ކުރިއަށް އޮތް ފެބްރުއަރީ މަހުގެ 14 ވަނަ ދުވަހު ރިލީޒްކުރާ ފިލްމު "ޗާވާ"އަކީ މިހާތަނަށް ކެރިއަރުގެ އެންމެ ބޮޑު ފިލާވަޅެއް ލިބުނު ފިލްމު ކަމަށް އެ ފިލްމުގެ ލީޑް އެކްޓަރު ވިކީ ކޯޝަލް ބުނެފިއެވެ.
މި އަހަރު ރިލީޒްކުރަން ނިންމާފައިވާ ފިލްމުތަކުގެ ތެރެއިން ބެލުންތެރިންގެ އުއްމީދު އެންމެ ބޮޑަކަށް ގުޅިފައިވާ އެއް ފިލްމަކަށް "ޗާވާ" ވެފައިވާއިރު މިއީ އިންޑިއާގެ ތާރީޚާ ވަރަށް ބޮޑަށް ގުޅުން ހުރި ފިލްމެކެވެ.
މި ފިލްމުގައި ވިކީ ކުޅެފައި ވަނީ ކުރީގެ މުގާލްގެ ރަސްކަމާ ދެކޮޅަށް ނުކުތް މަރާޓާ ރަސްކަލެއް ކަމަށްވާ ޗަތުރަޕަތީ ސަބާޖީ މަހާރާޖްގެ ރޯލެވެ. ފިލްމުގައި ވިކީގެ އަންހެނުންގެ ރޯލްއިން ފެންނާނީ ސައުތު ސިނަމާއަށްފަހު މިހާރު ބޮލީވުޑަށް ތައާރަފުވެފައިވާ މަގުބޫލު ބަތަލާ ރަޝްމިކާ މަންދަންނާއެވެ.
ބަތަލާ ރަޝްމިކާ ފިލްމު "ޗާވާ"ގައި ފެންނާނެ ގޮތުގެ ޕޯސްޓަރެއް--ފޮޓޯ/ބޮލީވުޑްހަންގާމާ
އަކްޝަޔޭ ކަންނާ ވެސް މުހިއްމު ރޯލްއިން ފެންނާނެ "ޗާވާ"ގެ ޓްރެއިލާ ރިލީޒް ކުރުމަށް ބޭއްވި ހަފްލާގައި ވާހަކަ ދައްކަމުން ވިކީ ބުނެފައި ވަނީ، މި ފިލްމުން އިންޑިއާގެ ސަގާފަތާއި، ތާރީޚާއި އޭރު އިންޑިއާގެ ރައްޔިތުން އެ ޤައުމުގެ ތަރިކަ ދަހަމައްޓާ އެ ތަރިކައިގެ އަގު ހިފެހެއްޓުމަށްކުރި މަސައްކަތް ދަސްވުމަކީ ކެރިއަރުގައި މިހާތަނަށް ލިބުނު އެންމެ މުހިއްމު ފިލާވަޅު ކަމަށެވެ.
ފިލްމެއްގައި ހަމައެކަނި މަސައްކަތް ކުރުމުން ނިމުނީ ނޫންކަމަށާއި އެ ފިލްމުގައި ކުޅޭ ކެރެކްޓާއެއްގެ ދިރިއުޅުން އަސްލާ އެއްގޮތަށް ކުޅެން ލިބުމަކީ ވަރަށް ގިނަ ކަންކަން ދަސްވެ ދިރިއުޅުމާ މެދު ދެކޭގޮތް މުޅިން ބަދަލުކޮށްލާ ކަމެއް ކަމަށް ވިކީ ވަނީ ބުނެފައެވެ.
ދިނޭޝް ވީޖަންގެ މެޑޮކް ފިލްމްސްއިން ގެނެސްދޭ މި ފިލްމުގެ ޑައިރެކްޓަރަކީ ކުރިންވެސް ވިކީއާ އެކު މަސައްކަތް ކޮށްފައިވާ ލަކްޝަމަން އުޓޭކަރުއެވެ.