ޒުވާނުންގެ މެދުގައި ވަރަށް ބޮޑު މަގުބޫލުކަމެއް ހޯދި ޑައިރެކްޓަރު ޒީޔާ އަޚްތަރުގެ ފިލްމު "ގައްލީ ބޯއި"ގެ ސީކުއަލްއެއް އުފައްދަން ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.
މީގެ ހަ އަހަރުކުރިން ރިލީޒްކުރި މި ފިލްމުގެ ލީޑް ތަރިންގެ ގޮތުގައި އެކްޓަރު ރަންވީރު ސިންގް އަދި އާލިއާ ބަޓް ފެނުނު ނަމަވެސް ދެވަނަ ބައިގެ ކާސްޓުންނަށް ގެންނަން މަޝްވަރާ ކުރަނީ ފިލްމީ ތަރިން ކަމަށްވާ އަނަނިޔާ ޕާންޑޭ އަދި ވިކީ ކޯޝަލް ކަމަށް ރިޕޯޓުތައް ބުނެއެވެ.
ފިލްމުގެ ކާސްޓުންނަށް ބޮޑު ބަދަލެއް ގެންނައިރު ޒޯޔާގެ ބަދަލުގައި ދެވަނަ ބައި ޑައިރެކްޓް ކުރާނީ އަނަނިޔާ މުހިންމު ރޯލެއް ކުޅުނު ފިލްމު "ކޯ ގަޔޭ ހަމް ކަހާ"ގެ ޑައިރެކްޓަރު އަރުޖުން ވަރައިން ކަމަށް ފިލްމުފެއާގައި ވަނީ ބުނެފައެވެ.
ފިލްމީ ޚަބަރުތައް ބުނާގޮތުން "ގައްލީ ބޯއި"ގެ ސީކުއަލްއަށް މުޅިން އާ ތަރިންތަކެއް ގެންނަން ނިންމީ މި ފިލްމުގެ ކެރެކްޓާތައް މުޅިން އާވެފައި ފުރަތަމަ ބަޔާ މާ ބޮޑު ގުޅުމެއް ނެތުމުންނެވެ.
އާލިއާ ބަޓް އަދި ރަންވީރު ސިންގް ފިލްމު "ގައްލީ ބޯއި"ގެ މަންޒަރެއްގައި--ފޮޓޯ/ކޮއިމޮއި
ޑައިރެކްޓަރު އަރުޖުނާ ހަވާލާދީ ފިލްމުފެއާއިން ބުނެފައިވަނީ، ބަތަލާ އަނަނިޔާއަށް ހުށަހެޅުނު ރޯލަށް ފުރިހަމައަށް އިންސާފުކުރާނެކަމުގެ ޔަގީންކަން އެބައޮތް ކަމަށާއި ފިލްމާ ގުޅޭ މަޝްވަރާތައް އެކްޓަރު ވިކީ ކޯޝަލްއާ އެކު ކުރިއަށްގެންދާތާ މިހާރު ވަރަށް ގިނަ ދުވަސްވެފައިވާ ކަމަށެވެ.
ރަންވީރު ސިންގް، އާލިއާ ބަޓް، ކަލްކީ އަދި ސިދާތު ޗަތުރުވެދީ މުހިންމު ރޯލެއް ކުޅުނު ފިލްމު "ގައްލީ ބޯއި"އަކީ މިއުޒިކަލް ޑްރާމާއެކެވެ. މި ފިލްމަކީ އިންޑިއާގެ ފަގީރު ހިސާބެއްގައި ދިރިއުޅޭ ރެޕާއިންތަކެއްގެ ވާހަކަ ކިޔައިދީ އެ މީހުންނަށް ކާމިޔާބު މިއުޒިކު ކެރިއަރެއް ފެށުނު ގޮތް ކިޔައިދިން ވާހަކައެކެވެ.
މި ފިލްމަށް 2020ވަނަ އަހަރުގެ ފިލްމުފެއާ އެވޯޑުގެ 13 ކެޓަގަރީއަކުން އެވޯޑު ލިބުނެވެ. އޭގެ ތެރޭގައި އެ އަހަރުގެ އެންމެ މޮޅު ފިލްމު، އެންމެ މޮޑު ޑައިރެކްޓަރު، އެންމެ މޮޅު ސްޓޯރީ، އެންމެ މޮޅު އެކްޓަރު އަދި އެކްޓްރެސްގެ އެވޯޑު ހިމެނެއެވެ.