އޯޓިޒަމް ފަދަ ބަލިތައް ދެނެގަތުމަށް ޚާއްސަ ދިވެހިރާއްޖޭގެ ފުރަތަމަ ޑިވޮލޮޕްމަންޓަލް ޕީޑިއެޓްރީޝަން ޑރ. އައިމިނަތު ފަޒުނާ އައިޖީއެމްއެޗުގައި ބަލި މީހުން ބައްލަވަން ފައްޓަވައިފިއެވެ.
ޑރ. ފަޒުނާ ކިޔަވާ ވިދާޅުވުމަށް ފަހު އެނބުރި ވަޑައިގެން އައިޖީއެމްއެޗުގައި ބަލި މީހުން ބައްލަވަން ފެއްޓެވިކަން އެ ހޮސްޕިޓަލުން މިއަދު ވަނީ އިއުލާނުކޮށްފައެވެ.
އެގޮތުން، ފަޒުނާ ޚާއްސަވަނީ ކުޑަކުދިންގެ ކިބައިގައި ހުންނަ އޯޓިޒަމްއާއި އޭޑީއެޗްޑީ ފަދަ ބަލިތައް ދެނެގަތުމުގެ ދާއިރާއިން ކަމަށް އައިޖީއެމްއެޗުން ބުންޏެވެ.
އައިޖީއެމްއެޗުން ބުނީ، ކުޑަކުދިންގެ ކިބައިގައި ހުންނަ އޯޓިޒަމް އަދި އޭޑީއެޗްޑީ ފަދަ ބަލިތައް ދެނެގަންނަން ހަދާ 'ބޭލޭ-4'އާއި އޭޑީއޯއެސް-2' ފަދަ އެސެސްމެންޓުތައް ހެދުމުގެ ހުނަރު އޭނާއަށް ލިބިފައިވާ ކަމަށެވެ.
މި ދާއިރާއިން އޭނާ ތައުލީމާއި ތަމްރީން ހާސިލުކުރީ މެލޭޝިއާގެ ނެޝަނަލް ޔުނިވާސިޓީންނާއި އެމެރިކާގެ ޔުނިވާސިޓީ އޮފް ކެލިފޯނިއާއިންނެވެ.