ރައީސް ޑރ. މުޙައްމަދު މުޢިއްޒު އދ ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު، މިއަދު މާލެއަށް ވަޑައިގެންފިއެވެ.
ރައީސް އޮފީހުން ބުނި ގޮތުގައި، ދަތުރުފުޅު ނިންމަވާލެއްވުމަށް ފަހު އެ މަނިކުފާނު ނިއުޔޯކުން މާލެއަށް ވަޑައިގަތީ މިއަދު ހެނދުނުގެ ވަގުތެއްގައެވެ.
މި ދަތުރުފުޅުގައި ރައީސް މުޢިއްޒު ވަނީ އދ މަޖިލީހުގެ 79 ވަނަ ދައުރުގެ އާންމު ބަހުސްގައި ވާހަކަފުޅު ދައްކަވާފައެވެ. އަދި، އެ މަނިކުފާނު ވަނީ ސެކިއުރިޓީ ކައުންސިލުގައި ވެސް ވާހަކަފުޅު ދައްކަވާފައެވެ.
ރާއްޖެ އދ ގެ މެންބަރަކަށްވީތާ 59 އަހަރު ވެފައިވާއިރު، މިއީ ދިވެހި ރައީސަކު ސެކިއުރިޓީ ކައުންސިލްގައި ވާހަކަފުޅު ދެއްކެވި ފުރަތަމަ ފަހަރެވެ. އޭގެ އިތުރުން، ރައީސް ވަނީ އެކި ބަޔާންތައް އިއްވަވާ، އެތައް ސައިޑްލައިން އިވެންޓްތަކެއްގެ ރިޔާސަތު ވެސް ބަލަހައްޓަވާފައެވެ.
މި އިވެންޓްތަކުގައި މޫސުމަށް އަންނަ ބަދަލުތަކާއި، އިއާދަކުރަނިވި ހަކަތައާއި، އިޖުތިމާއީ އަދި އިގުތިސާދީ ގޮންޖެހުންތަކާއި، ޑިޖިޓަލައިޒޭޝަން ފަދަ މުހިންމު މައްސަލަތަކަށް އެ މަނިކުފާނު ވަނީ އަލިއަޅުއްވާލައްވާފައެވެ.
ރައީސް ވަނީ އދ ގެ މަޖިލީހުގެ 79 ވަނަ ދައުރަށް ވަޑައިގެންނެވި އެކި ގައުމުތަކުގެ ވަފުދުތަކުގެ އިސްވެރިންނާ ބައްދަލުކުރައްވާ، ގިނަ ބޭފުޅުންތަކަކާ އެކު ބައްދަލުވުންތައް ބާއްވަވާފައެވެ.
މީގެ ތެރޭގައި، އދ ގެ ސެކްރެޓަރީ ޖެނެރަލް އަންޓޯނިއޯ ގުޓެރެސްއާ އެ މަނިކުފާނު ބައްދަލުކުރައްވާފައިވާއިރު ނިއުޔޯކުގައި ދިރިއުޅުއްވާ ދިވެހި ރައްޔިތުންނާ ވެސް އެ މަނިކުފާނު ވަނީ ބައްދަލުކުރައްވާފައެވެ.
މީގެ އިތުރުން، ރައީސް މުޢިއްޒު ވަނީ ޕްރިންސްޓަން ޔުނިވާސިޓީގެ "ޑީންސް ލީޑާޝިޕް ސީރީޒް"ގެ ދަށުން ޕްރިންސްޓަން ސްކޫލް އޮފް ޕަބްލިކް އެންޑް އިންޓާނޭޝަނަލް އެފެއާޒްގައި ވާހަކަފުޅު ދައްކަވާފައެވެ. އަދި، ނިއުޔޯކުގައި ހުންނަ ގޫގުލްގެ އޮފީހަށް ޒިޔާރަތްކުރައްވާ އެ މަނިކުފާނު ވަނީ އެ އޮފީސް ބައްލަވާލައްވާފައެވެ.