ދެކުނު އިރުމަތީ އޭޝިއާގައި ގޫގުލްގެ ޚިދުމަތްތައް އިތުރަށް ފުޅާކުރަން ތައިލެންޑުގައި ޑޭޓާ އަދި ކްލައުޑް ފްލެއާ ސެންޓަރުތަކެއް ބިނާކުރަން އާ އިންވެސްޓްމަންޓެއް ކުރަން ނިންމައިފިއެވެ.
ތައިލެންޑުގެ ބޮޑުވަޒީރު ޕެޓޮންގްޓާން ޝިނަވަޓްރާ އެކްސްގައި ކުރެއްވި ޕޯސްޓެއްގައި ވިދާޅުވީ، އަލްފަބެޓް އަދި ގޫގުލްގެ ޕްރެޒިޑެންޓް އަދި ޗީފް އިންވެސްޓްމަންޓް އޮފިސަރު ރުތު ޕޮރަޓް ތައިލެންޑުގައި އާ ޑޭޓާ ސެންޓަރެއް އިމާރާތްކުރަން އެއް ބިލިއަން ޑޮލަރު އިންވެސްޓްކުރަން ނިންމާފައިވާ ކަމަށެވެ.
މި އިންވެސްޓްމަންޓުގެ މަގުސަަދަކީ "ލީވިން ނޯ ތައި ބިހައިންޑް" ކޮންސެޕްޓުގެ ދަށުން ޑިޖިޓަލް އަދި އިޖުތިމާއީ ތަރައްގީގެ ދާއިރާއިން ގޫގުލްއާއި ތައިލެންޑު ސަރުކާރާ ދެމެދު މިހާރު އޮތް އެއްބާރުލުން އިތުރަށް ފުޅާކުރުމެވެ.
މީގެ ކުރިން، މެއި މަހު ގޫގުލުން ވަނީ މެލޭޝިއާގައި ދެ ބިލިއަން ޑޮލަރު އިންވެސްޓްކޮށް، އެ ގައުމުގައި ފުރަތަމަ ޑޭޓާ ސެންޓަރު އިމާރާތްކުރާނެ ކަމަށް އިއުލާނުކޮށްފައެވެ.
ތައިލެންޑުގެ ބޮޑުވަޒީރު ވަނީ މި އިންވެސްޓްމަންޓް ގެނައުމަށް ކުރީގެ ބޮޑުވަޒީރު ސްރެތާ ކުރެއްވި މަސައްކަތްޕުޅުތަކަށް ޝުކުރުއަދާކުރައްވާފައެވެ.
މި އިންވެސްޓްމަންޓަކީ ދެކުނު އޭޝިއާ ސަރަޙައްދުގައި ގޫގުލްގެ ހަރަކާތްތައް އިތުރަށް ފުޅާކުރުމަށް އަޅާ މުހިންމު ފިޔަވަޅެއް ކަމަށް ރިޕޯޓްތައް ބުނެއެވެ.