ގޫގުލްއިން ގޫގުލް ލެންސަށް އައު އަޕްޑޭޓެއް ގެނެސް، ވީޑިއޯ ރެކޯޑުކުރުމުގެ ފީޗާ އިތުރުކޮށްފިއެވެ. މި އައު ފީޗާ ބޭނުންކޮށްގެން ޔޫޒަރުންނަށް ވީޑިއޯ ރެކޯޑުކޮށް، އެ ވީޑިއޯގައިވާ އެއްޗެއްސާ ނުވަތަ ތަންތަނާ ބެހޭ ގޮތުން ސުވާލުކުރެވޭނެއެވެ.
މި ފީޗާ ފުރަތަމަ ހާމަކޮށްފައިވަނީ މިއަހަރުގެ ކުރީކޮޅު ބޭއްވުނު ގޫގުލް އައިއޯގައެވެ. މި ފީޗާ މަސައްކަތްކުރަނީ ގޫގުލްގެ ޖެމިނައި އާޓިފިޝަލް އިންޓެލިޖެންސް މޮޑެލް ބޭނުންކޮށްގެންނެވެ. އަދި މި ފީޗާ އިންޓެގްރޭޓްކޮށްފައިވަނީ އޭއައި އޯވާވިއުސް އާއެކުގައެވެ.
މި އައު ފީޗާގައި ޔޫޒަރުންނަށް 20 ސިކުންތުގެ ވީޑިއޯއެއް ރެކޯޑުކޮށް، އަޑުން ޕްރޮމްޕްޓެއް އިތުރުކުރެވޭނެއެވެ. ރެކޯޑިން ނިމުމުން، ގޫގުލް ލެންސްއިން ޖެމިނައި ބޭނުންކޮށްގެން އޭއައި އޯވަވިއުސް މެދުވެރިކޮށް ސާޗްއެއް ހިންގައި، ވީޑިއޯގައި ދައްކާފައިވާ އެއްޗަކާ ގުޅޭ މަޢުލޫމާތު ހޯދައިދޭނެއެވެ.
މި ފީޗާ މިހާރު ރޯލްއައުޓްކުރަމުންދަނީ ގޫގުލް ލެންސް އަދި އޭއައި އޯވާވިއުސް ލިބެން ހުރި ހުރިހާ ސަރަހައްދެއްގެ ޔޫޒަރުންނަށެވެ.
މި ފީޗާ ބޭނުންކުރުމަށް، ގޫގުލް ލެންސްގެ އިންޓަރފޭސް ހުޅުވައި، "ސާޗް" މޯޑުގައި ކެޕްޗާ އައިކަންއަށް ލޯންގްޕްރެސްކުރުމުން ވީޑިއޯ ރެކޯޑުކުރަން ފެށޭނެއެވެ.
މި އައު ފީޗާއަކީ ކުރިން ގޫގުލް ލެންސްގައި ހުރި ބައެއް ލިމިޓޭޝަންތައް ހައްލުކޮށްދޭނެ ފީޗާއެެއް ކަމަށް ބެލެވެއެވެ. މިސާލަކަށް މީގެ ކުރިން ހަރަކާތްތެރިވާ އެއްޗަކާ ބެހޭ ގޮތުން ސާޗްކުރުމަށް ނުވަތަ ތަފްސީލީ ސުވާލެއް ކުރުމަށް ދަތިވި ނަމަވެސް، މިހާރު އެކަން ކުރެވޭނެއެވެ.