ބޭންކް އޮފް މޯލްޑިވްސް (ބީއެމްއެލް)ގެ ކަސްޓަމަރުންގެ އެކައުންޓުން އެ ކުންފުނީގެ މުވައްޒަފަކު ފައިސާ ނެގިކަން ފާހަގަވުމާއެކު، ވަގުތުން ފިޔަވަޅު އަޅައި އެ ކަސްޓަމަރުންނަށް ބަދަލުދީފައިވާ ކަމަށް ބީއެމްއެލްއިން މިއަދު ބުނެފިއެވެ.
ބީއެމްއެލްގެ ކަސްޓަމާ ސާވިސްގައި މަސައްކަތް ކުރަމުން، އެކި ކަސްޓަމަރުންގެ އެކައުންޓުތަކުން ހަތަރު ލައްކައަށް ވުރެން ގިނަ ރުފިޔާ ވަގަށް ނެގިކަން ސާބިތުވާކަމަށް އެ ކުންފުނީގެ ކުރީގެ މުވައްޒަފެއްގެ މައްޗަށް ކްރިމިނަލް ކޯޓުން އިއްޔެ ވަނީ ހުކުމް ކޮށްފައެވެ.
މި މައްސަލައިގައި ކުށް ސާބިތުވެފައިވަނީ ބ. އޭދަފުށީ، ހިޔާވަހި، އަލީ މާޒިންގެ މައްޗަށެވެ.
މި މައްސަލައާ ގުޅިގެން ބީއެމްއެލްއިން ބުނީ، 2021ވަނަ އަހަރު ހިނގި މި މައްސަލަ ބޭންކަށް ފާހަގަވުމާއެކު ވަގުތުން އެ މުވައްޒަފު ވަޒީފާއިން އެކަހެރި ކުރި ކަމަށެވެ.
އަދި ބޭންކުން މި މައްސަލަ ބެލިއިރު މާޒިން ވަނީ އޭނާ އަދާކުރާ ވަޒީފާގެ ގޮތުން ލިބިފައިވާ ބާރުގެ ބޭނުން ނަހަމަ ގޮތުގައި ހިފައި، ކަސްޓަމަރުންގެ އެކައުންޓުން ފައިސާ ނަގައި، އަމިއްލައަށް ބޭނުންކޮށްފައި ކަމަށާއި އެހެންކަމުން އޭނާ ވަޒީފާއިން ވަކިކޮށްފައި ވާކަމަށް ބޭންކުން ބުންޏެވެ.
މާޒިންގެ މައްސަލަ 2021ވަނަ އަހަރުގެ ޑިސެމްބަރު ހަތް ވަނަ ދުވަހު ބީއެމްއެލްއިން ޕޮލިހަށް ހުށަހަޅާފައި ވާކަން އެ ކުންފުނިން ފާހަގަކުރިއެވެ. އަދި މިކަމާ ގުޅިގެން ކަސްޓަމަރުން އަތުން ގެއްލުނު ފައިސާ ވެސް އެ ކަސްޓަމަރުންގެ އެކައުންޓަށް ޖަމާކޮށްދީފައި ވާކަމަށް ބޭންކުން ބުންޏެވެ.
ބީއެމްއެލްއިން ބުނީ، ބޭންކުގައި ހިނގާފާނެ ނުރަނގަޅު އަމަލެއް ނުވަތަ އިހުމާލެއް ދެނެގަތުމަށް ބޭންކުގެ ގަވައިދުތަކާއި އުސޫލުތައް ހަރުދަނާކޮށް، އިންޓާނަލް ކޮންޓްރޯލްތައް ބޭންކުގައި ގާއިމްކޮށްފައިވާ ކަމަށެވެ. އަދި އެއްވެސް މުވައްޒަފަކު ގަވައިދާ ޚިލާފު ކަމެއް ކޮށްފިނަމަ އެކަމެއް ތަހުގީގުކޮށް އަޅަން ޖެހޭ އެންމެ ހަރުކަށި ފިޔަވަޅު ބޭންކުން އަބަދުވެސް އަޅާނެކަމުގެ ޔަގީންކަން އެ ބޭންކުން ވަނީ ދީފައެވެ.
"މުވައްޒަފެއްގެ އިހުމާލުން ނުވަތަ ގަވާއިދާ ޚިލާފަށް ކުރާ އަމަލަކުން ކަސްޓަމަރުންނަށް އެއްވެސް މާލީ ގެއްލުމެއް ނުވާނެ ކަމުގެ ޔަގީންކަން މި ފުރުސަތުގައި އަރުވަން،" ބޭންކުން ބުންޏެވެ.
ކްރިމިނަލް ކޯޓުން ކުރި ހުކުމުގައި ވަނީ، ކަސްޓަމާ ސާވިސް އޭޖެންޓެއްގެ ގޮތުގައި އޭނާ މަސައްކަތްކުރި ދުވަސްވަރު، އެ މަގާމުން ލިބިފައިވާ މައުލޫމާތާއި ބާރުގެ ބޭނުންކޮށްގެން މޭ 14، 2021އިން ފެށިގެން އެކި ދުވަސް މަތިން ޖުމުލަ 13 ކަސްޓަމަރެއްގެ މައުލޫމާތު ބީއެމްލްގެ ސިސްޓަމުން ބަދަލުކޮށް، ކަސްޓަމަރުންގެ ހުއްދަ ނެތި، އެ ކަސްޓަމަރުންގެ އިންޓަނެޓް ބޭންކިން ރަޖިސްޓްރީކޮށްފައިވާ ކަމަށެވެ.
އެ ކަސްޓަމަރުންގެ އެކައުންޓުން މާޒިންގެ އެކައުންޓަށް ވަނީ ބޮޑެތި އަދަދުތަކުން ފައިސާ ފޮނުވައިފައެވެ. އެ މީހުންގެ އެކައުންޓުތަކުން އެކި ފަހަރު މަތިން މާޒިންގެ އެކައުންޓަށް ޖުމުލަ 482،611.41 ރުފިޔާ ޖަމާކޮށްފައިވެއެވެ.