ތިން އަހަރަށް ގޭބަންދު ކުރަން ހުކުމް ކުރުމުން، އެ ހުކުމާ އެއްގޮތަށް ބަންދުގައި ނުހުރި މީހަކު، އެއް އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމް ކޮށްފިއެވެ.
މި މައްސަލައިގައި ކްރިމިނަލް ކޯޓުން ހުކުމްކޮށްފައިވަނީ މާލޭ މ. ވައިޓްފިޝް އިބްރާހީމް ޝަރީފުގެ މައްޗަށެވެ.
އޭނާގެ މައްޗަށް ވަނީ ތިން މައްސަލައެއްގައި ތިން ދައުވާއެއް ހުށަޅާފައެވެ. އެއީ:
- ވައްކަން ކުރުމުގެ ކުށުގެ ދައުވާ
- މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގައި ބައިވެރިވުމުގެ ކުށުގެ ދައުވާ
- ޝަޚުސު އޮޅުވައިލުމުގެ ކުށުގެ ދައުވާ
މި ތިން މައްސަލަ ވަކިވަކިން ކުރިޔަށް ގެންގޮސްފައިވާއިރު، ތިން މައްސަލައިގައި ވެސް އޭނާގެ މައްޗަށް ކަނޑައަޅާފައިވަނީ ގޭބަންދުގެ އަދަބެވެ. އެއީ ޖުމުލަ ތިން އަހަރާއި ހަތް މަހާއި ހަ ދުވަހު ގޭބަންދުގައި ހުރުމަށެވެ.
މި ތިން މައްސަލައިގައި ވެސް އޭނާގެ މައްޗަށް ކަނޑައެޅި އަދަބު ތަންފީޒުކޮށްފައިނުވާތީ، އަދަބު މުރާޖައާކޮށް ކްރިމިނަލް ކޯޓުން ވަނީ އޭނާގެ މައްޗަށް އެއް އަހަރާއި 10 މަހުގެ ޖަލު ހުކުމެއް އިއްވައިފައެވެ.
ކޯޓުން ބުނީ ޝަރީފުގެ މައްޗަށް ކޮށްފައިވާ ގޭބަންދުގެ އަދަބު، ހުކުމުގައިވާ ގޮތަށް އޭނާ ތަންފީޒުކޮށްފައިނުވާ ކަމަށް ޕްރޮސެކިއުޓާ ޖެނެރަލް (ޕީޖީ)ގެ ފަރާތުން ބުނެފައިވާ ކަމަށެވެ. އަދި އެ އަދަބުގެ އެއްވެސް މިންވަރެއް އޭނާ ތަންފީޒުކޮށްފައިނުވާ ކަމަށް ކަރެކްޝަންސްގެ ސިޓީއަކާ ހަވާލާދީ ޕީޖީން ބުނެފައިވެއެވެ.
ޝަރީފް ބުނެފައިވާ ގޮތުގައި ގޭބަންދުގެ އަދަބުގައި ހުރުމަށް އޭނާ ދިރިއުޅޭނެ އެޑްރެހާއު ފޯނު ނަންބަރާ ހަވާލުވާނެ ފަރާތެއްގެ މައުލޫމާތު ދިނުމަށް ކަރެކްޝަންސްއިން ވަކި މުއްދަތެއް ދީފައެއް ނުވެއެވެ. އެ މައުލޫމާތު ހިއްސާ ކުރާނެ ކަމަށާއި، މިދިޔަ އަހަރުގެ ނޮވެންބަރު 30ވަނަ ދުވަހުން ފެށިގެން 10 ދުވަހަށް ތ. ކިނބިދޫއަށް ފުރުމުގެ ހުއްދައަކަށް އެދި، އޭނާ ސިޓީއެއް ފޮނުވި ކަމަށް ކޯޓުން ބުންޏެވެ.
އެހެން ނަމަވެސް އެ 10 ދުވަހުގެ ފަހުން އޭނާ އަމަލު ކުރި ގޮތުގެ އެއްވެސް މައުލޫމާތެއް ކަރެކްޝަންސްއާ ހިއްސާކޮށްފައެއް ނުވެއެވެ.
ޝަރީފް ބުނެފައިވަނީ އޭނާ އެ ރަށަށް ފުރާފައިނުވާތީ، އެ މައުލޫމާތު ކަރެކްޝަންސްއާ ހިއްސާ ނުކުރާ ކަމަށެވެ.
ކަރެކްޝަންސްއިން ބުނެފައިވަނީ އޭގެ ފަހުން އޭނާއަށް ނުގުޅޭ ކަމަށެވެ. އަދި އޭނާގެ ފަރާތުން ލިބެންޖެހޭ އެއްވެސް އެއްބާރުލުމެއް ލިބިފައިނުވާ ކަމަށެވެ.
