ފިހާރައަކުން 600 ރުފިޔާގެ ވިޔަފާރި ކުރުމަށްފަހު، ފޭކު ޓްރާންސްފާ ސްލިޕެއް ފޮނުވި މީހަކު ނުވަ މަހާއި 18 ދުވަހަށް ޖަލަށްލުމަށް ކްރިމިނަލް ކޯޓުން މިއަދު ހުކުމް ކޮށްފިއެވެ.
މި މައްސަލައިގައި ހުކުމް އިއްވީ، ހއ. ހޯރަފުށީ އާސްތާނާގޭ އިބްރާހީމް ބައްޝާރުގެ ހަމީދުގެ މައްޗަށެވެ.
މިއީ 2022ވަނަ އަހަރުގެ ޖުލައި 23ގައި، މާލޭ ކިނބިގަސްމަގުގައި ހުންނަ "އިފާންޓްރޭޑް" ފިހާރައަށް އޭނާވަދެ، އެ ތަނުން ނެސްކެފޭ ޕައުޑަރު 500 ގްރާމުގެ ތިން ދަޅާއި ބޮޑު އެކްސްއެލް ދަޅެއް ނެގުމަށް ފަހު އެ ތަކެތީގެ އަގަށްވާ 600 ރުފިޔާގެ ފޭކު ސްލިޕެއް ދެއްކި މައްސަލައެކެވެ.
މި މައްސަލައިގައި ދައުލަތުން ބައްޝާރުގެ މައްޗަށް ކޮށްފައިވަނީ އެނގިހުރެ ސައްހަނޫން ލިޔުމެއް ދިނުމުގެ ކުށުގެ ދައުވާއެވެ.
މި މައްސަލައިގައި ދައުވާއަށް އިންކާރުކުރަމުން ކޯޓުގައި އޭނާބުނީ، ޓްރާންސްފާ ފޮނުވާފައިވާ ސިމްގެ ރަޖިސްޓްރީ ނަންބަރު އިންނަނީ އޭނާގެ ނަންމަތީގައި ނޫން ކަމަށެވެ.
މި މައްސަލައިގައި ދައުލަތުން ހުށަހެޅި ހެކީގެ ތެރޭގައި އެ ފިހާރައިގެ ސީސީޓީވީ ފުޓޭޖު ހިމެނެއެވެ. އެ ގޮތުން ވީޑިއޯ ފުޓޭޖުން ފެންނަ މީހާއާ ބައްޝާރުގެ ހަތް ސިފައެއް އެއްގޮތް ކަމަށް ފުލުހުންގެ ޑިޖިޓަލް އެވިޑެންސް އެގްޒެމިނަރާ ހަވާލާދީ ކޯޓުން ވަނީ ބުނެފައެވެ.
ދައުލަތުން ހުށަހެޅި ހެކިތަކާއެކު ކޯޓުން ނިންމީ ބައްޝާރުގެ މައްޗަށް މި ދައުވާ ސާބިތުވާ ކަމަށެވެ.
މީހަކަށް އޮޅުވައިލުމުގެ ނިޔަތުގައި ނުވަތަ، ނުރަނގަޅު އަމަލެއް ފޮރުވުމުގެ ނިޔަތުގައި އެނގިހުރެ، ލިޔުމެއް އުފެއްދުމާއި، ނުވަތަ ފުރިހަމަ ކުރުމާއި، ނުވަތަ ދޫކުރުމާއި ނުވަތަ ކަށަވަރުކޮށްދިނުމުގެ އިތުރުން ނަކަލުކޮށްދިނުމަކީ ވެސް ގާނޫނީ ކުށެކެވެ. އެއީ ޖިނާއަތުގެ ފަސްވަނަ ދަރަޖައިގެ ކުށެކެވެ.
އެހެން ކަމުން ކޯޓުން ހުކުމްކުރީ، އޭނާ ނުވަ މަހާއި 18 ދުވަހަށް ޖަލަށްލުމަށެވެ.
ފޭކު ސްލިޕް ދައްކައިގެން ވިޔަފާރި ކުރުމާއި، އެ ނޫން ވެސް އެކިއެކި ސްކޭމްގެ މައްސަލަތައް ރާއްޖޭގައިވަނީ ވަރަށް ބޮޑަށް އިތުރުވެފައެވެ. މި ފަދަ ކަންކަމަށް ހޭލުންތެރިވެ، ސަމާލުވާން ފުލުހުންނާއި ކަމާގުޅޭ އިދާރާތަކުން އެދެއެވެ.