމަލާދީފައި ވަނީ އެކްޓަރު ދިރިއުޅޭ އެޕާޓްމަންޓަށް ވައްކަން ކުރުމުގެ ނަމުގައި ވަން ބަންގްލަދޭޝަށް ނިސްބަތްވާ މީހެކެވެ. މި ހަމަލާގައި ސައިފަށް ލިބުނު އަނިޔާއަށް ފަރުވާ ދިނުމަށްފަހު ފަސް ދުވަސް ފަހުން، މިދިޔަ އަންގާރަ ދުވަހު އޭނާ ވަނީ ހޮސްޕިޓަލުން ގެއަށް ދޫކޮށްލާފައެވެ.