ކުއްޔަށް ނެގި ދެ ދޯންޏަކަށް ދައްކަންޖެހޭ ފައިސާއަށް މަކަރު ހެދި މީހަކު އެއް އަހަރަށް ޖަލަށްލާން ކްރިމިނަލް ކޯޓުން ހުކުމް ކޮށްފިއެވެ.
މި މައްސަލައިގައި ހުކުމް ކޮށްފައިވަނީ ސ. ހުޅުދޫ ބުލޫބެލް، އަޙުމަދު ފިރާގުގެ މައްޗަށެވެ.
ފިރާގުގެ މައްޗަށް ހުށަހަޅާފައިވާ ދައުވާގައި ބުނެފައިވަނީ އަމާޒު ދޯންޏާއި އަމާޒު ކްރައުން ދޯނި ކުއްޔަށް ނެގުމަށްފަހު، އެ ދޯނިތަކުގެ ކުލި ދެއްކުމުގައި ފިރާގުގެ ނަމުގައި ހުޅުވާފައިވާ ބޭންކް އެކައުންޓުން 7،770 އެމެރިކާ ޑޮލަރު ނެގޭގޮތަށް ސޮއިކޮށް، އޭނާ ޗެކެއް ދިން ކަމަށެވެ. އެހެން ނަމަވެސް ދޯނިތަކުގެ ވެރިފަރާތުން އެ ޗެކު ބޭންކަށް ހުށަހެޅުމުން، އެކައުންޓުގައި ފައިސާ ނެތް ކަމަށް އަންގާފައިވާ ކަމަށެވެ.
މި ދައުވާއަކީ ދޯނިތަކުގެ ވެރިފަރާތަށް ލިބެންވާ ފައިސާ ދެއްކުމަށް ފިރާގަށް އެންގި ނަމަވެސް، ހަތް ދުވަސް ތެރޭގައި އޭނާ އެ ފައިސާ ދައްކާފައިނުވާތީ، އޭނާގެ މައްޗަށް އުފުލާފައިވާ މަކަރާއި ހީލަތް ހެދުމުގެ ކުށުގެ ދައުވާއެކެވެ.
ކޯޓުގައި ފިރާގު ބުނެފައިވަނީ އޭނާ ދިން ޗެކް ރިޓާންވީ ބޭރުން ޕޭމަންޓް ނައިސްގެން ކަމަށާއި، އޭގެ ފަހުން އެކި ފަހަރުމަތިން ދޯނިތަކުގެ ވެރިފަރާތަށް ފައިސާ ދީފައިވާ ކަމަށެވެ. އެހެން ނަމަވެސް އެ ހުރިހާ ފައިސާއެއް ހަމަޔަށް ދެވިފައިނުވާކަން އޭނާ ފާހަގަ ކުރިއެވެ. އޭގެ ތެރެއިން ބާކީ ދައްކަންޖެހެނީ 70،000 ދިވެހި ރުފިޔާ ކަމަށާއި، މިހާރު އެ ފައިސާ ދައްކަމުންދާ ކަމަށް އޭނާ ކޯޓުގައި ބުންޏެވެ.
އަދި ފައިސާ ދެއްކި ޓްރާންސްފާ ސްލިޕްތައް ވެސް ހުންނާނެ ކަމަށްބުނެ، ފިރާގުވަނީ އޭނާގެ މައްޗަށް ކޮށްފައިވާ މަކަރާއި ހީލަތް ހެދުމުގެ ދައުވާއަށް އިންކާރުކޮށްފައެވެ. އެހެން ނަމަވެސް ކޯޓުން ބުނެފައިވަނީ ފިރާގު ދައްކަންޖެހޭ 7،770 ޑޮލަރުގެ ތެރެއިން އެއްވެސް ފައިސާއެއް އޭނާ ދެއްކި ކަމުގެ އެއްވެސް ލިޔުމެއް ކޯޓަށް ހުށަހަޅާފައިނުވާ ކަމަށެވެ.
އެހެން ކަމުން ކޯޓުން ކަނޑައަޅާފައިވަނީ ޝައްކެއް ނެތް މިންވަރަށް ފިރާގުގެ މައްޗަށް މަކަރާއި ހީލަތްހެދުމުގެ ދައުވާ ސާބިތުވާ ކަމަށެވެ.
އެހެން ކަމުން ކޯޓުން ފިރާގުގެ މައްޗަށް ހުކުމްކޮށްފައިވަނީ އެއް އަހަރާއި ހަތް މަހާއި ހަ ދުވަހުގެ މުއްދަތަށް ޖަލަށް ލުމަށެވެ.