އިންޑިއާގެ އެންމެ ވަރުގަދަ އެއް ފިލްމު ކުންފުނި ކަމަށްވާ ޔަޝް ރާޖް ކުންފުނީގެ ކާމިޔާބު ފްރެންޗައިޒް "ދޫމް"ގެ ހަތަރުވަނަ ބައިގެ ލީޑް ތަރިއަކީ ރަންބީރު ކަޕޫރު ކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ގެނެސްދޭ ޕިންކްވިލާގައި ބުނެފައިވާ ގޮތުގައި "ދޫމް 4"ގެ ސްކްރިޕްޓް ތައްޔާރުކުރުމުގެ މަރުހަލާ ކުރިއަށްދާއިރު މި ފިލްމަށް ރަންބީރު ގެނައުމުގެ މަޝްވަރާތައް ކުރިއަށްދާތާ ވަރަށް ގިނަ ދުވަސްވެއްޖެއެވެ.
މިއީ ރަންބީރުގެ ކެރިއަރުގެ 25 ވަނަ ފިލްމަށްވެފައި ފިލްމުގެ ޑައިރެކްޓަރަކީ ރަންބީރުގެ ގާތް އެކުވެރިއެއް ކަމަށްވާ އަޔާން މުކަރުޖީއަށްވުމީ ވެސް އިއްޔެ 42 އަހަރު ފުރުނު އެކްޓަރު މި ފިލްމަށް އެއްބަސްވާން ބޭނުންވާ އެންމެ ބޮޑު އެއް ސަބަބު ކަމަށް ރިޕޯޓުތައް ބުނެއެވެ. އަޔާން މުކަރުޖީގެ ކެރިއަރުގެ އެންމެ ކާމިޔާބު ފިލްމު ކަމަށްވާ "ބްރައްމަސްތުރާ"ގެ އެކްޓަރަކީ ވެސް ރަންބީރެވެ.
ރަންބީރު ކަޕޫރު އަންހެނުން/ބަތަލާ އާލިއާ ބަޓް އަދި ޑައިރެކްޓަރު އަޔާން މުކަރުޖީއާ އެކު--ފޮޓޯ/ ބޮލީވުޑްހަންގާމާ
ފިލްމު "ދޫމް 4"އިން ރަންބީރު ފެންނާނެކަމުގެ ވާހަކަތައް ދެކެވޭއިރު ބެލުންތެރިން މާޔޫސްކުރުވާނެ އަނެއް ޚަބަރަކީ ކުރިން މި ފްރެންޗައިޒްއިން ފެނުނު މުހިއްމު ދެ ތަރިން ގެއްލޭކަމެވެ. "ދޫމް" ފިލްމުތަކުގެ އެންމެ މަގުބޫލު އެއް ދެ ތަރިން ކަމަށްވާ އަބީޝެކް ބައްޗަންއާއި އުދޭ ޗޯޕްޅާ ހަތަރުވަނަ ފިލްމުން ނުފެންނާނެ ކަމަށް ރިޕޯޓުތައް ބުނެއެވެ.
ފިލްމު "ދޫމް"އަކީ ޕްރޮޑިއުސަރު އަދިތިޔަ ޗޯޕްޅާ ވަރަށް މުހިއްމުކަމެއް ދީގެން އުފައްދާ ފިލްމަކަށްވުމުން ރަންބީރާ އެކު އަދިތިޔަ ނިންމާފައިވަނީ ޒުވާން އާ ދެ ތަރިން ފިލްމަށް ގެންނަން ކަމަށް ރިޕޯޓުތައް ބުނެއެވެ.
މިދިޔަ އަހަރު ރިލީޒްކުރި ފިލްމު "އެނިމަލް"އަށް ފަހު ރަންބީރު މިވަގުތު މަސައްކަތް ކުރަމުން އަންނަނީ ނިތޭޝް ތިވާރީގެ ޓްރިލޮޖީ ފިލްމެއްގައެވެ. މި ފިލްމުގެ މަސައްކަތް ނިންމާލުމަށް ފަހު ރަންބީރު އެންމެ އަވަހަށް ފަށަން ނިންމާފައިވަނީ ސަންޖޭ ލީލާ ބަންސާލީގެ ފިލްމު "ލަވް އެންޑް ވޯ"ގެ މަސައްކަތެވެ.