މުދަލަށް ގެއްލުންދީ، ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައެއްގައި، އަންހެނަކު ތަހުގީގު މަރުހަލާ ނިމެންދެން ބަންދުގައި ބަހައްޓަން ކްރިމިނަލް ކޯޓުން އިއްޔެ އަމުރުކޮށްފިއެވެ.
މި މައްސަލައިގައި ބަންދުގައި ބަހައްޓަން އަމުރުކުރީ ތ. ތިމަރަފުށި، ސަލްވާ، ފާތިމަތު ޝަހުދާ (30އ) އެވެ.
ކްރިމިނަލް ކޯޓުގެ އަމުރުގައި ބުނެފައިވާ ގޮތުގައި އޭނާ ބަންދުގައި ބަހައްޓަން އަމުރުކުރީ ކުށުގެ ތުހުމަތުކުރެވޭ މިންވަރަށް ހެކި ހުށަހަޅާފައިވުމުންނެވެ. އެގޮތުން މައްސަލަ ހުށަހަޅާ ފަރާތުން ފާހަގަކޮށްފައިވާ ގޮތުގައި ތޫނު އެއްޗަކުން ހަމަލާދިންކަމާއި، ފުލުހުން އޭނާ ހައްޔަރުކުރަން އުޅުނު ވަގުތު އޭނާ ވަޅި ބިންމައްޗަށް އެއްލާލިކަން ފުލުހުން ފާހަގަކުރި ކަމަށް އަމުރުގައި ބުނެފައިވެއެވެ.
އޭނާ ބަންދުގައި ބަހައްޓަންޖެހޭ ހާލަތެއްގެ ގޮތުގައި އަމުރުގައި ބުނެފައި ވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫގެ ދަށުން މުޖުތަމައުގެ ސަލާމަތާއި ރައްކާތެރިކަމަށްޓަކައެވެ.
ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދުގައި ބަޔާންކުރާ ކަންކަން ފުރިހަމަވާކަމަށް ބަލައި، އޭނާއަކީ ކުށުގެ ރެކޯޑު އޮތް ފަރާތެއް ކަމަށް ވެސް އަމުރުގައި ބަޔާންކޮށްފައިވެއެވެ. އެގޮތުން ބިރުދެއްކުމާއި ފޭރުމުގެ ކުށުގެ ރެކޯޑު އޭނާގެ އޮތް ކަމަށް ކޯޓު އަމުރުގައި ފާހަގަކޮށްފައިވެއެވެ.
އެހެންކަމުން ކޯޓުން އަމުރުކުރީ އެ މައްސަލައިގެ ތަހުގީގު ނިމެންދެން އޭނާ، ކަސްޓޯޑިއަލް ޖަލެއްގައި ބެހެއްޓުމަށެވެ.