އިދިކޮޅު އެމްޑީޕީ ހިންގުމަށް އޭނާއަށް ގޮންޖެހުންތަކެއް އެބަހުރި ކަމަށާއި، އެ ކަމަށް "ދަރު އަޅާނެ" މީހުން ވެސް އެބަތިބި ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެެވެ.
ފައްޔާޒު މިހެން ވިދާޅުވީ މިރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުންނެވެ. އޭނާ ވިދާޅުވީ ޖޮންޖެހުންތަކާ އެކު އެންމެ އިސްކަމެއް މި ވަގުތު ދެނީ ޕާޓީ ވަރުގަދަ ކުރަން ކަމަށެވެ.
ފައްޔާޒު ވިދާޅުވި ގޮތުގައި މި ވަގުތު އެންމެ އިސްކަމެއް ދީގެން ކުރަން ބޭނުންވާ ކަމަކީ ޕާޓީ ވަރުގަދަ ކުރުމަށް ޓަކައި ކުރަން ޖެހޭ މަސައްކަތްތައް ވީހާ ވެސް އަވަހަށް ފެށުން ކަމަށެވެ.
"މިއީ ސިއްރުން ދައްކަންޖެހޭ ވާހަކައެއް ނޫން. މުޅި ރާއްޖޭގެ ޓްވިޓާގައްޔާއި ހުރިހާ އެއްޗެއްގައި އަޅުގަނޑަށް އޮތް ގޮންޖެހުންތަކެއް އެބަ އޮތް މި ޕާޓީ ހިންގުމުގައި. އަދި އެ ކަމަށް ދަރު އަޅާނެ މީހުން ވެސް ހަމަގައިމު ވެސް ހުރިހާ ދިމާލެއްގައި ވެސް ތިބޭނެ" ފައްޔާޒު ވިދާޅުވިއެވެ.
އޭނާ ވިދާޅުވީ ޖޮންޖެހުންތަކާ ދޭތެރޭގައި އޭނާގެ މާ ބޮޑު ކަންބޮޑުވުމެއް ނެތް ކަމަށެވެ.
މިރޭ އެ ޕާޓީން ވަނީ މާލީ މިނިވަންކަން ކަށަވަރުކޮށް، ޕާޓީ ހަރުދަނާ ކުރުމަށްޓަކައި ވިޔަފާރި ކުރުމާއި، އެކެޑަމީއެއް ހިންގުމުގެ އިތުރުން ވަކި މުއައްސަސާއެއްގެ ގޮތުގައި "ތިންކް ޓޭންކް"އެއް އުފެއްދުމަށް ނިންމައިފައެވެ.
އެމްޑީޕީ ހިންގުމުގައި ގޮންޖެހުންތަކެއް ހުރިކަން ފައްޔާޒު ފާހަގަ ކުރެއްވިއިރު، އެ ޕާޓީގެ ތެރޭގައި މައްސަލަތައް އުފެދި، ޕާޓީ ބައިބައިވާން ފެށީ މިދިޔަ އަހަރު އެ ޕާޓީއަަށް ޗެއާޕާސަނަކު އައްޔަނު ކުރަން ބޭއްވި އިންތިޚާބާ ދިމާކޮށެވެ.
އާންމު ގޮތެއްގައި ވެސް އެމްޑީޕީގެ އެތެރޭގެ އިންތިޚާބުތައް ވާދަވެރި ނަމަވެސް، އެ ޕާޓީ ހިންގާ ގޮތާ މެދު އެ ޕާޓީގެ މެމްބަރުންގެ މެދުގައި އުފެދުނު ކަންބޮޑުވުންތަކުގެ ތެރެއިން އޭރުގެ ރައީސް އިބްރާހީމް މުޙައްމަދު ޞާލިޙާއި، އޭރުގެ މަޖިލިސް ރައީސް މުޙައްމަދު ނަޝީދުގެ ފެކްޝަނެއް އުފެދި، ޕާޓީ ދެކަފި ވިއެވެ.
ނިމިދިޔަ ރިޔާސީ އިންތިޚާބުގައި ލިބުނު ނާކާމިޔާބީއަށް ފަހު، އެމްޑީޕީގެ ހަރަކާތްތެރިކަން ކުޑަ ކަމަށް އާންމުން ބުނެއެވެ.