ކަލާސް ޗެނަލްއިން ގެނެސްދިން "ބިގް ބޮސް"ގެ 17 ވަނަ ސީޒަން ކާމިޔާބުކުރި މުނައްވަރު ފާރޫޤީ ހަތް ލައްކަ ޑޮލަރުގެ އަގުހުރި ލަގްޒަރީ އެޕާޓްމަންޓެއް ގަނެފިއެވެ.
މުނައްވަރު ގަނެފައިވާ އެޕާޓްމަންޓަކީ އިންޑިއާގެ މުމްބާއީގެ އެންމެ އަގު ބޮޑު ސަރަހައްދުގައި ހުރި 40 ބުރީގެ އިމާރާތަކުން ގަނެފައިވާ އެޕާޓްމަންޓެކެވެ. މި ސަރަޙައްދަކީ ރިއަލް އެސްޓޭޓް ވިޔަފާރީގައި މަސައްކަތްކުރާ ހައި ޕްރޮފައިލް ގިނަ ބަޔަކު ޕްރޮޕަޓީތަކެއް ގަނެފައިވާ ސަރަހައްދެކެވެ.
ރިޕޯޓުތައް ބުނާގޮތުން މުނައްވަރު ވަނީ މި އެޕާޓްމަންޓު ގަތުމަށް 36 ލައްކަ ރުޕީސް ޑިއުޓީގެ ގޮތުގައި ދެއްކުމަށް ފަހު ރެޖިސްޓްރޭޝަން ފީގެ ގޮތުގައި ވެސް 30،000 ރުޕީސް ދައްކާފައެވެ.
މުނައްވަރު އަދި ޓެލެވިޒަން ބަތަލާ ހީނާ ޚާން އެކީގައި ކުޅުނު މިއުޒިކް ވީޑީއޯއެއްގައި--ފޮޓޯ/ބޮލީވުޑްހަންގާމާ
މިއީ މުނައްވަރު ދިރިއުޅެން ގަނެފައިވާ އެޕާޓްމަންޓެއް ކަމެއް ނުވަތަ އޭނާ ރިއަލް އެސްޓޭޓް ވިޔަފާރީގެ ތެރެއަށް ވަންނަން ގަނެފައިވާ ތަނެއް ކަމެއް އަދި ކަށަވަރެއް ނުވެއެވެ.
މިދިޔަ އަހަރު "ބިގް ބޮސް 17" ކާމިޔާބުކުރުމާ ގުޅިގެން މުނައްވަރަށް ކޭޝް ޕްރައިޒްގެ ގޮތުގައި ވަނީ 59،000 އެމެރިކާ ޑޮލަރުގެ ފައިސާ ލިބިފައެވެ. މީގެ އިތުރުން، އަގު ބޮޑު ޓްރޮފީއާ އެކު މުނައްވަރަށް ވަނީ އެންމެ ފަހުގެ ހައިޔުންޑާ ކާރެއް ވެސް އިނާމެއްގެ ގޮތުގައި ލިބިފައެވެ.
ދާދި ފަހުން ދެވަނަ ކައިވެންޏެއް ވެސް ކޮށްފައިވާ މުނައްވަރަކީ ސްޓޭންޑް އަޕް ކޮމޭޑިއަންއެއްގެ އިތުރުން ލަވަ ކިޔުމުގެ ދާއިރާގައި ވެސް މަސައްކަތް ކުރަމުން އަންނަ މީހެކެވެ.
"ބިގް ބޮސް" ކާމިޔާބުކުރުމުގެ ކުރިން އޭނާ ވަނީ 2022 ވަނަ އަހަރު ގެނެސްދިން ރިއަލިޓީ ޝޯ 'ލޮކް އަޕް 1'ވެސް ކާމިޔާބުކޮށްފައެވެ. އޭނާ ހިންގާ ޔޫޓިއުބް ޗެނަލްގެ ވިއުސް 5.25 މިލިއަނަށް އަރާއިރު މި ޔޫޓިއުބް ޗެނަލްއިން އެކަނި ވެސް މަހެއްގެ މައްޗަށް 800،000 ރުޕީސް މުނައްވަރަށް ލިބެއެވެ.