ކޭޕާކުން ފުލެޓެއް ގަތް މީހަކަށް، ފައިސާ އަނބުރާ ދައްކަން ސިވިލް ކޯޓުން މީގެ ކުރިން ކުރި ހުކުމެއް ހަމަ އެ ކޯޓުން އިއްޔެ ބާތިލުކޮށްފިއެވެ.
ސިވިލް ކޯޓުން އޮކްޓޯބަރު 24، 2022 ގައި ހުކުމްކޮށްފައިވަނީ ކޭޕާކު ފުލެޓުތައް ހަދާ ހަމްބޯ ކުންފުނިން، އައްޑޫ ހިތަދޫ، ނަސީމީ މަންޒިލް، ރަފީއުއްދީން ނަސީމަށް 2.9 މިލިޔަން ރުފިޔާއާއި 20،000 އެމެރިކާ ޑޮލަރު ދައްކަން ޖެހޭ ކަމަށެވެ. އެ ހުކުމް ކުރީ ހަމްބޯ ކުންފުނީގެ ޣައިރު ހާޒިރުގައެވެ.
އެހެންވެ، އެ ހުކުމުގައި ގޯސްތަކެއް ހުރި ކަމަށް ފާހަގަކޮށް އެ ކުންފުނިން ވަނީ ހުކުމް ބާތިލުކޮށްދޭން އެދި ހުށަހަޅައިފައެވެ.
ދައުވާ ބާތިލުކުރަން އެދި ހަމްބޯ ކުންފުނިން ވަނީ ގިނަ ނުކުތާތަކެއް ހުށަހަޅައިފައެވެ. މައިގަނޑު ނުކުތާއެއް ގޮތުގައި ފާހަގަކޮށްފައިވަނީ މި މައްސަލަ ސިވިލް ކޯޓަށް ރަފީއުއްދީންގެ ފަރާތުން ހުށަހެޅި ގާނޫނީ ވަކީލަކީ އޮގަސްޓް 12، 2021 ގައި ހަމްބޯ ކުންފުންޏާ އެކު ރަފީއުއްދީން ހެދި އެއްބަސްވުން ނޯޓަރައިޒްކުރި ވަކީލަށް ވުމެވެ.
މި މައްސަލައިގައި ރަފީއުއްދީންގެ ގާނޫނީ ވަކީލު ދައުވާ ފޯމުގައި ސޮއިކޮށްފައި އޮތް ނަމަވެސް، އޭނާ އެ ލިޔުން ނޯޓަރައިޒްކޮށްފައި އޮތުމުން އޭނާއަށް ވަކާލާތު ނުކުރެވޭނެ ކަމަށް ހަމްބޯ ކުންފުނީގެ ފަރާތުން ބުންޏެވެ.
އެހެންވެ، ޝަރީއަތުން ވެސް ނިންމާފައިވަނީ މި މައްސަލައިގައި ރަފީއުއްދީންގެ ވަކީލަށް ވަކާލާތު ނުކުރެވޭނެ ކަމަށާއި އަދި، ދައުވާ ފޯމުގައި އޭނާ ސޮއިކޮށްފައި އޮތުމުން ދައުވާ ފޯމު ވެސް ބާތިލުވާނެ ކަމަށެވެ.
ސިވިލް ކޯޓުގައި މި މައްސަލަ ބެއްލެވީ ގާޒީ އާދަމް ޛާލިފެވެ.
ފާހަގަކޮށްލެވޭ ގޮތުގައި އޮޅުވާލައިގެން ކޭޕާކު ފުލެޓުތައް ގިނަ ބަޔަކަށް ވިއްކާ، އެ ފައިސާ އަތުލިކަމުގެ ތުހުމަތުގައި އެ މަޝްރޫއު ހިންގުމުގައި އިސްކޮށް ހުރި ހަސަން މަމްދޫހު (މަންޑޭ)ގެ މައްޗަށް ވަނީ ކޮންމެ މުއާމަލާތަކާ ގުޅިގެން ވަކިވަކިން ދައުވާކޮށްފައެވެ.