މިދިޔަ އަހަރުގެ އޮކްޓޯބަރު މަހު ރިލީޒްކުރި ޑައިރެކްޓަރު ވިދޫ ވިނޯދު ޗޯޕްޅާގެ ފިލްމު "ޓުވެލްތު ފެއިލް"ގެ ޕްރީކުއަލްއެއް އުފައްދަން ތައްޔާރުވަމުން އަންނަކަން އިއުލާނުކޮށްފިއެވެ.
މި ފިލްމަކީ ""ޒީރޯ ސޭ ރީސްޓާޓް"ގެ ނަމުގައި އުފައްދާ ފިލްމެކެވެ. ދާދިފަހުން ދުބާއީގައި ބޭއްވި މި އަހަރުގެ އައިފާ އެވޯޑުގައި ވިނޯދު ކުރިއަށް އުފައްދަން ނިންމާފައިވާ ފިލްމު ގުޅިފައި ވަނީ "ޓުވެލްތް ފެއިލް"އާ ކަމަށް ކުޅަދާނަ ޑައިރެކްޓަރު ވަނީ ބުނެފައެވެ.
"ޒީރޯ ސޭ ރީސްޓާޓް"ގައި ގެނެސްދޭނީ "ޓުވެލްޓް ފެއިލް"ގެ ކާސްޓުންގެ ކުރީގެ ދިރިއުޅުމުގެ ވާހަކަތަކެވެ. މި ފިލްމުގެ ވެސް ލީޑް ރޯލްއިން ފެންނާނީ އެކްޓަރު ވިކްރާންތު މަސޭ ކަމަށާއި ފިލްމު ބެލުންތެރިންނަށް ހަމައަށް ގެނެސްދޭން ނިންމާފައި ވަނީ މި އަހަރުގެ ޑިސެމްބަރު މަހުގެ 13 ވަނަ ދުވަހު ކަމަށް ވިނޯދު ވަނީ ބުނެފައެވެ.
ފިލްމު "ޓުވެލްތު ފެއިލް"ގެ ދެ ތަރިން ޑައިރެކްޓަރު ވިދޫ ވިނޯދުއާ އެކު--ފޮޓޯ/ކޮއިމޮއި
ބެލުންތެރިންގެ އިތުރުން ފިލްމު އިންޑަސްޓްރީގެ ގިނަ ފިލްމީތަރިން އަދި ކްރިޓިކުން ވަރަށް ބޮޑު ތަރުހީބެއް ލިބުނު "ޓުވެލްތު ފެއިލް" އަކީ ނިކަމެތި ހާލުން އެކަމަކު ބުރަ މަސައްކަތުން ތައުލީމީ ހަރުފަތްތަކެއް ގިރާކޮށް ކާމިޔާބު ހޯދާ އައިޕީއެސް އޮފިސަރެއްގެ ވަޒީފާ ލިބުނު ޒުވާނެއްގެ ވާހަކަ ކިޔައިދިން ފިލްމެކެވެ.
މި ފިލްމުން ވިދޫ ވިނޯދު ޗޯޕްޅާއަށް މި އަހަރުގެ އައިފާ އެވޯޑް ޝޯގެ އެންމެ މޮޅު ޑައިރެކްޓަރުގެ އެވޯޑު ލިބިފައެވެ. މީގެއިތުރުން މި އަހަރުގެ ފިލްމު ފެއަ އެވޯޑު ޝޯއިން އެންމެ މޮޅު ފިލްމުގެ އެވޯޑާ އެކު އެންމެ މޮޅު ޑައިރެކްޓަރުގެ އެވޯޑު ވެސް ކާމިޔާބު ކުރީ "ޓުވެލްތު ފެއިލް"އެވެ. ފިލްމުފެއާ އެވޯޑުގެ ކްރިޓިކުން ހޮވާ އެންމެ މޮޅު އެކްޓަރުގެ އެވޯޑު ވެސް ލިބިފައި ވަނީ "ޓުވެލްތު ފެއިލް"ގެ އެކްޓަރު ވިކްރާންތު މަސޭއަށެވެ.