މިދިޔަ ހޮނިހިރު ދުވަހުގެރޭ ދުބާއީގައި ބޭއްވި މި އަހަރުގެ އައިފާ އެވޯޑް ޝޯގެ އެންމެ މޮޅު އެކްޓަރުންގެ އެވޯޑު ދެ ކެޓަގަރީއިން ބަތަލާ ރާނީ މުކަރުޖީ އާއި އެކްޓަރު ޝާހްރުކް ޚާންއަށް ލިބިއްޖެއެވެ.
ރާނީއަށް އެންމެ މޮޅު ބަތަލާގެ އެވޯޑު ލިބުނީ މިދިޔަ އަހަރު ރިލީޒްވި ފިލްމު "މިސިޒް ޗެޓަޖީ ވާސަސް ނޯވޭ"ގައި ކުޅުނު ރޯލަށެވެ. ޝާހުއަށް އެންމެ މޮޅު އެކްޓަރުގެ އެވޯޑު ލިބުނީ މިދިޔަ އަހަރު ރިލީޒްކޮށް ބޮޑު ކާމިޔާބީއެއް ބޮކްސް އޮފީހުގައި ހޯދި ފިލްމު "ޖަވާން"ގައި ކުޅުނު ރޯލަށެވެ.
ރާނީއަށް މި އަހަރުގެ އައިފާ އެވޯޑްސްގެ އެންމެ މޮޅު ބަތަލާގެ ރޯލް ލިބިފައި މިވަނީ މި އަހަރުގެ ފިލްމުފެއަ އެވޯޑުގައި އެންމެ މޮޅު ބަތަލާގެ އެވޯޑް ރާނީއަށް ދީފައި ނުވާތީ ގިނަ ބަޔަކު ފާޑުކިޔާފައި ވަނިކޮށެވެ.
ފިލްމުފެއަ އެވޯޑު ޝޯގައި ޝާހްރުކް ޚާން. މި ހަފްލާގެ ހޯސްޓުންގެތެރޭ ވެސް ޝާހު ހިމެނޭ--ފޮޓޯ/ޓެލެގްރާފްއިންޑިއާ
އެންމެ މޮޅު ބަތަލާގެ އެވޯޑާ ހަވާލުވުމަށް ފަހު ރާނީ ބުނެފައި ވަނީ ކުރިއަށްއޮތް ތަނުގައި ވެސް މަސައްކަތް ކުރާނީ އިންޑިއާގެ އަންހެންވެރީންގެ ދިރިއުޅުމަށް ހެޔޮ ބަދަލުތަކެއް ގެނެވޭނެ ކަހަލަ ރޯލްތައް ކުޅުމަށް ކަމަށެވެ.
ހަގީގީ ހާދިސާއެއްގެ މައްޗަށް ބިނާކޮށް އުފެއްދި ފިލްމު "މިސިޒް ޗެޓަޖީ ވާސަސް ނޯވޭ" ނޮމިނޭޓްވެ ބަތަލާއަށް އެވޯޑު ލިބުމަކީ ބައިނަލްއަޤްވާމީ ދުނިޔޭގެ ގިނަ ބަޔަކު ފިލްމު ބަލައިގަނެފައިވާކަން ދޭހަކޮށްދޭ ކަމެއް ކަމަށް ރާނީ ވަނީ ބުނެފައެވެ.
އެންމެ މޮޅު އެކްޓަރުގެ އެވޯޑާ ހަވާލުވަމުން ޝާހު ވަނީ އެ ކެޓަގަރީއަށް ނޮމިނޭޓްވި އެކްޓަރުން ކަމަށްވާ ރަންވީރު ސިންގް، ރަންބީރު ކަޕޫރު، ވިކީ ކޯޝަލް، ސަނީ ޑިއޯލް އަދި ވިކްރާންތު މަސޭއަށް މަރުހަބާ ކިޔާފައެވެ.
އެ ހުރިހާ އެކްޓަރުން ނޮމިނޭޓްވި ފިލްމުތަކުގައި ވެސް ދެއްކި އެކްޓިންގް ހުނަރަށް ތައުރީފު ކުރަމުން ޝާހު ބުނީ މި އަހަރުގެ އައިފާ އެވޯޑު ކާމިޔާބު ކުރެވުނީ ދިގު މުއްދަތަކަށްފަހު ބެލުންތެރިންނަށް ޝާހުގެ ފިލްމެއް ގެނެވުމުން ކަމަށް ގަބޫލުކުރާ ކަމުގައެވެ.
އައިފާ އެވޯޑުގެ މި އަހަރުގެ އެންމެ މޮޅު ފިލްމަކަށް "އެނިމަލް" ހޮވުނުއިރު އެންމެ މޮޅު ޑައިރެކްޓަރުގެ އެވޯޑު ކާމިޔާބުކޮށްފައި ވަނީ "ޓުވެލްތު ފެއިލް"ގެ ޑައިރެކްޓަރު ވިނޯދު ޗޯޕްޅާއެވެ. މި އަހަރު ފިލްމު އިންޑަސްޓްރީއަށް ތައާރަފްވި އެންމެ މޮޅު ފަންނާނުގެ އެވޯޑު ސަލްމާން ޚާންއަށް ބޮޑު ބޭބެ ކިޔާ އަލިޒޭ އަގްނިހޯތުރީ ކާމިޔާބުކުރިއިރު މި އަހަރުގެ އައުޓްސްޓޭންޑިން އެޗީވްމަންޓްއިން އިންޑިއަން ސިނެމާގެ ޝަރަފު އަރުވާފައި ވަނީ ހެމާ މާލިނީއަށެވެ.