އެހެން ކަމުން ޝަރީއަތުން ނިންމީ އޭނާގެ މައްޗަށް ކަނޑައެޅުނު ގޭބަންދުގެ މުއްދަތު ހުކުމާ އެއްގޮތަށް ތަންފީޒުކޮށްފައިނުވާކަން ސާބިތުވާ ކަމަށެވެ.
ޝަރީފުގެ މައްޗަށް ހުށަހެޅި ދައުވާތަކުގެ ތެރެއިން ވައްކަން ކުރުމުގެ ކުށުގައި އުފުލި ދައުވާގައިވަނީ 30 ޖުލައި 2020ވަނަ ދުވަހުގެ ރޭ، އިތުރު މީހަކާ އެކު ބޮޑުތަކުރުފާނު މަގުގެ ޕާކިން ޒޯނެއް ހުރި ސައިކަލެއް ވަގަށް ނަގާފައިވާ ކަމަށެވެ.
މި މައްސަލައިގައި އޭނާ ތަންފީޒު ކުރަންޖެހޭ ޖަލު އަދަބަކީ އެއް އަހަރާއި ހަ މަހާއި 21 ދުވަހެވެ. އެހެން ނަމަވެސް ކްރިމިނަލް ކޯޓުން ވަނީ އެ އަދަބު ތިން އަހަރާއި އެއް މަހާއި 12 ދުވަހުގެ ގޭބަންދުގެ އަދަބަކަށް ބަދަލުކޮށްދީފައެވެ. އެހެން ނަމަވެސް އަދަބު މުރާޖައާކޮށް، ޝަރީފުގެ މައްޗަށް ކަނޑައެޅީ އެއް އަހަރާ ހަ މަހާއި 12 ދުވަހުގެ ޖަލު އަދަބެކެވެ.
މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގައި ބައިވެރިވުމުގެ ކުށުގެ ދައުވާގައި ބުނެފައިވާ ގޮތުން، 30 ޖުލައި 2020ވަނަ ދުވަހުގެ ރޭ އިބްރާހީމް ޝަރީފް އިތުރު މީހަކާއެކު، އަމީނީމަގުން ހިނގާފައިދިޔަ އަންހެނެއްގެ އަތުގައި އޮތް ފޯނެއް ޖަހައިގަނެ، އެ ފޯން އެހެން މީހަކަށް ވަނީ ވިއްކައިލައިފައެވެ.
މި މައްސަލައިގައި އޭނާ ތަންފީޒު ކުރަންޖެހޭ އަދަބެއްގެ ގޮތުގައި ކަނޑައެޅީ ދެ މަހާއި 12 ދުވަހުގެ ޖަލު އަދަބެކެވެ. އެހެން ނަމަވެސް ކްރިމިނަލް ކޯޓުން އެ އަދަބު ހަތަރު މަހާއި 24 ދުވަހުގެ މުއްދަތުގެ ގޭބަންދު އަދަބަކަށް ލުއިކޮށްދިނެއެވެ. މި މައްސަލައިގައި އަދަބު މުރާޖައާކޮށް ޝަރީފުގެ މައްޗަށް ކަނޑައެޅީ ދެ މަހާއި 12 ދުވަހުގެ ޖަލު އަދަބެކެވެ.
މީގެ އިތުރުން ޝަޚުސު އޮޅުވާލުމުގެ ކުށުގެ ދައުވާގައި ބުނެފައިވަނީ 14 އޮގަސްޓު 2020ވަނަ އަހަރު ކޯޓު އަމުރެއްގެ ދަށުން ފުލުހުން އޭނާ ހޯދަމުން ދަނިކޮށް އޭނާ ފެނިގެން ހުއްޓުވައި ސުވާލު ކުރުމުން ޝަޚުސު އޮޅުވާލައި، ދޮގު މައުލޫމާތު ދީފައިވާ ކަމަށެވެ.
މި މައްސަލައިގައި އޭނާ ތަންފީޒު ކުރަންޖެހެނީ އެއް މަހާއި ހަ ދުވަހުގެ ޖަލު އަދަބެކެވެ. އެހެން ނަމަވެސް ކްރިމިނަލް ކޯޓުން އެ ޖަލު އަދަބު، ދެ މަހާއި 12 ދުވަހުގެ މުއްދަތުގެ ގޭބަންދު އަދަބަކަށް ބަދަލުކޮށްދިނެވެ. އެހެން ނަމަވެސް ގޭބަންދުގައި ހުރެފައިނުވާތީ، އަދަބު މުރާޖައާކޮށް، ކްރިމިނަލް ކޯޓުން ކަނޑައެޅީ އެއް މަހާއި ހަ ދުވަހުގެ ޖަލު ހުކުމެވެ.