ރާއްޖެއަށް މެޑިކަލް ޓޫރިޒަމް ތައާރަފުކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)އާއި އޭޑިކޭ ހޮސްޕިޓަލާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީއާއި އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އައްފާލެވެ.
މި ކަމާ ގުޅުން ހުރި މައުލޫމާތުތައް ހިއްސާކުރައްވައި އައްފާލް 'ސަން'އަށް ވިދާޅުވީ، އެއްބަސްވުމުގައި ދަށުން އެމްއެމްޕީއާރުސީއާ ގުޅިގެން ރާއްޖޭގައި މެޑިކަލް ޓޫރިޒަމް ތައާރަފުކޮށް، އެކަން ކުރިއަރުވަން މަސައްކަތް ކުރާނެ ކަމަށެވެ.
އެއްބަސްވުމުގައި ސޮއިކުރުމުގެ ތެރެއިން --- ފޮޓޯ/ އޭޑީކޭ ހޮސްޕިޓަލް
އެގޮތުން، ރާއްޖޭގެ ސިއްހީ ޚިދުމަތްތައް ހޯދަން ރާއްޖެއިން ބޭރުގެ މީހުން އައިސް ޚިދުމަތް ހޯދޭނެ ގޮތް ތައާރަފު ކުރުމަށާއި ހިންގާ ސިއްހީ އަދި ތައުލީމީ ކޮންފަރެންސް ފަދަ ހަރަކާތްތަކަށް ވެސް ރާއްޖޭން ބޭރުގެ މީހުން ގެނައުމުގެ ފުރުސަތުތައް އިތުރުކުރަން މަސައްކަތް ކުރާނެ ކަމަށް އޭނާ ވަނީ ވިދާޅުވެފައެވެ.
އެ އެއްބަސްވުމުގެ ދަށުން، މެޑިކަލް ޓޫރިޒަމްގެ ޒަރިއްޔާއިން ރާއްޖޭގެ ސިއްހީ ދާއިރާއާއި ފަތުރުވެރިކަމުގެ ދާއިރާ ސިންދަފާތު ކުރުމަށް މަސައްކަތް ކުރާނެ ކަމަށް ވެސް އައްފާލް ވިދާޅުވިއެވެ.
އެެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރެއިން --- ފޮޓޯ/ އޭޑީކޭ ހޮސްޕިޓަލް
"އެމްއެމްޕީއާރުސީގެ މަގުސަދަކީ ރާއްޖޭގެ ޓޫރިޒަމް ޑައިވާސިފައި ކުރުމަށްޓަކައި، މާކެޓު ކުރުން ކަމަށްވާއިރުގައި، ސިއްހީ ޚިދުމަތް ދޭ މީހުންނާ އެއްކޮށް އެކަން ކުރުމުން އަޅުގަނޑުމެން ގަބޫލުކުރަނީ ރާއްޖޭގައި މެޑިކަލް ޓޫރިޒަމް ފުޅާކުރުމަށް ވަރަށް ބޮޑަށް ފުރުސަތުތަކެއް ލިބިގެންދާނެ ކަމަށް،" އޭނާ ވިދާޅުވިއެވެ.
މީގެއިތުރުން، މި އެއްބަސްވުމުގެ މަސައްކަތްތައް މިއަދުން ފެށިގެން ކުރިއަށް ދާނެ ކަމަށާއި އެކަމުގެ ތެރެއިން އެކި ހަރަކާތްތައް ކުރިއަށްދާނެ ކަމަށް އައްފާލް ވިދާޅުވިއެވެ.