ބޭންކް އޮފް މޯލްޑިވްސް (ބީއެމްއެލް)ގެ ކަސްޓަމާ ސާވިސްގައި މަސައްކަތް ކުރަމުން، އެކި ކަސްޓަމަރުންގެ އެކައުންޓުތަކުން ހަތަރު ލައްކަ ރުފިޔާ ވަގަށް ނެގިކަން އެ ކުންފުނީގެ ކުރީގެ މުވައްޒަފެއްގެ މައްޗަށް ކްރިމިނަލް ކޯޓުގައި އިއްޔެ ސާބިތުވެއްޖެއެވެ.
މި މައްސަލައިގައި ދައުވާ އުފުލާފައިވަނީ ބ. އޭދަފުށީ ހިޔާވަހި، އަލީ މާޒިންގެ މައްޗަށެވެ.
އޭނާގެ މައްޗަށް ހުށަހެޅި ދައުވާގައިވަނީ ބީއެމްއެލްގެ ކަސްޓަމާ ސާވިސް އޭޖެންޓެއްގެ ގޮތުގައި އޭނާ މަސައްކަތްކުރި ދުވަސްވަރު، އެ މަގާމުން ލިބިފައިވާ މައުލޫމާތާއި ބާރުގެ ބޭނުންކޮށްގެން މޭ 14، 2021 އިން ފެށިގެން އެކި ދުވަސް މަތިން ޖުމުލަ 13 ކަސްޓަމަރެއްގެ މައުލޫމާތު ބީއެމްލްގެ ސިސްޓަމުން ބަދަލުކޮށް، ކަސްޓަމަރުންގެ ހުއްދަ ނެތި، އެ ކަސްޓަމަރުންގެ އިންޓަނެޓް ބޭންކިން ރަޖިސްޓްރީކޮށްފައިވާ ކަމަށެވެ.
އެ ކަސްޓަމަރުންގެ އެކައުންޓުން މާޒިންގެ އެކައުންޓަށް ވަނީ ބޮޑެތި އަދަދުތަކުން ފައިސާ ފޮނުވައިފައެވެ. އެ މީހުންގެ އެކައުންޓުތަކުން އެކި ފަހަރު މަތިން މާޒިންގެ އެކައުންޓަށް ޖުމުލަ 482،611.41 ރުފިޔާ ޖަމާކޮށްފައިވެއެވެ.
ދައުވާގައި ބުނާ ގޮތުން އޭނާ އެ ފައިސާ ބޭނުންކުރީ ފޮރެކްސް ޓްރޭޑުގެ މުއާމަލާތްތައް ކުރާށެވެ.
އެހެންވެ، އޭނާގެ މައްޗަށް ދައުލަތުން އުފުލީ ޚިޔާނާތުގެ ކުށުގެ ދައުވާއެވެ. އޭނާ ވަނީ ދައުވާއަށް އިއުތިރާފުވެ، ޕްރޮސެކިއުޓާ ޖެނެރަލް (ޕީޖީ)ގެ އޮފީހާ އެކު އިއުތިރާފުގެ އެއްބަސްވުމެއް ހަދައިފައެވެ.
ޖިނާއަތުގެ ހަތަރުވަނަ ދަރަައިޖައިގެ މި ކުށަށް ކަނޑައެޅިފައި އޮންނަ އަސާސީ އަދަބަކީ އެއް އަހަރާއި ހަތް މަަހާއި ހަ ދުވަހަށް ޖަލަށްލުމެވެ. އިއުތިރާފުގެ އެއްބަސްވުމުގެ ދަށުން އޭނާއަށް އަންނާނެ ލުއި އަދަބަކީ ނުވަ މަހާއި 18 ދުވަހުގެ ޖަލު ހުކުމެކެވެ.
އެކަމަކު، އޭނާގެ އަދަބު ލުއިކޮށް، 40 ގަޑިއިރު މުޖުތަމަޢަށް ޚިދުމަތް ކުރުމާ އެކު 56،200 ރުފިޔާއިން ޖޫރިމަނާ ކުރަން ކްރިމިނަލް ކޯޓުން އިއްޔެ ވަނީ ހުކުމްކޮށްފައެވެ. އަދި، ގެއްލުމުގެ ބަދަލުގެ ގޮތުގައި ބީއެމްއެލްއާ ދެމެދު ވެފައިވާ އެއްބަސްވުމާ އެއްގޮތަށް ފައިސާ ދައްކަން ވެސް ވަނީ ހުކުމްކޮށްފައެވެ.
އެ ކޯޓުގައި މި މައްސަލަ ބެއްލެވީ ގާޒީ އާމިނަތު އަޒްލިފާއެވެ.