އިންޑިއާގެ ޓެލެވިޒަން ތަރި އަދި ޝޯ ހޯސްޓު އަރުޖުން ބިޖްލާނީ އާއި އަންހެނުން ނޭހާ ސްވާމީ ޗުއްޓީ ހޭދަކޮށްލުމަށް ރާއްޖެ އަތުވެއްޖެއެވެ.
މި ދެމަފިރިން ޗުއްޓީ ހޭދަކުރަމުން އަންނަނީ ފަސް ތަރީގެ ރިސޯޓެއް ކަމަށްވާ އެމެރަލްޑް މޯލްޑިވްސް ރިސޯޓު އެންޑް ސްޕާގައެވެ. އެމެރަލްޑް މޯލްޑިވްސް ރިސޯޓު އެންޑް ސްޕާގައި އާއިލާއާ އެކު ނަގާފައިވާ ފޮޓޯތައް ހިއްސާ ކުރަމުން އަރުޖުން ބުނެފައި ވަނީ ހުވަފެނީ ދުނިޔެއެއްގައި އުޅެވޭ ކަހަލަ އިހުސާސްތަކެއް ކުރެވޭ ކަމުގައެވެ.
މިއީ އަރުޖުން ރާއްޖެ ޒިޔާރަތްކުރި ފުރަތަމަ ފަހަރެވެ.
އަރުޖުން އާއި ނެހާ ރާއްޖޭގައި--ފޮޓޯ/ޕޭސްބުކް
އަރުޖުން ރާއްޖެއަށް ޗުއްޓީ ހޭދަކޮށްލަން ޒިޔާރަތްކޮށްފައިވާއިރު މިއަހަރު ކުރީކޮޅު އިންޑިއާގައި ރާއްޖޭގެ ޓޫރިޒަމް ބޮއިކޮޓް ކުރަން ހިންގި ސޯޝަލް މީޑިއާ ކެމްޕޭނުގައި ރާއްޖެ ދުވަހަކު ވެސް ނާންނާނެ ކަމަށް ބުނެ އަރުޖުން ވަނީ ޕޯސްޓުކޮށްފައެވެ. އަރުޖުން އޭރު ކުރި ޕޯސްޓުގައި ބުނެފައި ވަނީ ދުވަހަކު ވެސް ރާއްޖެ ނާންނަ ކަމަށާއި ދުވަހަކު ވެސް ރާއްޖެ ނާންނާނެ ކަމަށެވެ.
އަރުޖުން ކުރިން ބުނެފައި ވަނީ ދުވަހަކުވެސް ރާއްޖެ ނާންނާނެ ކަމަށް--ފޮޓޯ/ފޭސްބުކް
މީގެއިތުރުން އިންޑިއާގެ ނޯތު އީސްޓުގެ ރީތިކަން ވަކި ކުޑަ ނޫން ކަމަށާއި އިސްކަން ދޭނީ އިންޑިއާގެ ރަށްތަކަށް ދަތުރުކުރުމަށް ކަމަށް އަރުޖުންގެ ޕޯސްޓުގައި ބުނެފައިވެއެވެ.
އިންޑިއާގެ އެންމެ އަގުބޮޑު ޓެލެވިޒަން އެކްޓަރުންގެތެރޭ ހިމެނޭ އަރުޖުންގެ މަގުބޫލު ޓީވީ ސިލްސިލާތަކުގެތެރޭ "މެރީ އާޝިޤީ ތުމްސެ ހޭ"، "އިޝްޤް މެ މަރުޖާވާ" އަދި "ނާގިން" ހިމެނެއެވެ. ޓީވީ ސިލްސިލާތަކުން ފެނުމުގެ އިތުރުން އަރުޖުން އަކީ ވަރަށް ގިނަ ޓީވީ ޝޯ އަދި އެވޯޑު ހަފުލާތައް ހޯސްޓުކޮށްފައިވާ މީހެކެވެ.