ރަށެއްގައި ކުޑަ ކުއްޖަކު ބަރަހަނާކުރުމަށް ފަހު އެ ކުއްޖާއަށް އަނިޔާކޮށް، ރުފިޔާ ދޭން ބުނެ ބްލެކްމެއިލްކުރި މައްސަލައެއް މިއަދު ފެންމަތިވެއްޖެއެވެ.
ސޯޝަލް މީޑިއާގައި އެ ކުއްޖާގެ މަންމަ ހިއްސާކުރި ޕޯސްޓެއްގައި ބުނެފައިވަނީ މީގެ ދުވަސްކޮޅެއް ކުރިން މިސްކިތެއް ތެރޭ ކުޑަ ކުއްޖަކަށް ބުލީކޮށް އަނިޔާކުރާތަން ފެންނަ ވީޑިއޯއެއް އާއްމުވި ކަމަށެވެ. މި ފަހަރު ހަމަ އެ ހާލަތު އެއަށްވުރެ ވެސް ނޭއްގާނީކޮށް އޭނާގެ ދަރިފުޅަށް ދިމާވި ކަމަށް އެ ޕޯސްޓުގައި ބުނެފައިވެއެވެ.
އެގޮތުން، އެ ކުއްޖާ ގޭގައި ނިދާފައި އޮއްވާ ގްރޫޕް ހަދައިގެން ގެއަށް ވަދެ، ކުޑަދޮރުން ކޮޓަރިއަށް ވަނުމަށް ފަހު ބޭރަށް ނުގޮސްފިނަމަ މަރާލާނެ ކަމަށް ބުނެ ބިރު ދައްކާފައިވާ ކަމަށް އޭނާ ބުންޏެވެ.
ބޭރަށް ދިޔުމުން ރުއްގަނޑެއްގެ ތެރެއަށް ވައްދާ ބަރަހަނާކޮށް، ވީޑިއޯކުރި ކަމަށް އެ ކުއްޖާގެ މަންމަ ބުންޏެވެ. އަދި، ރުފިޔާ ނުދީފި ނަމަ ވީޑިއޯ ލީކުކުރާނެ ކަމަށް ބުނެ، އެ ކުއްޖާ ބްލެކްމެއިލްކޮށްފައިވާ ކަމަށް ވެސް ބުންޏެވެ. އެ ވީޑިއޯ އެއްފުރާގެ ގިނަ ކުދިން ތިބި އިންސްޓަގްރާމް ގްރޫޕަކަށްލުމަށް ފަހު ދަރިފުޅަށް މަރުގެ އިންޒާރުދިން ކަމަށް ވެސް ކުއްޖާގެ މަންމަ ބުންޏެވެ.
މިއީ ގްރޭޑް ނުވައެއްގައި އުޅޭ ކުއްޖެއް އިސްވެ ހުރެ ގްރޫޕަކުން ހިންގި އަމަލެއް ވީމާ މި ފަހަރު ވެސް އޮންނާނީ އޭނާގެ ހައްގު. އަހަރެންގެ ދަރިފުޅަށް އިންސާފު ހޯދައިދޭނީ ކިހިނެއް؟ އަނިޔާ ލިބުނު ކުއްޖާގެ މަންމަ
އެ މައްސަލައާ ގުޅިގެން ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ސޯޝަލް މީޑިއާއިން އެކަން ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި، ކަމާ ގުޅުންހުރި އިދާރާތަކާ ގުޅިގެން އެ ކަމާ ގުޅޭ މައުލޫމާތު ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ބުންޏެވެ.
މީގެ ކުރިން ވެސް ވަނީ މިސްކިތެއްގައި ނަމާދުކުރަން ހުރި ކުއްޖަކު އެ ތަނުން ނެރެ އަނިޔާކުރި ވީޑިއޯއެއް އާންމުވެފައެވެ. އެ މައްސަލަ އޭރު ފުލުހުން ބެލިއެވެ.