ދަތްމަރުތޭލަކުން ހަމަލާދިން ބަންގްލަދޭޝްގެ މީހަކު ދިހަ އަހަރަށް ޖަލަށްލާން ކްރިމިނަކް ކޯޓުން މިއަދު ހުކުމްކޮށްފިއެވެ.
މި މައްސަލައަކީ 2020ވަނަ އަހަރު، ކ. ކާށިދޫ ޗަމަންގޭގައި ހުރި ބަންގްލަދޭޝް އެހެން ރައްޔިތެއް ކަމަށްވާ އެމްޑީ އަލް އަމީންގެ ބޮލުގައި އަދި އަތުގައި ވެސް ދަތްމަރުތޭލަކުން ޖަމަލް ޖެހި މައްސަލައެކެވެ. މި މާރާމާރީގެ ސަބަބުން އަލް އަމީނަށް އަނިޔާވެފައިވާ ކަމަށް މެޑިކޯ ލީގަލް ރިޕޯޓާ ހަވާލާދީ ކޯޓުން ބުނެފައިވެއެވެ.
މި މައްސަލައިގައި އޭނާގެ މައްޗަށް ކޮށްފައިވަނީ މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
މި މައްސަލައިގައި ޖަމަލްގެ ފަރާތުން ފުރަތަމަ ދައުވާއަށް އިންކާރުކުރި ނަމަވެސް، ފަހުން އިއުތިރާފުވިއެވެ. ދައުލަތުން ހެކި ހުށަހެޅީ، މި މައްސަލައިގައި ކާށިދޫ މެޖިސްޓްރޭޓް ކޯޓުގައި ބޭއްވުނު މުއްދަތު މަޖިލީހުގައި ޖަމަލް ދީފައިވާ އިއުތިރާފު ބަޔާނާ ވެސް އެކުގައެވެ. ޖަމަލް ކޯޓުގައި ބުނެފައިވާ ގޮތުން ދަތްމަރުތޭލަކުން އަލް އަމީންގައިގައި ދެ ފަހަރު ޖެހީ، އޭނާގެ މަންމައާ އަޅުވައި ހަޑިހުތުރު އެއްޗެހި ކިޔުމުން ރުޅި އައިސްގެންނެވެ.
މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށަށް 10 އަހަރާ 15 އަހަރާ ދެމެދުގެ ޖަލު ހުކުމެއް އަންނާނެއެވެ.
އެ ގޮތުން މި މައްސަލައިިގައި ދައުލަތުން އެދުނީ ޖަމަލްގެ މައްޗަށް 15 އަހަރުގެ ޖަލު ހުކުމެއް ކަނޑައަޅައިދޭށެވެ. އެހެން ނަމަވެސް ކޯޓުން ޖަމަލްގެ މައްޗަށް ހުކުމްކުރީ 10 އަހަރުގެ ޖަލު އަދަބެކެވެ.
މި މައްސަލައިގެ ހުކުމް ކުރުމާ ހަމަޔަށް، ޖަމަލްވަނީ ހަތަރު އަހަރާއި އެއް މަސްދުވަހާ ފަސް ދުވަސް ބަންދުގައި ހޭދަކޮށްފައެވެ. އެހެން ކަމުން، އެ މުއްދަތު ޖަލު އަދަބުން އުނިކުރުމުން، އޭނާ އިތުރަށް ޖަލުގައި ހޭދަކުރަން ޖެހެނީ ފަސް އަހަރާ 10 މަހާއި 25 ދުވަހެވެ.
މާރާމާރީއާއި ނުރައްކާތެރި ހަތިޔާރު ބޭނުންކޮށްގެން މީހުންނަށް އަނިޔާދިނުމުގެ ބޮޑެތި މައްސަލަތަކެއް މި ފަހުން ވެސް ވަނީ ފެންމަތިވެފައެވެ.