ތޮރާއަކީ ދިވެހީން ކެއުމަށް ވަރަށް ގިނައިން ބޭނުންކުރާ ތަރުކާރީއެކެވެ. މި ތަރުކާރީގެ ބާވަތަކީ ގޭގައި ފަސޭހައިން ހައްދާލެވޭ ބާވަތަކަށްވުމުން އާއްމުކޮށް ކެއުމުގައި ބޭނުންކުރެވޭ މިންވަރު ވެސް ގިނައެވެ.
އާއްމު ގޮތެއްގައި ރާއްޖޭގައި ތޮރާ ކައިއުޅެނީ ރިހަ ނުވަތަ ކިރުގަރުދިޔަ ކައްކައިގެންނެވެ. މަދުން ނަމަވެސް ބައެއް ކަހަލަ ސަޓަނިތައް އަދި މަސްހުނި ވެސް ތޮރާ ބޭނުންކޮށްގެން ތައްޔާރުކުރެއެވެ. ތޮރާއަކީ ހަށިގަނޑަށް ވަރަށް ގިނަ ސިއްހީ ފައިދާތަކެއް ހޯދުމަށް މަގުފަހިކުރުވާ ތަރުކާރީއަކަށްވާއިރު މިއީ އާދަވެގެން ކެއުމުގައި ހިމަނާލުން މުހިއްމު ބާވަތެކެވެ.
ތޮރާއިން ހަށިގަނޑަށް ލިބޭ މުހިއްމު ސިއްހީ ފައިދާތަކަށް ބަލާއިރު މިއީ މޭގަނޑު، ބަނޑު އަދި ގުރުދާއަށް ވަރަށް ރަނގަޅު ތަރުކާރީގެ ބާވަތެކެވެ. މީގެ އިތުރުން، ތޮރާއަކީ ބަނޑު ސާފުކޮށްލަދިނުމަށް ވެސް އެހީތެރިވެދޭ ތަރުކާރީއެކެވެ. ހަމައެއާ އެކު އަރިދަފުސް ބޭރުކޮށްލަދީ ލޭމަނާކުރުމަށް ވެސް މި ތަރުކާރީ ކެއުމުން އެހީތެރިވެދެއެވެ.
ތޮރާ އާއްމުކޮށް ދިވެހީންގެތެރޭ ބޭނުންކުރަނީ ކިރުގަރުދިޔަ ކެއްކުމަށް--ފޮޓޯ/ ލޮނުމެދު
ތޮރައަކީ ހަށިގަނޑުން ހޫނު ބޭރުކޮށްލަދީ ހަށިގަނޑު ފިނިކޮށްދޭ ބާވަތެއްގެ އިތުރުން ހަށިގަނޑުން ވިހަ މާއްދާތައް ބޭރުކުރުމަށް ވެސް އެހީތެރިވެދޭ ބާވަތެކެވެ. ފަންގަސްއާއި ދެކޮޅަށް މަސައްކަތް ކުރުމުގެ ބާރު މި ތަރުކާރީއަށް ލިބިފައިވާއިރު މިއީ ނޭވާ ހިއްލުމުގެ ބަލި ތަހައްމަލުކުރާ މީހުންނަށް ވެސް ބޭނުންކުރެވިދާނެ ތަރުކާރީގެ ބާވަތެކެވެ.
ހަކުރު ބަލި ހުންނަ މީހުންނަށް ވެސް މިއީ ވަރަށް ގިނަ ފައިދާތަކެއް ލިބޭ ބާވަތެކެވެ.
އޭގެ ތެރޭގައި ހަށިގަނޑުގައި ލޭ ދައުރުވާ މިންވަރު އެއްވަރެއްގައި ބެހެއްޓުމަށް ތޮރާ ކެއުމުން އެހީތެރިވެދެއެވެ. ހަމައެއާ އެކު ގައިގެ ހަންގަނޑު ރީތިކޮށްދީ، ބޮލުން އިސްތަށި ފައިބާ ނަމަ މިއީ އެ ކަމަށް ވެސް ހައްލެއް ހޯދައިދިނުމަށް އެހީތެރިވެދޭނެ ބާވަތެކެވެ.
މިއީ ރާއްޖެއިން ހެޔޮ އަގުގައި ފަސޭހައިން ލިބެން ހުންނަ ތަރުކާރީގެ ބާވަތަކަށްވުމުން ކޮންމެ ދުވަހެއްގެ ކެއުމުގައި ވެސް ހިމަނާލެވިދާނެއެވެ. ނުހިމަނާ ދޫކޮށްލާވަރެއް ނޫނެވެ.